HECHOS 13

Bernabepish, Saulopish huillagrishcamanta

1Antioquía pueblo tandanacushca criccunapica, Dios ima nishcata huillaccunapish, yachachiccunapishmi tiyarca. Paicunaca: Bernabé, Níger nishca Simón, Cirene pueblomanta Lucio, Galilea llactata mandac Herodes-huan huiñac Manaén, Saulomi carca. 2Paicuna ayunashpa, Diosta mañashpa tiyacucpimi, Diospac Espirituca: «Bernabetapish, Saulotapish huillachun cachaichic. Paicunataca ñami acllarcani» nirca.

3Ayunashpa mañashca quipaca, Bernabepac, Saulopac uma jahuapimi maquita churashpami cacharca.

Chipre llactapi huillashcamanta

4Diospac Espíritu Bernabeta, Saulota cachacpica, Seleucia pueblomanmi chayarca. Chaimantaca barcopimi Chipre llactaman rircacuna. 5Salamina puebloman chayashpaca, israelcuna tandanacuna huasicunapimi Diosmanta alli huillaita huillarcacuna. Marcos nishca Juanmi paicunata ayudashpa purirca. 6Tucui Chipre llactapi huillashpa puricushpami, Pafos puebloman chayarcacuna. Chaipimi israelcunapuramanta Barjesús brujohuan tuparcacuna. Paica: “Dios ima nishcata huillacmi cani” nishpami, llullac carca. 7Chai brujoca Chipre llactata mandac, alli yachac Sergio Paulohuanmi apanacuc carca. Chai mandacmi Bernabetapish, Saulotapish Diosmanta huillachun cayac cacharca. 8Paicuna huillangapac shamucpica, chai brujoca ama crichunmi chai mandactaca jarcarca. Barjesús shutica griego rimaipica Elimas nisha ninmi. 9Saulo shuti Pablo, paipac shungupi Diospac Espíritu junda cacpimi, chai brujota ricurashpa:

10—¡Canca Diablopac huahuami cangui! ¡Canca cashcata ruhuanata saquishpami, mana allillata ruhuashpa causangui! ¿Ima horacamantac Mandac Dios munashca shina, alli causasha nicuccunataca pandachingui? 11Cunanca Mandac Dios llaquichicpimi, mana ricuc saquiringui. Tauca punzhacunacamanmi, inti achicyachishcatapish mana ricungui— nirca.

Chashna nicpimi, brujopac ñahui amsayacpi, mana ricui pudishpa, maquimanta maijan aisachun mashcarca. 12Mandac Sergio chaita ricushpa, shinallatac Pablo Apunchic Jesusmanta yachachishcata uyashpaca, mancharishcami saquirirca. Chaimantami Jesusta crirca.

Pablo Bernabehuan Pisidia llactaAntioquía pueblopi huillashcamanta

13Pafos pueblomanta Pablo paihuan puriccunahuan barcopi rishpaca, Panfilia llacta Perge pueblomanmi chayarca. Marcos nishca Juanca paicunamanta raquirishpami, Jerusalenman cutirca. 14Pablohuan, Bernabehuan Pergemanta llucshishpaca, Pisidia llacta Antioquía pueblomanmi rirca. Chaiman chayashpaca, samana punzha cacpimi, israelcuna tandanacuna huasiman yaicurca. 15Chaipi cacpimi, mandashcacunatapish, Dios ima nishcata huillaccuna quillcachishcatapish uyashca quipaca, chai tandanacuna huasipi mandaccunaca:

—Huauquicuna, gentecunata cunashpa rimasha nishpaca rimaichiclla— nichun cacharcacuna.

16Chaimanta Pablo jatarishpa, upallachu maquihuan señata ruhuashpaca:

—Israel huauquicunapish, Diosta manchac mana israelcunapish, caita uyaichic. 17Ñucanchic israelcunataca Diosmi ñaupa taitacunamanta pacha acllarca. Chashnami Egipto llactapi pozashpalla causacucpipish, ashtahuan mirachirca. Chai quipami, paipac poderhuan chai llactamanta llucchirca. 18Chashnami shitashca pambapi chuscu chunga huatata paicuna mana allicunata ruhuacpipish, Diosca mana saquirca. 19Diosca Canaán llacta canchis llactacunapi causaccunata huañuchichishpami, ñaupa taitacunaman chai allpataca curca. 20Chai quipaca, chuscu patsac pichca chunga huatatami, Dios ima nishcata huillac Samuel mandacui punzhacaman, alli mandaccunata churarca. 21Samuel mandacui punzhacunapi israelcuna jatun mandacta mañacpica, Diosca Cispac churi Saultami chuscu chunga huatata mandachun curca. Saulca Benjamín aillumantami carca. 22Saulta llucchishpaca, Davidtami jatun mandac cachun churarca. Diosca Davidmanta rimashpaca: “Isaipac churi Davidllami ñuca ima nishcata ruhuashpa, ñuca munashca shina mandanga” nirca. 23Israelcunata quishpichichunca, Davidpac huahua huahuacunapuramantami Dios cusha nishca shina, Jesustaca curca. 24Jesús manarac shamucpica, Juanca juchayuc cashcamanta llaquirishpa, Diosman cutirishpa bautizarinamantami israelcunaman huillarca. 25Juan, pai huillanata tucuchicushpaca: “Cancunaca ñucataca, ¿pi cashcatatac yuyanguichic? Ñucaca mana cancuna shuyacushca runachu cani. Shucmi ñucapac quipa shamunga. Ñucaca paipac ushuta huatashcallatapish mana pascaipacmi cani” nishpami huillarca.

