HECHOS 16

Pablohuan Silas-huan Timoteota pushashcamanta

1Chai quipaca Pabloca Silas-huanmi Derbe pueblota rishpa, Listra puebloman chayarca. Chaipimi Jesucristota cric Timoteo causarca. Paipac mamapish israelcunapuramanta cric huarmimi carca. Taitaca griego runami carca. 2Timoteoca Listra pueblo, Iconio pueblo criccunapac alli nishcami carca. 3Pabloca Timoteota pushasha nishpami, circuncisionta ruhuachirca. Chaica, paipac taita griego cashcata tucui israelcuna yachashcamanta, paicunahuan mana piñanacungapacmi chashna ruhuachirca. 4Chashna rishpami, apostolcunapish, pushac yuyaccunapish Jerusalenpi yuyarinacushca imalla ruhuana cashcata cazuchun, tucui pueblocunapi huillashpa purirca. 5Chashna huillacpica, criccunapac tandanacuica maipipish ashtahuanmi sinchiyashpa, punzhanta mirarirca.

Macedonia runata muscuipi shina Pablo ricushcamanta

6Pablo, paihuan puriccunahuan Asia llactapi alli huillaita huillagricucpimi, Diospac Espirituca jarcarca. Chaimantami Frigia llactata, Galacia llactata rirca. 7Misia llactaman chayashpaca, Bitinia llactamanmi yaicunata munarca. Chaiman yaicuchunpish, Diospac Espirituca mana saquircachu. 8Chaimantami Misia llactata rishpa, Troas puebloman chayarca. 9Shuc tutami Pabloca Macedonia llacta shuc runa shayacucta muscuipi shina ricurca. Chai runaca: «Cai Macedonia llactata ayudaiyari» nishpami mañacurca. 10Pablo chai muscuipi shina ricushcata huillacpica: “Diosmi chai llactapi alli huillaita huillachun cayashca” nishpami, Macedonia llactaman utca rinata munarcanchic.

Pablohuan Silas-huan Filipos pueblopi huillashcamanta

11Troas pueblomantaca shuc barcopimi yacu chaupipi cac Samotracia llactaman chayarcanchic. Cutin cayandi punzhaca Necápolis pueblomanmi rircanchic. 12Chaimantaca Macedonia llacta jatun Filipos pueblomanmi rircanchic. Chai pueblopica, Roma llactamanta shamushcacunami causacushca carca. Chai pueblopimi asha punzhacunata carcanchic. 13Chaipimi samana punzhapi chai pueblomanta llucshishpa, jatun yacu pataman rircanchic. Chai yacu patapimi, israelcunaca Diosta mañangapac tandanacuc cashca carca. Chaipimi, tandanacushca huarmicunaman alli huillaita huillarcanchic. 14Chaipica, Tiatira pueblomanta Lidia huarmimi ñucanchic huillashcata uyacushca carca. Chai huarmica morado sumac lienzota catucmi carca, shinallatac Diosta yuyaricmi carca. Chai huarmimanmi Apunchic Jesusca Pablo huillashcata tucui shunguhuan uyachun, yuyaita curca. 15Chai huarmi paipac tucui familiandi bautizarishpaca:

—Apunchic Jesusta ñuca cric cashcata yachashpaca, ñuca huasipi pozaichic— nirca.

Chashna nishpami, ñucanchictaca saquichirca.

Pablotapish, Silastapish prezu japishcamanta

16Shuc punzha Diosta mañangapac ricucpimi, adivinac espíritu japishca huarmi huambra tupangapac llucshirca. Chai huambraca adivinashpami, paipac amocunata yallita chayucyachirca. 17Chai huambra Pablotapish, ñucanchictapish catishpaca:

—¡Cai runacunaca jahua pacha Diosta serviccunami! Paicunaca ima shina quishpirinatami huillancuna— nishpami caparicurca.

18Chashnami tauca punzhacunata caticurca. Chaimantami Pablo ña mana uyanayachishpa, chai huambrapi cac supaitaca:

—¡Jesucristopac shutipimi, cai huambramanta llucshichun mandani!— nirca.

Chai ratollatacmi supaica chai huambramanta llucshirca.

