HECHOS 20

Pablo Macedonia llactamanpish,

Grecia llactamanpish rishcamanta

1Chai bulla chunlla tucucpimi, Pabloca criccunata cayarca. Paicunata cushichishpa, ucllarishpa, caya minchacaman nishpami, Macedonia llactaman rirca. 2Chai llacta criccunata cunashpa cushichishpami, Grecia llactaman chayarca. 3Chaipica quimsa quillatami carca. Chai quipaca Siria llactamanmi barcopi rinata yuyacurca. Shina cashpapish, israelcuna paita macangapac chapacushcata yachashpami Macedonia llactaman cutinata yuyarirca. 4Pablotaca Berea pueblomanta Sopaterpish, Tesalónica pueblomanta Aristarcopish, Segundopish, Derbe pueblomanta Gayopish, Timoteopish, Asia llactamanta Tiquicopish, Trofimopishmi Asia llactacaman compañarca. 5Paicunaca Troas pueblopi shuyangapacmi ñauparca. 6Ñucanchicca levadura illac tandata micuna fiesta tucuricpimi, Filipos pueblomantaca barcopi rishpa, pichca punzhapi Troas puebloman chayarcanchic. Chaipimi chai ñaupashpa ric criccunahuan tupashpa, canchis punzhata carcanchic.

Troas pueblopi Pablo huillashcamanta

7Semana callari punzhapica, tucui criccunami Jesús huañushcata yuyarishpa, tandata micungapac tandanacurcanchic. Pabloca cayandi ña rina cashcamantami, chaupi tutacaman yachachicurca. 8Tandanacushca alto ucupica, achca lamparacunami japichishca carca. 9Chaipica Eutico huambrami ventanapi tiyacurca. Pablo unaicaman huillacushcamantami chai huambraca sueñushpa, quimsa alto jahuamanta urmarca. Paita ricungapac ricpica, ñami huañushca cashca carca. 10Jahuamanta Pablo uricushpa, chai huambrata ucllarishpaca:

—Ama mancharichicchu. Huambraca causacunmi— nircami.

11Pablo cutin jahuaman huichicushpaca, tandata chaupishpami caishuc criccunahuan micurca. Chai quipapish pacaringacamanmi parlacurca. 12Chai huañuc huambrata causacta huasiman pushacta ricushpami, criccunaca yallita cushicurca.

Troas pueblomanta Mileto puebloman rishcamanta

13Pabloca chaquillahuanmi Asón pueblocaman rinata munarca. Chaimantami ñucanchicca chai pueblopi paihuan tupangapac barcopi ñauparcanchic. 14Chaipi Pablohuan tupashpaca, barcopimi Mitilene puebloman rircanchic. 15Mitilene pueblomanta cayandi barcopi rishpami Quío llacta chimbapura Samos llactaman chayarcanchic. Chaimantaca Trogilio pueblopi samarishpami, cayandica Mileto puebloman chayarcanchic. 16Pabloca ima shinapish Jerusalenpi Pentecostés punzhata canatami yuyarishca carca. Chaimantami Pabloca Asia llactapi mana unaiyashpa, Efeso pueblopi mana yaicushpa, barcopi rircalla.

Efeso pueblo criccunaman Pablo huillashcamanta

17Pabloca Mileto pueblopi cashpami, Efeso pueblo tandanacushca criccunata pushac yuyaccunata cayac cacharca. 18Paicuna chayamucpica, Pabloca: «Asia llactaman chayamushca punzhamanta pacha, ñuca cancunahuan ima shina cashcataca cancunallatac alli yachanguichicmi. 19Chaica, mana jatun tucushpami, Apunchic Jesusta servircani. Mana cric israelcuna ñucata llaquichicpipish, llaquita apashpa huacarcanimi. 20Ñucaca cancunapac allipacmi huillacurcanilla, yachachicurcanilla. Chashnami tucuipac ñaupapipish, huasicunapipish huillacurcani. 21Israelcunamanpish, mana israelcunamanpish Diosman llaquirishpa cutirinamanta, Apunchic Jesucristota crinamantami huillarcani. 22Cunanca Diospac Espíritu yuyaita cucpimi, Jerusalenman ricuni. Chai pueblopi ima tucunataca mana yachanichu. 23Ashtahuanpish Diospac Espiritumi ñucataca: “Mai puebloman rishpapish, llaquitami apangui, carcelpi churashcami cangui” nishcallatami yachani. 24Huañuna cacpipish, ñucaca mana llaquirinichu, ashtahuancarin Dios cuyac cashcata Apunchic Jesús huillachun nishcatami huañuna punzhacaman cushicushpa pactachina cani.

25Taucacunamanmi Dios mandacucmanta huillashpa pasarcani. Chai uyaccunamantaca ñuca ñahuita mana ashtahuan ricunguichicchu. Chaica chashnatacmi canga. 26Chaimantami cunan caita huillasha nini: Maijan cancuna juchallapitac huañucpica, Diosca ñucataca mana juchanchingachu. 27Chaica, Dios huillachun nishcataca, mana pacashpami tucui huillarcani. 28Apunchic Jesusca paipac yahuarhuanmi, tandanacushca criccunataca randirca. Chaimanta cancunallatac alli yuyaihuan, tucui criccunata cuidanguichic. Diospac Espirituca cancunataca paicunata cuidashpa michic cachunmi churarca. 29Ñuca rishca quipaca shuccuna shamushpami, ovejacunata manchachishpa, caita chaita cachac shina, criccunata chingachinga. 30Cancunapuramantapish maijanca: “Ñucata catichic” nishpami, llullashpa huillanga. 31Chaimanta alli yuyaihuan caichic. Ñucaca quimsa huatacamanmi tutapish, punzhapish mana samarishpa, tucui cancunata shucllancaman huacashpa cunacurcani.

32Cunanca, Dios cuyashpa, pai rimashca shimicunahuan sinchiyachichunmi, cancunataca paiman mingani. Pai acllashcacuna japina cashcatapish, paillatacmi cunga. 33Ñucaca pipac cullquitapish, curitapish, churanatapish mana munarcanichu. 34Chaipac randica ñucamanpish, ñucahuan puriccunamanpish ima illashcata charingapacca, ñuca maquihuanmi trabajarcani. Chaitaca cancunallatac yachanguichicmi. 35Chashna trabajashpami huacchacunata ayudana canguichic. Chaitami yachachicurcanilla. Apunchic Jesusca: “Ayudacmi, chasquicta yalli cushicun” nircami. Chaita yuyaringuichic» nirca.

36Chaita nishca quipami, Pabloca tucui paihuan caccunahuan cungurishpa, Diosta mañarca. 37Chai quipaca, tucui chaipi caccunami Pablota ucllarishpa, muchashpa huacanacurca. 38Chaica, “ñucataca ña mana ashtahuan ricunguichicchu” nishcamantami llaquirishpa, barcocaman Pablohuan rircacuna.

Currently Selected:

HECHOS 20: QCA10

Highlight

Copy