HECHOS 3

Suchu runata alliyachishcamanta

1Quimsa horas chishimi, Pedroca Juanhuan Diosta mañangapac Diosta mañana huasiman rirca. Chai horasmi mañana horas carca. 2Chaiman yaicuna Sumac nishca pungupimi, huacharishcamanta pacha suchu runa tiyacurca. Chai runataca chaiman yaicuccunaman imallatapish mañachunmi, chai punguman punzhanta apac carca. 3Chai runaca, Pedropish, Juanpish Diosta mañana huasiman yaicugricucta ricushpami imallatapish mañarca.

4Chaimanta Juanpish, Pedropish chai runata ricushpaca:

—¡Caita uyai!— nirca.

5Chashna nicpimi, chai runaca “imallata cungapishchari” yuyashpa, chaparacurca. 6Chashna chaparacucpimi Pedroca:

—Cullquitapish, curitapish mana charinichu. Chashna cashpapish ñuca charishcatami canman cuni. Nazaret pueblomanta Jesucristopac shutipimi, “jatarishpa puri” nini— nirca.

7Chashna nishpa, alli maquimanta japishpa jatarichicpica, chai runapac chaqui mucucunaca sinchiyarcami. 8Chaimantaca jatarishpa, puri callarircami. Chashnami paicunahuan Diosta mañana huasiman yaicushpa, cushicuihuan saltarishpa, Diostaca “allimari cangui” nirca. 9Tucui gentecunami pai puricuctapish, Diosta “allimari cangui” nicuctapish ricurca. 10Chai runataca Sumac nishca pungupi imallatapish mañashpa tiyacuctami ricuc carcacuna. Chaimantami pai alliyashcata ricushpaca, yallita mancharircacuna.

Salomonpac corredorpi Pedro huillashcamanta

11Pedropish, Juanpish ñaupa mandac Salomonpac corredorpi shayacucpimi, chai alliyashca runaca paicunamanta mana raquirisha nishpa shayacurca. Chaimantami tucui gentecuna mancharishpa, paicunapacman tandanacumurca. 12Pedro chaita ricushpaca: «Israelcuna, ¿caita ricushpachu mancharicunguichic? ¿Ima nishpatac ñucanchic ñahuita ricuracunguichic? Mana ñucanchic poderhuanchu alliyachishcanchic. Shinallatac mana Dios mañaccuna cashcallamantachu alliyachishcanchic. 13Ashtahuanpish ñucanchic ñaupa taita Abrahamta, Isaacta, Jacobota Mandac Diosmi, paipac Churi Jesús alli nishca cachun alliyachirca. Cancunaca chai Jesustami huañuchiccunaman japichircanguichic. Pilato, paita cacharisha nicucpipish, cancunaca mana cacharichun saquircanguichicchu. 14Jucha illac, cashcata ruhuac Runata cacharichun ninapac randica, huañuchic runatami cacharichun nircanguichic. 15Chashnami cancunaca huiñai causaita cuc Jesusta huañuchircanguichic. Ashtahuanpish paitaca Diosmi huañushcacunapuramanta causachirca. Ñucanchicca chai ricushcata huillaccunami canchic. 16Cai cancuna ricushca, ricsishca runaca Jesusta crishpami alliyashca. Paica Jesusta crishcamantami cancunapac ñaupapi alliyashca shayacun. Ima shina pai alliyashcataca cancunami ricucunchic.

17Israel huauquicunalla, cancunapish, cancunata mandaccunapish Jesús pi cashcata mana yachashcamanta huañuchishcatami yachani. 18Dios, pai ima nishcata huillaccunaman: “Quishpichic Cristoca llaquita apashpami huañunga” nishpa huillashca pactachunmi, chashnaca tucushca. 19Cancunapac juchacunata perdonachunca, llaquirishpa, Diosman cutirichic. Chashna ruhuacpimi, Diosca cushi causaita cushpa samachinga. 20Shinallatac ñaupaman cancunaman cachasha nishca Jesustapish paica cachangami. 21Dios tucuita mushucta ruhuangacamanmi Jesucristoca jahua pachapi cana can. Chashnami Diosca, jucha illac, pai ima nishca huillaccunaman huillachishca. 22Moisesca ñaupa taitacunataca: “Mandac Diosmi ñucata cachashca shina cancunapuramanta shuc huillacta cachanga. Pai tucui ima nishcata cazunguichic. 23Pipish chai huillacta mana cazucca, israelcunapuramanta llucchishcami canga” nishcami.

24Dios ima nishcata huillac Samuelmanta callarishpami, tucui huillaccuna cai punzhacunapi ima tucunamantaca huillashca. 25Cancunaca Dios ima nishcata huillaccunata huillachishcatapish, ñaupa taitacunahuan Dios ari nishcatapish chasquiccunami canguichic. Dios Abrahamhuan ari nishpaca: “Cambac huahua huahuacunamantami tucui cai pachapi causaccunaca bendiciashca canga” nishcami. 26Dios, paipac Churita causachishpaca, cancunaman allicunata cuchunmi, cancunapacman punta cacharca. Cancuna millai causaita saquishpa, alli causachunmi, cacharca» nirca.

Currently Selected:

HECHOS 3: QCA10

Highlight

Copy