HECHOS 10

Corneliomantapish, Pedromantapish

1Cesarea pueblopica, Cornelio shuti runami causarca. Paica Italia llactamanta patsac soldadocunata mandacmi carca. 2Paica Dios yuyaillami causac carca. Chaimantami tucui familiahuan Diosta manchashpa, mañashpa, israelcunapurapi huacchacunaman cullquita cushpa causac carca. 3Shuc punzha, quimsa horas chishita Diosta mañacucpi, Dios cachashca ángel muscuipi shina cungailla ricurishpaca:

—Cornelio— nirca.

4Chaimanta Cornelio manchaihuan angelta ricushpaca:

—Amito, ¿imatatac ningui?— nirca.

Chashna nicpimi angelca:

—Huacchacunaman cushcatapish, can Diosta mañashcatapish paica chasquishcami. 5Cunanca, Jope pueblomanta Pedro nishca Simonta pushamuchun cachai. 6Paica carata ñutuyachic Simonpac huasipimi pozacun. Chai huasica mama cucha patapimi. Pai shamushpami, can imata ruhuana cashcataca huillanga— nirca.

7Paihuan parlacuc ángel ricpica, Cornelioca ishcai serviccunata shinallatac Dios yuyailla causac soldadotami cayarca. 8Paicunaman tucui ima tucushcata parlashpami, Jope puebloman cacharca.

9Cayandi punzha, chai runacuna Jope puebloman ñanta chayacucpica, chaupi punzha shina cacpimi, Pedroca pai pozana huasi jahuaman huichicushpa, Diosta mañacurca. 10Pedroca yarcachishpami micunata munarca. Micuna ruhuaringacaman yalli yarcaihuan cashpami, muscuipi shina 11jahua pacha pascarictapish, shuc jatun lienzo chuscu puntapi huatashca, pai tiyacucman urai shamucuctapish ricurca. 12Chai lienzopica, tucui cai pachapi tiyac chuscu chaquiyuc animalcunapish, allpata aisarishpa puric animalcunapish, alasyuc animalcunapishmi carca. 13Shuc rimashca uyarishpaca:

—Pedro, jatari. Caicunata huañuchishpa micui— nirca.

14Shina nicpimi Pedroca:

—Mana, Apunchic Jesús. Mapa animalcunataca mana micushachu, jaicapi mana micushcanichu— nirca.

15Shina nicpi, cutin rimashca uyarishpaca:

—Dios chuyayachishcataca, ama mapami nichu— nirca.

16Chai lienzo quimsa cutin ricurishpaca, jahua pachamanmi apashca carca. 17Chaita Pedro ricushpa, mancharishpa shayacucpimi, Cornelio cachashca runacunaca tapushpa, tapushpa Simonpac huasiman cungailla chayarca. 18Chaiman chayashpami, Pedro nishca Simonmanta tapurca.

19Muscuipi shina ricushcata Pedro yuyaricucpimi, Diospac Espirituca: «Quimsa runacunami canta mashcacun. 20Paicunataca ñucami cacharcani. Chaimanta ama caita chaita yuyashpa uricui. Paicunahuan rilla» nirca.

21Chaimanta Pedro Cornelio cachashca runacunapacman uricumushpaca:

—Ñucami cancuna mashcacushca Simón Pedroca cani. ¿Imatatac nicunguichic?— nirca.

22Chashna nicpimi paicunaca:

—Pasac soldadocunata mandac Cornelio cachacpimi shamunchic. Paica Diosta cazucmi, shinallatac tucui israelcunapac alli nishca runami. Dios cachashca angelmi canta huasiman pushamuchun, shinallatac can ima huillashcata uyachun nishca— nirca.

23Chaimantami Pedroca pai pozacuc huasipi paicunata chai tutaca pozachirca. Cayandi punzhaca Pedroca paicunahuanmi rirca. Jope pueblo maijan criccunapish paicunahuan rircacunami.

24Quipa punzha ña Cesarea puebloman chayacpica, Cornelioca paipac familiacunahuan, paipac alli ricsishcacunahuanmi tandarishpa, shuyacushca carca. 25Pedro chayacpica, Cornelio tupangapac llucshishpami, paipac ñaupapi cungurishpa chasquirca. 26Chaimantami Pedroca:

—Shayari, ñucapish can shina runallami cani— nishpa jatarichirca.