26Abrahammanta mirarishca huauquicunalla, Diosta manchac, mana israelcunapish cai quishpirinamanta huillashcaca cancunamanmi. 27Chaica, Jerusalenpi causaccunapish, paicunata mandaccunapish, Jesús pi cashcataca mana yacharcachu. Dios ima nishcata huillaccuna quillcashcata tucui samana punzhacunapi rezashcata uyashpapish, mana entendircachu. Jesusta huañuchishpaca, paicunallatacmi chai huillaccuna huillashcata pactachircacuna. 28Paicuna Jesusta imamanta mana huañuchi pudishpaca, mandac Pilato huañuchichunmi mañarcacuna. 29Jesusmanta Dios quillcachishcapi tucui nishcacunata pactachishca quipaca, chacatashcamanta uricuchishpami enterrarcacuna. 30Paicuna chashna ruhuacpipish, Diosca huañushcacunapuramanta causachircami. 31Causarishpaca, Galilea llactamanta Jerusalenman paihuan puriccunallamanmi, tauca punzhacunacaman ricurirca. Cunanca, chaita ricuccunami, tucui ñucanchic israelcunamanca huillacun.

32Ñaupa taitacunaman Quishpichicta Dios cusha nishcataca ñucanchicpish huillacunchicmi. 33Diosca Jesusta causachishpa, ñucanchicman cushpami, pai cusha nishcataca pactachishca. Chaimantami quipa Salmopica: “Canca ñuca Churimi cangui. Cunanca ñuca Huahuami cangui” nin. 34Diosca Jesusta huañushcacunapuramanta causachishpaca, paipac cuerpo ismuchun mana saquircachu. 35David shuc Salmopica: “Cambaclla causactaca, cuerpo ismuchunpish mana saquinguichu” ninmi. 36Davidca pai causai punzhacunapica Dios munashca shinami servishpa causarca. Chashna cashpapish paica huañushpa, paipac ñaupa taitacunahuanmi enterrashca carca. Paipac cuerpopish ismurcami. 37Ashtahuanpish Dios causachishca Jesuspac cuerpoca mana ismurcachu. 38Tandanacushca huauquicunalla, cai ñuca huillashcata alli yachaichic: Cancuna Jesusta cricpimi, Diosca cancunapac juchacunata perdonanga. 39Moisés mandashcacunata pactachishpaca, mana Dios-huan alli tucui pudircanguichicchu, ashtahuanpish Jesusta cricpimi, Diosca paihuan alli tucuchun pitapish chasquin. 40Chaimanta alli yuyarichic. Pacta Dios ima nishcata huillaccunaman huillachishca shina tucunguichicman. Paica:

41“Ñuca ima nishcata

mana cazushpa burlaccunalla,

mancharishpa miticuichic.

Chaica, cancuna causacuc punzhacunapica,

mancharinacunatami ruhuasha.

Chaita pi huillacpipish,

mana cringuichicchu” nishcami— nirca.

42Pablohuan, Bernabehuan tandanacuna huasimanta llucshicucpica, mana israelcunaca samana punzhapish caillamantatac yachachichunmi mañarcacuna.

43Tucui chaipi caccuna llucshicpica, tauca israelcunapish, israelcuna yachachishcata caticcunapish Pablota, Bernabetami caticurcacuna. Chai caticcunataca Diosta tucui shunguhuan alli catichun, Dios cuyacushcatapish ama cungarichunmi cunashpa saquirca.

44Chai quipa, samana punzhapica, chai pueblopi causaccunaca maijancunalla saquirishpami, Diosmanta alli huillaita uyangapac tandanacurca. 45Chashna taucacuna tandanacushcata israelcuna ricushpami envidiashpa rimarcacuna. Chashnami Pablo yachachishcata yangapi churashpa, camishpa rimarircacuna.

46Chashna rimacucpipish, Pabloca Bernabehuan manchashpami, cashna nishpa huillarca. Paicunaca:

—Cancuna israelcunamanracmi, Diospac shimita huillana carcanchic. Chashna cacpipish, cancunaca mana uyashun nishpami, huiñai causaita mana chasquishun ninguichic. Chaimanta cunanllatacmi mana israelcunaman huillangapac rigrinchic. 47Mandac Diosca ñucanchicta mandashpaca:

“Mana israelcunaman luz shina

achicyachichunmi churarcani.

Tucui cai pachapi causaccunapish

can huillashcamanta quishpirichunmi,

churarcani” nishcami— nircacuna.

48Chashna nicta mana israelcuna uyashpaca: “¡Diosmanta alli huillaica sumacmari!” nishpami, yallita cushicurca. Huiñai causaita charichun, Dios acllashcacunaca, tucuimi crircacuna. 49Chashnami, Diosmanta alli huillaitaca tucui chai llactapi huillarca. 50Ashtahuanpish israelcunaca chai runacunata catishpa cachashunmi, gentecunapac alli nishca, Diosta yuyaric huarmicunatapish, chai pueblota mandaccunatapish cunarca. Chaimantami Pablotapish, Bernabetapish llaquichishpa, chai llactamanta llucchishpa cacharcacuna. 51Chashna ruhuacpica, mana chasquishun nishcata ricuchingapacmi, chaquipi catirishca allpatapish chaspi shitashpa, Iconio puebloman rircacuna. 52Chai pueblopi causac criccunaca Diospac Espíritu shungupi junda cacpimi, yallita cushicurca.

Currently Selected:

HECHOS 13: QCA10

Highlight

Copy