HECHOS 9

Saulo Jesucristota crishcamanta

(Hch 22.6-16; 26.12-18)

1Sauloca Apunchic Jesusta criccunataca ashtahuan huañuchinata munashpami, Israel curacunata jatun mandac curapacman rirca. 2Chaica, Damasco pueblo tandanacuna huasicunapi yaicushpa, Jesusta catic caricunatapish, huarmicunatapish Jerusalenman prezu apamungapacmi quillcata mañangapac rirca.

3Pai Damasco puebloman ñanta rishpa chayacucpimi, cungailla jahua pachamanta relampa jaguin nishpa, paipac muyundita achicyachirca. 4Chaimanta Saulo pambaman urmashpaca:

—Saulo, Saulo, ¿ima nishpatac ñucata llaquichicungui?— nishcatami uyarca.

5Chaita uyashpami Sauloca:

—Amito, ¿pitac cangui?— nirca.

Shina nicpimi chai rimacca:

—Ñucaca can piñashpa llaquichicuc Jesusmi cani. Canllatami puyapi chugriric shina, llaquita apacungui— nirca.

6Chaimanta Saulo manchaihuan chucchushpaca:

—Cunanca, ¿imatatac ruhuachun ningui?— nirca.

Shina nicpimi, Apunchic Jesusca:

—Jatarishpa, Damasco pueblollamantac ri. Chaipimi can imata ruhuana cashcataca huillanga— nirca.

7Saulohuan riccunaca pita mana ricurcachu. Ashtahuanpish rimashcallata uyashpami, yallita manchaihuan carcacuna. 8Saulo pambamanta jatarishpa, ñahuita pascashpapish imata mana ricui pudircachu. Chaimantami maquimanta aisashpa, Damascoman pusharcacuna. 9Chaipimi quimsa punzhata imata mana ricushpa, mana micushpa, mana ubiashpa carca.

10Damasco pueblopica Jesusta cric Ananiasmi causarca. Paiman Apunchic Jesús muscuipi shina ricurishpaca:

—Ananías— nirca.

Shina nicpimi Ananiasca:

—Caipimi cani, Apunchic Jesús— nirca.

11Shina nicpimi, Apunchic Jesusca:

—Jatari, Derecha shuti ñanman ri. Judaspac huasipi yaicushpa, Tarso pueblomanta Saulota tapui. Chai huasipimi paica Diosta mañacun. 12Shinallatac muscuipi shinami, can paipacman yaicushpa ñahui cutin ricuchun, cambac maquita paipac uma jahuapi churacta ricurca— nirca.

13Chashna nicpimi Ananiasca:

—Apunchic Jesús, taucacuna: “Chai Sauloca Jerusalenpi causac criccunata piñashpa llaquichicun” ninacuctami uyarcani. 14Cunanpish canta criccunata huatashpa apangapacmi, curacunata mandac curacunaman quillcata mañashpa shamushca— nirca.

15Chashna nicpipish, Apunchic Jesusca:

—Rilla, paitaca mana israelcunamanpish, jatun mandaccunamanpish, israelcunamanpish ñucamanta huillachunmi acllarcani. 16Pai ima shina ñucamanta llaquicunata apana cashcataca, ñucallatacmi ricuchisha— nirca.

17Ananías Saulo tiyacuc huasiman rishpa, Saulopac uma jahuapi maquita churashpaca:

—Huauqui Saulo, can caiman shamucucpi, ricuric Apunchic Jesusmi, cambac ñahui cutin ricuchun, shinallatac Diospac Espíritu cambac shungupi junda cachun, cambacman cacharca— nirca.

18Chai ratomi Saulopac ñahui murumanta challua concha shina urmacpica, cutin ricurca. Ñahui ricucpica, jatarishpa bautizarircami. 19Ña micushpaca sinchiyarcami. Quipaca tauca punzhacunatami Damasco pueblopi caishuc criccunahuan carca.

Damasco pueblopi Saulo huillai callarishcamanta

20Saulo israelcuna tandanacuna huasicunapi Quishpichic Cristomanta huillangapac yaicushpaca: “Jesusca Diospac Churimi” nishpami, huillai callarirca.

21Chaita tucui uyaccuna mancharinacushpaca:

—¿Manachu cai runaca Jesusta mañaccunata Jerusalenpi llaquichic carca? Cunanpish, curacunata mandac curacunapacman huatashpa apangapacmi, shamushca canga— ninacurca.