19Chai huambrapac amocunaca cullqui japina tucuricpimi, Pablotapish, Silastapish prezushpa, jatun plazapi cac mandaccunapacman aparca. 20Chai mandaccunapacman apashpaca:

—Cai Israel runacunami ñucanchic pueblopi piñanacuipi churashpa purincuna. 21Ñucanchicman mana yachachinacunatami yachachin. Ñucanchic Roma llacta runacunaca chai yachachishcataca mana uyashun ninchicchu. Mana catishun ninchicchu— nirca.

22Chaimantami tucui gentecunaca Pablotapish, Silastapish piñai callarirca. Shinami mandaccunaca Pablotapish, Silastapish churanata llucchishpa, caspicunahuan macachun mandarca.

23Yallita macachishpami, carcelpi churashpa, carcelta cuidacta allita cuidachun mandarca.

24Chashna mandacpimi, chai cuidacca cárcel ucu cuchuman apashpa, jutcushca tablapi chaquicunata canichishpa churarca.

25Chaupi tuta Pablo Silas-huan Diosta mañashpa cantacucpimi, caishuc prezucunapish uyarcacuna. 26Chashna mañacucpimi, cungailla allpa chucchui callarirca. Chaimantami cárcel pungucunapish, huatashca cadenacunapish pascarirca. 27Carcelta cuidac riccharishpaca, tucui cárcel pungucuna pascarishcata ricushpami: “¡Tucui prezucunami llucshishca canga!” yuyashpa, paipac espadallahuantac huañugrirca. 28Chaimantami Pabloca:

—¡Ama chashna ruhuaichu! ¡Tucuimi caillapitac canchic!— nishpa caparirca.

29Pablo chashna nicta uyashpa, carcelta cuidacca luzta mañashpa, ucuman yaicushpa Pablopac, Silaspac ñaupapi manchaihuan chucchushpa cungurirca. 30Chai ucumanta paicunata llucchishpaca:

—Amitocuna, quishpiringapacca, ¿imatatac ruhuana cani?— nirca.

31Chashna tapucpimi paicunaca:

—Apunchic Jesucristota cri. Canpish, cambac tucui familiapish quishpiringuichicmi— nirca.

32Chashna nishpami paimanpish, paipac familiacunamanpish Apunchic Jesusmanta alli huillaitaca huillarca. 33Chai tutallatacmi carcelta cuidacca paicunapac chugricunata jahuachirca. Quipaca, paipac tucui familiacunandimi bautizarirca. 34Ña bautizarishpaca, paipac huasiman pushashpami, micunata cararca. Paipac tucui familiacunandimi Diosta crishcamanta yallita cushicurca.

35Cayandi tutamanta, mandaccunaca: “Chai runacunataca cacharishpa cachailla” nishpami soldadocunata carcelta cuidacpacman cacharca. 36Chaimantami carcelta cuidacca Pablotaca:

—Mandaccunami cancunataca cacharichun mandashca. Chaimanta cunanca, cushilla richiclla— nirca.

37Shina nicpipish, Pabloca soldadocunataca:

—Ñucanchicca Roma llacta runacunami canchic. Ñucanchictaca manarac imata tapushpami, tucui gentecunapac ñaupapi macachishpa, carcelpi churachirca. Chashna ruhuashca jahuachu, cunanca pacalla cacharichun nishca. Paicuna cacharingapac shamungacamanmi, ñucanchicca mana rishpa, caillapitac cashun— nirca.

38Chashna nicpica, soldadocunaca mandaccunamanmi huillarca. Chaimantami Roma llacta runacuna cashcata yachashpa mancharircacuna. 39Chai mandaccunaca Pablopacman, Silaspacman rishpa, paicunata cacharishpaca:

—Ñucanchicca cancuna Roma llactamanta cashcata mana yachashcamantami, cashnaca ruhuashcanchic. Cunanca cai pueblomanta llucshishpa richiclla— nirca.

40Ña carcelmanta llucshishpaca, Lidia huarmipac huasimanmi rircacuna. Chai huasipi tandanacushca criccunata “alli catinguichic” nishpaca, chai pueblomanta rircacunami.

Currently Selected:

HECHOS 16: QCA10

Highlight

Copy