HECHOS 19
19
Efeso pueblopi Pablo huillashcamanta
1Corinto pueblopi Apolos cacpimi, Pabloca urcu urcuta rishpa, Efeso puebloman chayarca. Chaipi tauca criccunahuan 2tupashpaca:
—Cancuna crishpaca, ¿Diospac Espirituta chasquircanguichicchu?— nirca.
Chashna nicpimi paicunaca:
—Diospac Espíritu tiyashcataca, jaicapi mana uyashcanchicchu— nirca.
3Shina nicpimi Pabloca:
—¿Ima bautismotatac chasquircanguichic?— nirca.
Shina nicpimi paicunaca:
—Ñucanchicca Bautizac Juan yachachishcamantami bautizarircanchic— nirca.
4Shina nicpimi Pabloca:
—Juanca Diosman cuti richun nishpami: “Ñucapac quipa shamucta cringuichic” nishpa bautizarca. Chai shamucca Quishpichic Cristomi— nirca.
5Chashna nishcata uyashpaca, Apunchic Jesuspac shutipimi bautizarircacuna. 6Pablo paicunapac uma jahuapi maquita churacpica, Diospac Espirituta chasquishpami, shuctac rimaicunata rimashpa, Dios yuyaita cushcata huillarcacuna. 7Paicunaca chunga ishcai shinami carcacuna.
8Pabloca quimsa quillatami israelcuna tandanacuna huasiman yaicushpa, gentecuna crichun, Dios mandacucmanta mana manchashpa huillarca. 9Maijancunaca rumi shungu tucushpa, crinata mana munashpami tucuipac ñaupapi “Jesusta crinaca mana allichu” nishpa rimarcacuna. Chaimantami Pabloca tucui criccunata Tirano runa yachachina huasiman pushashpa, punzhanta yachachirca. 10Chashnami Pabloca chai Asia llactapica ishcai huatata causarca. Chaipi Apunchic Jesusmanta alli huillaita huillacpica, tucui israelcunapish, mana israelcunapish uyarcacunami. 11Diosca mancharina milagrocunata ruhuachumi Pabloman poderta curca. 12Chaimantami Pablo tuparishca churanacunatapish, lienzocunatapish ungushcacunapac jahuapi churangapac apaccuna carca. Shina churacpica, ungushcacunaca alliyarcacunami. Millai Supaicunapish runamanta llucshicmi carca.
13Rimarishpalla supaicunata llucchic maijan israelcunapish Apunchic Jesuspac shutita rimashpa, supaicunata llucchinatami yuyarcacuna. Chaimantami supaicunataca: «Pablo huillacuc Jesuspac shutipimi llucshi nini» nirca. 14Israel curacunata mandac Escevapac canchis churicunami chashna ruhuaccuna carca. 15Chashna nicucpimi, millai supaica: «Jesustaca ricsinimi, Pablo pi cashcatapish yachanimi. Ashtahuanpish cancunaca, ¿picunatac canguichic?» nirca. 16Chashna nincami, chai supai japishca runaca jatarishpa, paicunata chugriricta macashpa, churanacunatapish lliquirca. Chaimantami paicunaca huasimantaca miticushpa lluchulla rircacuna. 17Efeso pueblo israelcunapish, mana israelcunapish chashna tucushcata uyashpaca mancharishpami, Apunchic Jesustaca “allimari cangui” nircacuna.
18Tauca criccunami paicuna manarac crishpa, mana allita ruhuashcacunata llaquirishpa, tucuipac ñaupapi huillarca. 19Shinallatac maijan brujocunapish brujianata yachachic librocunatami tucui gentecunapac ñaupapi rupachingapac apamurca. Chai tucui librocunaca pichca chunga huaranga dracma cullqui valicmi cashca carca. 20Apunchic Jesusmanta maipipish huillacpimi, ashtahuan crishpa mirarirca.
21Chai quipami, Pabloca Macedonia llactata, Acaya llactata rishpa, Jerusalenman rinata yuyacurca. Chaimantami: «Roma pueblomanpish rinami cani» nicurca. 22Chashna yuyashpami, paita ayudac Timoteotapish, Erastotapish Macedonia llactaman cacharca. Paica chai Asia llactallapitacmi asha punzhacaman saquirirca.
