HECHOS 22

1«Israel huauquicuna, taitacuna, ñuca rimashcata uyaichic» nirca.

2Hebreo rimaipi rimacpirin, ashtahuanmi upalla carcacuna. Chaimantami Pabloca: 3«Ñucaca Cilicia llacta Tarso pueblopi huacharishca, Israel runami cani. Shina cashpapish, cai Jerusalén pueblopimi huiñarcani. Ñucataca Gamalielmi allita yachachirca. Ñaupa taitacunaman mandashcacunata tucuita pactachicmi cani. Ima shinami cunan punzhacunapi cancuna tucui shunguhuan Diosta servicunguichic, chashnatacmi ñucapish servini. 4Ñucapish ñaupaca Jesusta caticcunata huañuchisha nishpami, huarmicunatapish, caricunatapish japishpa, carcelman apac carcani. 5Chaitaca, curacunata jatun mandac curapish, pushac yuyaccunapish yachanmi. Paicunallatacmi Damasco pueblo criccunata japishpa, cai Jerusalenpi llaquichingapac apamuchun, quillcata curcacuna. Chaimantami criccunata japimungapac chai puebloman rircani.

Ima shina cric tucushcata Pablo huillashcamanta

(Hch 9.1-19; 26.12-18)

6Chashna rishpa, Damascoman ña chayacucpimi, chaupi punzha shinataca cungailla jahua pachamanta relampa shina ñuca muyundita achicyachirca. 7Chashna tucucpi, pambaman urmashpaca: “Saulo, Saulo, ¿ima nishpatac ñucata piñashpa llaquichicungui?” nictami uyarcani. 8Chashna nicpimi ñucaca: “Amito, ¿pitac cangui?” nircani. Shina nicpica: “Ñucaca can llaquichicuc Nazaret pueblomanta Jesusmi cani” nirca. 9Ñucahuan riccunapish chai achicta ricushpa, yallita mancharircami. Shina ricushpapish, ñucata rimashcataca mana entendircachu. 10Chaipimi ñucaca: “Apunchic Jesús, ¿imatatac ruhuasha?” nircani. Shina nicpimi, Apunchic Jesusca: “Jatarishpa, Damasco llactaman ri. Chaipimi can ima ruhuana cashcataca huillanga” nirca. 11Chai achicyachicta, ricushca quipaca, imata mana ricui pudircanichu. Ñucahuan riccunami maquimanta aisashpa, Damascoman chayachircani.

12Chaipica, Moisés mandashcacunata alli cazuc, chaipi causac israelcunapacpish alli nishca Ananiasmi causacushca carca. 13Pai ñucapacman shamushpa, cuchuyashpaca: “Huauqui Saulo, cambac ñahui cutin ricuchun” nirca. Chai rato ñuca ñahui alli tucucpi, paitaca ricurcanillami. 14Chaipimi paica: “Ñucanchic ñaupa taitacunata Mandac Diosmi, pai munashcata yachachun, pai cachashca Jucha Illac Cristota ricuchun, pai rimashcatapish uyachunmi, cantaca ñaupaman acllashca. 15Canmi Jesusmanta uyashcatapish, ricushcatapish tucui gentecunaman huillangui. 16Cunanca mana unayashpa, jatarishpa bautizari. Cambac juchacunata Dios perdonashpa, chuyayachichun, Apunchic Jesusta mañai” nirca.

Mana israelcunapacman Jesús cachashcataPablo huillashcamanta

17Jerusalenman cutishpaca, Diosta mañana huasipi mañacushpami, muscuipi shina Apunchic Jesús ricurirca. 18Paica: “Cai Jerusalenmanta utca llucshishi. Can ñucamanta huillashcataca mana uyangacunachu” nirca. 19Chashna nicpimi ñucaca: “Apunchic Jesús, ñucaca canta criccunata tandanacuna huasicunapi llaquichishpa, carcelman apacmi carcani. Chaitaca tucuimi yachan. 20Canmanta huillac Estebanta llaquichishpa, huañuchicucpipish churanacunata cuidashpa: ‘Allitami ruhuacunguichic’ nishpami shayacurcani” nircani. 21Ashtahuanpish Apunchic Jesusca: “Rilla, ñucami cantaca caru llacta mana israelcunapacman cachagrini” nircami» nirca.

Pablota soldadocunata mandac charicushcamanta

22Pablo chaita ningacamanllami uyarcacuna. Quipata piñarishpaca: “¡Cai runaca mana causanachu can, ashtahuanpish huañunami can!” nishpa caparirca.

23Chashnami churanacunata chaspirishpa, allpahuan shitashpa caparircacuna. 24Chashna ruhuacpimi, soldadocunata mandacca Pablota cuartelman apashpa, imamanta chashna paita piñashpa, caparishcata huillangacaman macachun mandarca.

25Paita soldadocuna huatagricucpimi, Pabloca mandac soldadotaca:

—Roma llacta runataca, manarac imata tapushpaca, ¿macanallachu canga?— nirca.

26Chaimanta chai huaranga soldadocunata mandacpacman rishpaca:

—Chai runaca Roma llactamantami cashca. Cunanca, ¿imatac ruhuagringui?— nirca.

27Chashna nicpi, chai mandac Pablopacman cuchuyashpaca:

—¿Canca Roma llactamantachu cangui?— nirca.

Shina nicpimi Pabloca:

—Ari— nirca.

28Shina nicpica, chai mandacca:

—Ñucaca achca cullquihuanmi Roma llacta tucurcani— nirca.

Chashna nicpimi Pabloca:

—Ñucaca Roma llactapimi huacharircani— nirca.

29Chashna nicpica, chai macashun nic soldadocunaca Pablota saquishpa anchurircallami. Roma llactamanta cashcata yachashpaca, chai mandacpish Pablota huatachishcamanta mancharircami.

Mandaccunapura tandanacushcapacman Pablota apashcamanta

30Huaranga soldadocunata mandacca israelcuna imamanta Pablota huañuchigricushcata yachanata munashpami, cayandi punzhaca Israel curacunata mandac curacunatapish, tandanacushca mandaccunatapish tandachirca. Chashna tandachishpami, Pablotaca cadenahuan huatashcamanta cacharichishpa, paicunapac ñaupaman aparca.

Currently Selected:

HECHOS 22: QCA10

Highlight

Copy