HECHOS 15

Jerusalenpi tandanacushcamanta

1Chai punzhacunapi Judea llactamanta Antioquía puebloman maijancuna shamushpa, criccunata yachachishpaca: «Moisés mandashca shina circuncisionta mana ruhuashpaca, mana quishpiringuichicchu» nishpami yachachirca.

2Chaimantami Pablopish, Bernabepish chai yachachic runacunahuan sinchita rimanacurca. Chaimantami criccunaca Pablotapish, Bernabetapish, maijan criccunatapish Jerusalenman rishpa, apostolcunahuan, criccunata pushaccunahuan parlashpa, allichichun cacharca.

3Tandanacushca criccuna paicunata cachacpica, Fenicia llactata, Samaria llactatami mana israelcunapish Diosman cutirishcata parlashpa rircacuna. Chashna parlacpica, chai criccunaca tucuimi yallita cushicurca.

4Paicuna Jerusalenman chayacpica, apostolcuna, criccunata pushac yuyaccuna shinallatac tucui criccunami chasquirca. Pablopish, Bernabepish Dios paicunahuan ima shina cashcatami parlarca. 5Chashna parlacpipish, fariseopuramanta maijan criccuna shayarishpaca:

—Mana Israel criccunataca circuncisionta ruhuashpa, Moisés mandashcacunata pactachichunmi yachachina canchic— nirca.

6Chaimantami apostolcunapish, pushac yuyaccunapish allita yuyarinacungapac tandanacurca. 7Chashna unaita rimanacushca quipa, Pedro shayarishpaca:

—Huauquicunalla, alli huillaita ñuca huillacpi, mana israelcunapish crishpa quishpirichunmi, Diosca ña utcaman ñucata acllarca. Chaitaca cancunallatac yachanguichicmi. 8Tucuipac shunguta yachac Diosmi mana israelcunamanpish Espirituta curca. Chashnami ñucanchicta chasquishca shina paicunatapish chasquirca. 9Paicuna cricpica, paicunapac shungumantapish juchacunata anchuchircami. Chaimantami ñucanchicpish, paicunapish chashnallatac canchic. 10Cunanca, ¿ima nishpatac ñucanchicpish, ñaupa taitacunapish maita mana pactachi pudishcata, pactachichun nishpa, Diosta piñachicunguichic? 11Ashtahuanpish Apunchic Jesús cuyashcallamantami, ñucanchicpish, paicuna shinallatac quishpichishca cashun. Chaitami crinchic— nirca.

12Shina nicta uyashpami, tucui gentecuna upalla tucushpa, Bernabepish, Pablopish Dios-huan cashpa, mana israelcunapac ñaupapi milagrocunata, mancharinacunata ruhuashcata parlashcata uyarcacuna. 13Paicuna tucui parlashca quipaca Jacoboca:

—Huauquicuna, ñuca nishcata uyaichic. 14Dios llaquishpa, mana israelcunatapish paipaclla cachun acllai callarishcatami, Simón Pedroca ña ñucanchicman parlarca. 15Caica, Dios ima nishcata huillaccunaman pai quillcachishca shinami tucushca. Chaipica:

16“Chai quipaca cutimushpa,

Davidpac huahua huahuacunataca

urmashca huasita jataric shinami,

cutin jatarichisha.

Urmashpa chingarishca shinatapish,

allichishpa jatarichishami.

17Chashna ruhuacpimi, tucui

llactamanta mana israelcuna

cashpapish, ñuca cuyashcacunaca

ñucata mañanata yuyaringa.

18Ñaupamanta pacha tucui ima tucuna

cashcata huillac Mandac Dios ñucami,

chashnaca nini” ninmi.

19Chaimanta mana israelcunapish Diosta catisha nicpica, mana ruhuanacunata ruhuachun nishpa, pandachinaca, mana allichu yuyachin. 20Chaipac randica, paicunataca ruhuashcalla dioscunaman ima cushcatapish, yahuartapish, sipishpa huañuchishca aichatapish ama micuchun, shinallatac ama huacllirichun, cunashpa, quillcashpa cachashunchic. 21Chaica, ñaupa punzhacunamanta pachami mai pueblocunapipish, tandanacuna huasicunapipish, samana punzhacunapi Moisés mandashcacunata rezashpa, uyachincuna— nirca.