27Pedroca Corneliohuan parlashpa, ucuman yaicushpaca, achca gentecuna tandanacushcatami ricurca. 28Chaipimi Pedroca:

—Israelcuna, mana israelcunahuan mana tandanacuc cashcataca, cancunallatac yachanguichicmi. Paicunapac huasillamanpish mana chayarina cashcatapish yachanguichicmi. Shina cacpipish, Dios ñucaman ricuchishpaca: “Pitapish ama mana alli nishpa, millanguichu” nirca. 29Chaimantami can cachashca runacuna ñucapacman chayacpica, imamantapish mana jarcarishpa shamuni. Cancunaca, ¿imapactac cayachircanguichic?— nirca.

30Shina nicpimi Cornelioca:

—Ñami chuscu punzha tucun. Chaica, cunan shina chishimi, cai ñuca huasipi ayunashpa, Diosta mañacurcani. Chaipimi jagan nicuc churanata churashca runa ñapish ricurirca. 31Chashna ricurishpaca: “Cornelio, can mañashcataca Diosca uyashcami. Can huacchacunaman imallata cushcatapish ricushcami. 32Cunanca, Jope pueblomanta Pedro nishca Simonta pushamuchun cachai. Paica carata ñutuyachic Simonpac huasipimi. Chai huasica mama cucha patapimi. Pai shamushpami, can imata ruhuana cashcata huillanga” nirca. 33Chaimantami canta pushamuchun cacharcani. Allitami shamushcangui. Cunanca tucuimi Diospac ñaupapi canchic. Pai tucui imata ñucanchicman huillachun nishcataca huillailla. Ñucanchicca uyashun ninchicmi— nirca.

Corneliopac huasipi Pedro huillashcamanta

34Chaimantami Pedro huillai callarishpaca:

—Cunanmi allita entendini. Chaica, Diosmanca, tucuimi chai shinallatac canchic. 35Mai llactapipish Diosta manchashpa, cashcata ruhuacpica, Diosca chasquinmi. 36Diosca Jesucristotami israelcunaman paihuan alli tucushpa, sumacta causachun, alli huillaita huillachirca. Paica tucuita mandac Jesucristomi. 37Juan bautizarinamanta huillashca quipa, Galilea llactamanta callarishpa, Judea llactacaman ima tucushcataca cancunallatac yachanguichicmi. 38Diosca Nazaret pueblomanta Jesusman paipac Espirituta cushpami, poderyucta ruhuarca. Dios paihuan cashcamantami Jesusca maipipish allita ruhuashpa, llaquichic Satanás japishcacunatapish alliyachishpa purirca. 39Ñucanchicca Jerusalén pueblopipish, Judea llactapipish Jesús tucui imalla ruhuashcacunata ricushpa, huillaccunami canchic. Chai tucui allita ruhuacucpipish, paitaca cruzpi chacatashpami huañuchirca. 40Chashna huañuchicpipish, Diosca quimsa punzhapi causachishpami, ñucanchicman cutin ricuchirca. 41Mana tucuimanchu ricuchirca. Ñucanchic imalla ricushcata huillachun, Dios ñaupaman acllashcacunallamanmi ricuchirca. Huañushcacunapuramanta Jesús causaricpica, ñucanchicca paihuanmi micurcanchic, ubiarcanchic. 42Diosca ñucanchictami huañushcacunatapish, causaccunatapish taripacca Jesús cashcata huillachun mandarca. 43Dios ima nishcata tucui huillaccunami: “Jesusmi, paita criccunapac juchacunata perdonanga” nishpa huillarca— nirca.

Mana israelcunamanpish Diospac Espíritu shamushcamanta

44Pedro huillacucpiracmi, chai huillashcata tucui uyaccunapacman Diospac Espíritu shamurca. 45Pedrohuan shamuc Jesusta cric israelcunaca, Diospac Espíritu mana israelcunapacmanpish shamushcata ricushpami mancharircacuna. 46Chaica, shuctac rimaicunatami rimacurca. Diostapish “allimari cangui” nicurcami. 47Chaimantami Pedroca:

—Cai runacunapish ñucanchic shinallatacmi Diospac Espirituta chasquincuna. Chaimanta paicuna bautizarichunca, pi mana jarcangachu— nirca.

48Shina nishpami Pedroca Apunchic Jesuspac shutipi paicunata bautizachun mandarca. Chaimantami Pedro asha punzhacunata paicunahuan saquirichun mañarcacuna.

Currently Selected:

HECHOS 10: QCA10

Highlight

Copy