HECHOS 14

Pablo Bernabehuan Iconio pueblopi huillashcamanta

1Iconio pueblopimi Pabloca Bernabehuan israelcuna tandanacuna huasiman yaicushpa, alli huillaita huillarca. Chashna huillacpimi, israelcunapish, mana israelcunapish achcacuna Jesusta crircacuna. 2Ashtahuanpish Jesusta mana cric israelcunaca, mana israelcunatami criccunata piñachun cunarca. 3Chaimantami Pablopish, Bernabepish chai pueblopi unaicaman saquirirca. Apunchic Jesús paicunaman poderta cucpimi, mana manchashpa huillarcacuna. Dios cuyac cashcata huillashpami, milagrocunatapish, mancharinacunatapish ruhuarcacuna. 4Chaimantami chai pueblopi causaccunaca maijancunaca israelcuna parte, maijancunaca apostolcuna parte tucushpa chicanyarinacurca. 5Chashna tucushpami israelcunapish, mana israelcunapish mandaccunahuan tandanacushpa apostolcunata camishpa, rumicunahuan shitanata yuyarinacurca. 6Chaita yachashpami, Pabloca Bernabehuan miticushpa, Licaonia llacta Listra pueblomanpish, Derbe pueblomanpish, chai cuchulla llactacunamanpish rishpa, 7alli huillaita huillarcacuna.

Listra pueblopi Pablota rumihuan shitashcamanta

8Listra pueblopica, huacharishcamanta pacha mana puric runami tiyacurca. Paica chaqui tandarishca cashcamantami, mana puric carca. 9Paica Pablo rimashcata allimi uyacurca. Pablo chai runapac ñahuita allita ricushpaca, pai alliyanata cricuctami ricurca. 10Chaimanta sinchita rimashpaca:

—¡Jatarishpa, alli shayari!— nirca.

Shina nicpimi, chai runaca saltashpa puri callarirca. 11Chaipi caccuna Pablo chashna ruhuacta ricushpa, Licaonia rimaipi rimashpaca: «¡Dioscunami gentecuna shina tucushpa, ñucanchicpacman shamushca!» nishpa caparirca.

12Bernabetaca Júpiter diostami shutichirca. Pablotaca huillac cashcamantami Mercurio diosta shutichirca. 13Chai puebloman yaicuna pungupica, Júpiter diosta adorana huasimi carca. Chai diosta servic curami huagracunatapish, sisacunatapish punguman aparca. Chashna apamushpaca, diosman cuc shinami, Pablopac Bernabepac ñaupapi huagracunata huañuchishpa, rupachinata yuyacurca. 14Chaimanta Pablopish, Bernabepish yallita llaquirishpa, churanata lliquirishpa, chai gentecunapac chaupiman 15yaicushpaca:

—¿Imapactac chashna ruhuashun ninguichic? Ñucanchicca cancuna shina runallami canchic. Ñucanchicca cai yangalla ruhuanata saquishpa, causac Diosman cutirichunmi, alli huillaita huillangapac shamurcanchic. Paica jahua pachatapish, cai pachatapish, mama cuchatapish, tucui ima tiyactapish ruhuacmi. 16Paica ñaupaca tucui gentecuna quiquin munashca shina causachunmi saquirca. 17Chashna cacpipish, Diosca tamyahuan granota pucuchishpa, mana nicta carashpami cushichicun. Chashna allita ruhuashpami, pai pi cashcata ricuchin— nirca.

18Chashna rimashpapish diosman cuc shina, huagrata huañuchishpa rupachiccunataca mana jarcai pudircachu.

19Antioquía pueblomantapish, Iconio pueblomantapish maijan israelcuna shamushpami, gentecunata jatarichirca. Pablota rumicunahuan shitashpa, huañunallata ruhuashpami, “ñami huañun” nishpa, aisashpa, chai pueblomanta llucchirca. 20Criccuna Pablopac muyundita shayacucpica, paica jatarishpa, cutinmi chai pueblollamantac yaicurca. Cayandi punzhaca Pabloca Bernabehuanmi Derbe puebloman rirca.

21Chai pueblopi alli huillaita huillacpica, achcacunami crirca. Chai quipaca, cutinllatacmi Listra, Iconio, Antioquía pueblocunaman cutircacuna. 22Chaiman chayashpaca, chaipi causac criccunata tucui shunguhuan Jesusta crichunmi cunarca. Shinallatac: «Tucuilaya llaquicunata apashpami, Dios mandacucmanca yaicuna canchic» nircami. 23Tandanacushca criccunapurapica, ayunashpa Diosta mañashpami, pushac yuyaccunata acllashpa saquirca. Chashnami paicuna crishca Apunchic Jesusman mingarca.

Pablo Bernabehuan Siriallacta Antioquía puebloman cutishcamanta

24Pablo Bernabehuan Pisidia llactata rishpaca, Panfilia llactamanmi chayarca. 25Chai llacta Perge pueblopi alli huillaita huillashpaca, Atalia pueblomanmi rircacuna. 26Chai Atalia pueblomantaca barcopimi, Pabloca Bernabehuan Antioquía puebloman cutirca. Chai pueblopimi criccunaca paicunata Dios cuyashpa cuidachun nishpa cacharca. 27Antioquía puebloman chayashpaca, chaipi causac tandanacushca criccunatami tandachirca. Chashna tandachishpami, Dios paicunahuan cacpi, ima allicunata ruhuashcatapish, mana israelcunacaman quishpirichun Dios saquishcatapish parlarca. 28Chaipimi paicunaca criccunahuanca unaicaman carcacuna.

Currently Selected:

HECHOS 14: QCA10

Highlight

Copy