22Shina nishcaca apostolcunamanpish, pushac yuyaccunamanpish, tandanacushca criccunamanpish allimi carca. Chaimantami tucui criccuna cuyashca Barsabás nishca Judastapish, Silastapish Pablohuan, Bernabehuan Antioquía puebloman richun acllarca. 23Chai quipaca paicuna apachunmi cartaca quillcarca:

«Apostolcunapish, pushac yuyaccunapish Antioquía pueblopi, Siria llactapi, Cilicia llactapi causac mana Israel criccunatapish saludanchicmi. 24Manapish ñucanchic mandacpi, ñucanchicpuramanta maijancuna cancunapacman rishpa: “Circuncisionta ruhuashpa, Moisés mandashcacunata pactachinami canguichic” nishpa, pandata yachachishcatami uyashcanchic. 25Chaimantami ñucanchic tucui mashna alli yuyarishpa, ñucanchicpurallamantatac cai huauquicunata cancunapacman cachanata yuyarircanchic. Paicunatami ñucanchic cuyashca Bernabehuan, Pablohuan cachanchic. 26Bernabepish, Pablopish huañunata mana manchashpami, Apunchic Jesucristomanta huillarca. 27Paicuna quiquin parlachunmi, Judastapish, Silastapish cancunapacman cachanchic. 28Diospac Espiritumanpish, ñucanchicmanpish alli cacpimi, cancunata mana ashtahuan piñachishpa, cai ruhuanallata ruhuachun ninchic: 29Ruhuashcalla dioscunaman cushca ofrendatapish, yahuartapish, sipishpa huañuchishca aichatapish ama micunguichicchu, shinallatac ama huaclliringuichicchu. Caicunata cazushpaca, allitami ruhuanguichic. Allilla cashca cachun» nishpami quillcarca.

30Chashnami chai acllashca runacuna Antioquía puebloman rishpa, criccunata tandachishpa, chai quillcata curcacuna. 31Chai quillcata rezashcata criccuna uyashpaca, tucuimi yallita cushicurca. 32Judaspish, Silaspish Dios ima nishcata huillaccuna cashpami, chai criccunataca tauca cutin alli cunashpa yachachirca. Chashna yachachicpimi, criccunaca cushicushpa, ashtahuan catina yuyaita japirca. 33Chaipi tauca punzhacunata criccunahuan cashpaca, paicunata cachaccunapacmanmi cutishun nirca. Chaimantami chai criccunaca: “Allilla ringuichic” nishpa cacharca. 34Shina nicpipish, Silasca saquirina yuyaita charishpami, chaipi saquirirca. 35Pablopish, Bernabepish, Antioquía pueblollapitac saquirishpami, Apunchic Jesusmanta alli huillaita taucacunahuan huillarca.

Pabloca Bernabemanta raquirishpa, cutin huillagrishcamanta

36Tauca punzhacuna quipami, Pabloca Bernabetaca:

—Sarun Apunchic Jesusmanta alli huillaita ñucanchic huillacucpica, tauca pueblocunapimi uyashpa crirca. Cunanca, paicuna ima shina caticucta jacu ricungapac— nirca.

37Shina nicpimi Bernabeca:

—Marcos nishca Juanta pushashun— nirca.

38Chashna nicpimi Pabloca:

—Sarun ñucanchic huillanata manarac tucuchicpimi, Panfilia llactacaman rishpa, ñucanchicta shitashpa cutimurca. Chaimantami mana pushasha nini— nirca.

39Chashna rimanacushpami, chicanyarinacushpa, Bernabeca Marcosta pushashpa, barcopi Chipre llactaman rirca. 40Pabloca Silasta acllashpami ri callarirca. Chaimantami criccunaca Dios cuyashpa alli pushachun, Diosman mingarca. 41Chashnami Siria llacta, Cilicia llacta tandanacushca criccunata yuyaita cushpa, cushichishpa rircacuna.

Currently Selected:

HECHOS 15: QCA10

Highlight

Copy