Efeso pueblopi piñanacui tiyashcamanta
23Chai punzhacunami Efeso pueblopi Jesusta catinamanta huillashcamanta piña jatarircacuna. 24Chaipica cullquimanta imatapish ruhuac Demetriomi causarca. Paica Diana diosta adorana uchilla huasicunatami, cullquimanta ruhuac carca. Chashna ruhuashpaca paipish, paita ayudaccunapish achca cullquitami japic carca. 25Chaimantami paita ayudaccunatapish, shuctac runacunatapish tandachishpaca:
—Huauquicuna, cai ñucanchic yachashcata ruhuashpallami charicyanchic. Chaitaca cancunallatac yachanguichicmi. 26Chai Pablo imata nishpa puricuctaca cancunallatac ricunguichicmi, uyanguichicmi. Paica: “Maquihuan ruhuashcaca mana dioschu” nishpami puricun. Mana cai Efeso pueblollapi, ashtahuanpish tucui Asia llactapimi achcacunata crichishca. 27Mana ñucanchic cullqui japinallachu chingaringa. Ñucanchic Diana diosca tucui Asia llactapipish, shuctac llactacunapipish tucuipac alli nishcami. Cunanca jatun llaquimi tucugrin yuyachin. Diana diosta adorana huasita shitashpa, paita cungaringacunami— nirca.
28Paicuna chaita uyashpa, yallita piñarishpaca: «¡Ñucanchic cai Efeso pueblopi causaccunapac Dianaca allimari!» nishpa caparca.
29Chaimantami tucui gentecuna ashtahuan piñarishpa caparicurca. Chashnami Pablohuan puric Macedonia llactamanta Gayotapish, Aristarcotapish japishpa, tandanacuna jatun ucuman aparcacuna. 30Chai gentecunaman huillangapac Pablo yaicusha nicpipish, criccunaca mana yaicuchun saquircachu. 31Asia llactamanta Pablopac ricsishca mandaccunapish Pablo ama chai ucuman yaicuchun jarcaccunata cacharca. 32Chai ucupi caccunaca imapac tandanacushcatapish mana yacharcachu. Chaimantami shuccunaca caita, shuccunaca chaita nishpa caparicurca. 33Chai tandanacushcacunapac chaupimantami, israelcunaca imallatapish nichun, Alejandrota tangashpa cacharcacuna. Chashna cachacpi, Alejandro tucui chaipi caccunapac ñaupapi shayarishpa, upallachun maquihuan señata ruhuashpa, rimanata munarca. 34Ashtahuanpish Alejandrotaca israelcunapura cashcata ricsishpami, tucui chaipi cac gentecunaca: «¡Efeso pueblopac Diana diosca jatunmi!» nishpa, ishcai hora shinata caparirca.
35Chaimanta, chai pueblota mandacpac quillcac gentecunata upallachishpaca: «Huauquicuna, cai Efeso pueblopi causaccunami, tucuipac alli nishca Dianata adorana huasitaca ricuna canchic. Chaitaca tucuimi yachancuna. Chai Dianaca Júpiter nishca luceromanta shamushca diosmi. 36Chaitaca pi mana negai pudinchu. Chaimanta upalla caichic. Imata ruhuacushcataca allita yuyarichic. 37Chaica, cancuna apamushca runacunaca ñucanchic diostaca mana camishcachu. Paita adorana huasimantapish mana imata apashcachu. 38Cai runacuna Demetriotapish, paita ayudaccunatapish piñachishca cacpica, mandaccunapacman, juezcunapacman richun. Chaipi ñahui ñahui juchanchichun. 39Ima shucmanta juchanchina cacpica, mandashcapi nishca shinami, tandanacushpa, yuyarina canchic. 40Cunan cashna bullata ruhuashcamantaca pacta Roma llacta soldadocuna juchanchinman. Paicuna: “¿Imamantatac caita ruhuarcanguichic?” nicpica, imata mana ni pudishunchu» nirca.
41Chashna nishpami, chai tucui tandanacushcacunata huasiman cacharca.
Currently Selected:
HECHOS 19: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
