HECHOS 27
27
Pablota Roma puebloman cachashcamanta
1Ñucanchicta Italia llactaman cachanata yuyarishpaca, Pablotapish, shuctac prezucunatapishmi pasac soldadocunata mandac Julioman cushpa cacharca. Paica jatun mandac Augustopac soldadocunapurami carca. 2Adramitio pueblomanta barcopimi huichicurcanchic. Chai barcoca Asia llacta puertocunamanmi ricushca carca. Macedonia llacta Tesalónica pueblomanta Aristarcopishmi ñucanchic-huan ricurca. 3Cayandi punzhaca Sidón pueblomanmi chayarcanchic. Chai pueblopimi mandac Julioca Pablota llaquishpa, paipac ricsishcacunapacman cacharca. Shinallatac Pablota ayudachunpish saquircami. 4Sidonmanta barcopi rishpaca, huaira ñaupamanta jarcacucpimi, Chipre islata muyushpa rircanchic. 5Cilicia llacta, Panfilia llacta chimba ladota rishpami, Licia llacta Mira puebloman chayarcanchic.
6Chaipimi pasac soldadocunata mandacca Alejandría pueblomanta Italia llactaman ric barcota japishpa, chaipi ñucanchicta huichicuchirca. 7Huaira ñaupamanta jarcacucpimi, allimantalla tauca punzhacunata rircanchic. Chashnami llaquita apashpa, tauca punzhacunapi Gnido pueblo chimba ladoman chayarcanchic. Huaira ashtahuan jarcacpimi, Salmón allpa ladota rishpa, Creta islata muyugrircanchic. 8Llaquita apashpami, “Alli puerto” nishcaman chayarcanchic. Chaica, Lasea pueblo cuchupimi carca.
9Tauca punzhacunatami unaiyarcanchic. Yacuta ashtahuan rinapish ña mana alli carcachu. Tamya punzhacunapish ñami chayamucurca. Chaimanta Pablo paicunata cunashpaca:
10—¡Tucui caipi caccuna, cai rinaca llaquimi cagrin! Cargacunapish, barcopish yacupi chingaringami. Ñucanchicpish huañushunmi— nirca.
11Patsac soldadocunata mandacca Pablo nishcata mana uyarcachu, ashtahuanpish barcota purichic, barcoyuc nishcatami ashtahuan cazurca. 12Tamya quillacunata chaipi cana mana alli cacpimi, tucui mashna Creta islapi cac Fenice puebloman ima shinapish chayanata yuyarinacurca. Chai pueblopica janamanta, huaira shamushpapish, mana imata ruhuacchu carca. Chaimantami tamya quillacunata chaipi canata munarca.
Mama cuchapi sinchi huaira jatarishcamanta
13Uramanta ashalla huaira tiyacpimi, ña rinalla cashcata yuyashpa, anclacunata tandashpa, ri callarircanchic. Chashna rishpaca, Creta llacta cuchullatami rircanchic. 14Chaita ricucpica, cungailla janamanta sinchi huaira shamushpami, barcota apai callarirca. 15Chashna apacpica, imata mana ruhuai pudircanchicchu. Chashnami barcoca huairapi ricurcalla. 16Chashnami Clauda nishca isla ladota pasacushpa, ashalla huaira cacpi, uchilla boteta, chutacushpalla huichicuchircanchic. 17Chaimantami barcota purichiccunaca, chai botetaca barco ama paquirichun, chai barco patapi huascahuan huatarca. Chai quipaca Sirte nishca tiyupi pambarinata manchashpami, barcota purichic lienzocunata tandashpa, huaira maita apashcata ringapac saquirca. 18Cayandi punzha yalli huaira cacpimi, cargata barcomanta yacupi shitai callarirca. 19Ña quimsa punzhata chashnallatac cacpimi, barcopi ima tiyashcacunatapish paicunallatac yacupi shitarca. 20Tauca punzhacunata intipish, lucerocunapish mana ricurishpa, yalli tamya huaira cacpimi, huañunalla cashcata yuyarcanchic.
