HECHOS 4
4
Mandaccunapacman Pedrotapish, Juantapish apashcamanta
1Pedropish, Juanpish gentecunahuan parlacucpiracmi, Israel curacunapish, Diosta mañana huasita cuidaccunata mandacpish, saduceocunapish cungailla chayarca. 2Paicunaca Pedropish, Juanpish “Jesús huañushcacunapuramanta causarishpa, tucui huañushcacuna causarina cashcatami ricuchin” nishpa, yachachicushcamantami piñarirca. 3Chaimantami paicunata japishpa, cayandi tutamantacaman carcelpi churarca. Ña chishi cashcamantami chashna ruhuarca. 4Chashna cacpipish, paicuna huillashcata uyashpa criccunaca, pichca huaranga shina runacunami carca.
5Cayandi punzhaca Jerusalenpimi israelcunata mandaccunapish, pushac yuyaccunapish, mandashcacunata yachachiccunapish tandanacurca. 6Chaipimi curacunata mandac cura Anaspish, Caifaspish, Juanpish, Alejandropish, curacunata mandac curapac familiacunapish carca. 7Pedrotapish, Juantapish paicuna tandanacushca ñaupaman cayachishpaca:
—Cancunaca, ¿ima poderhuantac suchu runata alliyachircanguichic?— nirca.
8Chaimantami Pedroca Diospac Espirituhuan cashpa:
—Israelcunata mandaccunalla, pushac yuyaccunalla, 9cunan cancunaca shuc ungushcata alliyachishpa, allita ruhuashcamantami “¿ima shinatac alliyachircanguichic?” nishpa tapunguichic. 10Cancunapish, tucui israelcunapish caitami yachana canguichic. Chaica, cancuna chacatashpa huañuchishca, quipata Dios huañushcacunapuramanta causachishca, Nazaret pueblomanta Jesucristomi cai runataca alliyachishca. Chai alliyashca runami cancunapac ñaupapi shayacun. 11Huasita ruhuaccuna mana nishca rumimi huasita ruhuangapac callaripi churana, tucuimanta yalli alli rumica tucushca. 12Cai pachapi causaccunata quishpichichunca, Jesusllatami Diosca cacharca. Ñucanchicta quishpichicca, pi shuctac mana tiyanchu— nirca.
13Pedropish, Juanpish yachacungapacllapish mana rishca yangalla runacunami carca. Chashna cashpapish mana manchashpami, allita rimarca. Chaimantami chai mandaccunaca mancharishpa saquirirca. Chaimantami paicunaca Jesus-huan puriccuna cashcata yachac chayarcacuna. 14Chai alliyashca runapish paicunahuan shayacucta ricushpami, paicunataca imata mana juchanchishpa, upalla saquircacuna. 15Chaimanta paicunata canzhaman cachashpa, tandanacushca mandaccunapura 16parlanacushpaca:
—Cai runacunataca, ¿imatatac ruhuanchic? Paicuna mancharina milagrocunata ruhuashcataca, Jerusalenpi causaccunapish tucuimi alli yachancuna. Chaitaca mana negai pudinchicchu. 17Chashna cacpipish, caicuna ama shuctac llactacunapi yacharichunca: “Cunanmanta pacha pacta piman chai Jesusmanta huillanguichicman” nishpa manchachishun— ninacurca.
18Chai quipa, paicunata cayashpaca:
—Chai Jesusmanta ama rimanguichicchu, ama yachachinguichicchu— nirca.
19Shina nicpi, Juanpish, Pedropish rimashpaca:
—Cancunallatac alli yuyarichic. Diosmanca, ¿paita cazunata saquishpa, cancunata cazunachu ashtahuan alli canga? 20¡Ñucanchicca, ñucanchic ricushcata, uyashcata huillanataca manatac saquishunchu!— nirca.
21Pedropish, Juanpish chai runata alliyachishcamantaca tucui gentecunami Diosta “allimari cangui” nircacuna. Chaimantami mana juchanchipac cacpi, cacharircalla. 22Chai alliyashca runaca, chuscu chunga huata yallitami charirca.
Criccuna Diosta mañashcamanta
23Mandaccuna paicunata ña cacharicpica, Pedroca Juanhuanmi caishuc criccunapacman rishpa, curacunata mandac curacunapish, pushac yuyaccunapish ima nishcata tucui parlarca. 24Chashna parlacpi, tucui criccuna shuc yuyailla Diosta mañashpaca: «Mandac Dioslla, canmi jahua pachatapish, cai pachatapish, mama cuchatapish, chaicunapi tucui ima tiyactapish ruhuarcangui. 25Canmi, canta servic Davidman yuyaita cushpaca:
“Mana israelcunaca,
¿ima nishpatac chashna piñarin?
¿Ima nishpatac yangallata
ruhuashun nincuna?
26Cai pachapi jatun mandaccunapish,
llactata mandaccunapish
Mandac Diosta piñashpa,
pai cachashca Quishpichic Cristota
piñashpa macashun nishpami
tandanacun” nishcami.
27Chashna nishca shinami, cai pueblota mandac Herodesca Poncio Pilatohuanpish, israelcunahuanpish, mana israelcunahuanpish jucha illac Jesusta llaquichingapac tandanacurca. Diosmi Jesustaca Cristo cachun cacharca. 28Chashnami can ñaupaman alli yachashpa, chashna tucuchun nishcata pactachirca. 29Cunanca Mandac Dioslla, paicuna manchachishpa, jarcashcata ricuiyari. Can mandashcacunata mana manchashpa, huillangapac sinchiyachiyari. 30Can quishpichichun cachashca Jesus-huan ungushcacunata alliyachichun, milagrocunata ruhuachun ñucanchicta ayudaiyari. Canca imatapish ruhuacllami cangui» nishpa mañarcacuna.
31Chashna mañashca quipaca, paicuna tandanacushpa tiyacuc huasica chucchurcami. Diospac Espíritu paicunapi junda cacpimi, mana manchashpa, Diosmanta huillarcacuna.
Tucui ima charishcacunapish tucuipac cashcamanta
32Criccunaca achca cashpapish, tucuimi shuc shungulla, shuc yuyailla carcacuna. Pi “caica ñucapacmi, chaica cambacmi” mana ninacucchu carca. Chaimantami ima charishcacunapish tucuipac carca. 33Apostolcunaca mana manchashpami, Apunchic Jesús causarishcata shungupi yaicucta huillarca. Diosca criccunata yallita cuyashpami, allicunata tucuiman yallita curca. 34Chashna cacpimi, paicunapurapica maijanpish ima illaclla mana causarca. Maijanpish chariccunaca allpacunatapish, huasicunatapish catushpami, 35cullquitaca apostolcunaman cuc carca. Chaitaca mana chariccunamanmi imalla illashcata randichun cuc carca. 36Chipre llactamanta curacunata ayudac levita Josepish, criccunahuanmi carca. Paitami apostolcunaca Bernabeta shutichirca. Bernabé nishpaca: “Cushichic runa” nisha ninmi. 37Chai runaca pai charishca allpata catushpami, chai cullquitaca apostolcunaman curca.
Currently Selected:
HECHOS 4: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