22Ashtahuanpish Sauloca ashtahuanmi mana manchashpa: “Jesusmi Quishpichic Cristoca” nishpa, huillai callarirca. Chaimantami Damasco pueblopi causac israelcunaca upalla saquirca.

Israelcunamanta Saulo miticushpa rishcamanta

23Tauca punzhacuna quipami israelcuna tandanacushpa, Saulota huañuchinata yuyarishpa, 24punzhai tuta pueblo pungucunapi chapacurca. Chashna yuyarishcataca Sauloca yachac chayarcami. 25Chaimantami criccunaca Saulota shuc jatun canashtapi churashpa, chai pueblo pircata uricuchishpa, tuta cacharcacuna.

Jerusalenman Saulo cutishcamanta

26Saulo Jerusalenman chayashpaca, criccunahuanmi tandanacunata munarca. Ashtahuanpish criccunaca: “Mana cricchu canga” yuyashpami, Saulotaca mancharca. 27Chaimantami Bernabeca apostolcunapacman Saulota pusharca. Chaipimi Bernabeca Apunchic Jesús Sauloman ñanpi ricurishpa rimashcatapish, Saulo Damascopi mana manchashpa Jesusmanta huillashcatapish parlarca. 28Chaimantami Sauloca Jerusalenpi caishuc criccunahuan tandanacushpa, llucshin yaicun puricurca. 29Sauloca Jerusalenpipish mana manchashpami, Apunchic Jesusmanta huillarca. Griego rimac israelcunahuanpish ñahui ñahuimi rimanacuc carca. Chaimantami Saulotaca huañuchinata yuyarinacurca. 30Criccuna chaita yachashpami, Saulotaca Cesarea pueblocaman pushashpa, Tarso puebloman cacharca.

31Chaimantami Judea llactapi, Galilea llactapi, Samaria llacta tandanacushca criccunaca cushilla causarcacuna. Paicunaca Mandac Diosta manchashpa, ashtahuan sinchi criccunami tucurca. Shinallatac Diospac Espíritu pushacushcamantami, ashtahuan achca criccuna tucurca.

Eneasta alliyachishcamanta

32Pedroca tucui criccunata ricushpa puricushpami, Lida pueblo criccunapacman chayarca. 33Chai pueblopica, paralisis ungüihuan pusac huatata ungushca Eneastami ricurca. 34Pedroca paitaca:

—Eneas, cantaca Jesucristomi alliyachin. Jatari, cambac camata tandachi— nirca.

Shina nicpica, Eneasca jatarishpa shayarircallami.

35Chashna alliyachishcata ricushpaca, Lida pueblo causaccunapish, Sarón pueblopi causaccunapish tucuimi Apunchic Jesusta crircacuna.

Dorcas huarmita causachishcamanta

36Jope pueblopica, Tabita shuti cric huarmimi causarca. Chai shutica, griego rimaipica «Dorcas» nisha ninmi. Chai huarmimi huacchacunata ayudashpapish, shuctac allicunata ruhuashpapish causac carca. 37Chai punzhacunapimi, shuc ungüi japicpi huañurca. Pai huañucpica, armachishpa pilluchishpami, shuc ucupi churarca. 38Lida puebloca, Jope pueblo cuchullapimi carca. Chaimantami criccunaca Lida pueblopi Pedro cacta yachashpa, Jope puebloman utca cayamuchun ishcai runacunata cacharca.

39Chaimantami Pedroca jatarishpa paicunahuan rirca. Pai chayacpica, huañushca velaricuc ucumanmi pusharca. Chaiman chayacpimi, viuda huarmicunaca Dorcas causacushpa ruhuashca churanacunata Pedroman ricuchishpa, muyundita shayarishpa huacarca. 40Pedroca tucui chai ucupi caccunata canzhaman llucchishpaca, cungurishpami Diosta mañarca. Chai huañushca huarmita ricungapac tigrarishpaca:

—¡Tabita, jatari!— nirca.

Shina nicpimi, chai huarmica ñahuita pascashpa, Pedrota ricushcahuan jatarishpa tiyarirca.

41Chaimantami Pedroca maquimanta jatarichishpa, viuda huarmicunatapish, caishuc criccunatapish cayashpa, ña causarishcata ricuchirca. 42Chaitaca Jope pueblopi tucui causaccuna yachashpaca, achcacunami Apunchic Jesusta crircacuna. 43Pedroca Jope pueblopi carata ñutuyachic Simonpac huasipimi unaita carca.

Currently Selected:

HECHOS 9: QCA10

Highlight

Copy