21Unaita mana micushca cacpimi, Pabloca tucuipac chaupipi shayarishpaca:
—Tucui caipi caccuna, ñuca nishcata uyashca cashpaca, Creta islamanta mana shamunchicmanchu carca. Mana llaquita apanchicmanchu carca. Imatapish mana shitanchicmanchu carca. 22Shina cacpipish, manchaihuan ama llaquilla caichicchu, cancunaca shucllapish mana huañunguichicchu. Barcollami ucuyanga. 23Cunan tutami ñuca alli nina Diospac ángel ñucahuan carca. 24Chai angelmi ñucataca: “Pablo, ama manchaichu. Canca Roma llactata jatun mandac Cesarpacman chayanguimi. Canmantami tucui canhuan riccunatapish huañuimanta quishpichisha” nirca. 25Dios angelman huillachishca pactanata crinimi. Chaimanta ama manchaichicchu. 26Ñucanchicca shuc islamanmi, maipi cashpapish chayashun— nirca.
27Ña ishcai semanata, Adriático shuti mama cuchata huaira aparicucpimi, shuc tutaca barcota purichiccunaca ña allpaman chayacushcata yuyarca. 28Chaipi yacu jahuamanta tiyucaman medicpica, quimsa chunga sucta metromi cashca carca. Cutin ashata rishpa medicpica, ishcai chunga canchis metromi cashca carca. 29Yacu lado jatun rumipi huactarinata manchashpami, barcota charic chuscu anclacunata huashaman cacharishpa, ña punzhayamanlla nicurcacuna. 30Barcota purichiccunaca barcota shitashpa rinata munashpami barcota charic ñaupa anclacunata uricuchic tucushpa, boteta yacuman uricuchi callarirca. 31Chaimanta Pabloca pasac soldadocunata mandactapish, caishuc soldadocunatapish rimashpaca:
—Barcota purichiccuna shitashpa ricpica, cancunaca huañunguichicmi— nirca.
32Chashna nicpimi, soldadocunaca bote huatashca huasca pitishpa, boteta yacupi cacharca.
33Ña achicyamucpimi, Pabloca tucui chaipi caccunataca:
—Ishcai semanatami imata mana micushca, mana sueñushca canguichic. Imallatapish micuichic. 34Cancuna sinchi tucungapac micunami canguichic. Cancunamantaca shucllapish mana chingaringuichicchu. Shuc acchallapish mana chingaringachu— nirca.
35Chashna nishpami Pabloca tandata japishpa, tucui chaipi caccunapac ñaupapi Diosta pagui nishpa, chaupishpa micui callarirca. 36Chashna micucucpimi, tucui paicuna cushicushpa, micui callarirca. 37Chai barcopica, ishcai pasac canchis chunga suctami carcanchic. 38Ña mana nicta micushpaca, barco pangalla tucuchunmi trigota yacuman shitarcacuna.
Yacupi barco ucuyashcamanta
39Punzhayamucpica, barcota purichiccunaca maipi cashcata mana yacharcachu. Chashna mana yachashpapish barcota shayachinalla cacpimi, barcota cuchuyachinata munarca. 40Barcota charicuc anclacunata charicuc huascacunata pitishpami, chai anclacunataca yacupi saquirca. Barcota apac caspicunata cacharishpa, barcota purichic ñaupa lado lienzota jahuaman churashpami, barcota pataman cuchuyachi callarirca. 41Barco cuchuyacushpami, yacu ucu tiyupi ñaupa lado pambarirca. Chashna pambaricpimi, huashamanta yacu huactashpa, barcota paqui callarirca. 42Chaimantami soldadocunaca prezucuna yacupi huambushpa ama miticugrichun huañuchinata munarca. 43Chashna cacpimi, soldadocunata mandacca Pablota mana huañuchingaraicu huambunata yachaccunarac, huambushpa llucshichun, 44shuccunaca tablacunapi, barco paquirishca caspicunapi japirishpa llucshichun mandarca.
Chashnami tucui mana ima tucushpa, allpaman llucshircanchic.
Currently Selected:
HECHOS 27: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
