HECHOS 5

Ananiasmantapish, Safira huarmimantapish

1Ananías, paipac huarmi Safirami tiyarca. Paicunami allpata caturca. 2Chashna catushpami, huarmihuan huillanacushpa, chaupi cullquita saquichishpa, apostolcunaman curca. 3Chaimantami Pedroca Ananiastaca:

—Ananías, ¿ima nishpatac Satanasta cambac shungupi yaicuchun saquishpa, Diospac Espirituman llullashpa, allpa catushca cullquita mana tucui apamungui? 4¿Manachu allpaca cambac carca? ¿Manachu catushca cullquipish cambac tucurca? ¿Ima nishpatac cambac shungupi chashna millaita ruhuanata yuyarircangui? Mana runacunallamanchu llullangui, Diosmanmi llullangui— nirca.

5Chaita uyashcahuanmi, Ananiasca chaillapitac huañurca. Tucui chaita uyaccunami yallita mancharirca. 6Ananiaspac cuerpotaca mosocunami pilluchishpa, enterrangapac aparca.

7Quimsa horas shina quipami, paipac huarmi Safiraca chayarca. Paipac cusa ima tucushcataca mana yacharcachu. 8Chaipimi Pedroca:

—Cancunaca chai allpataca, ¿chaillapichu caturcanguichic? Chaita huillai— nirca.

Shina nicpimi, chai huarmica:

—Ari, chaillapimi caturcanchic— nirca.

9Shina nicpimi Pedroca:

—¿Ima nishpatac Mandac Diospac Espirituman llullanata yuyarircanguichic? Riqui, ñami canzha punguta cambac cusata enterraccuna yaicumucun. Cunan cantapish chashnallatacmi apangacuna— nirca.

10Pedro chashna nincami, chai huarmica chaillapitac huañurca. Cusata enterrac mosocuna ucuman yaicucpica, chai huarmipish huañushcami cashca carca. Chaimantami paitapish, cusa maipi enterrashcallapitac enterrangapac aparcacuna. 11Chaita yachashpaca, tandanacushca criccunapish, tucui uyaccunapish yallitami mancharirca.

Mancharina milagrocunata ruhuashcamanta

12Apostolcunaca israelcunapurapica milagrocunatapish, mancharinacunatapish taucatami ruhuarca. Tucui criccunami Salomonpac corredorpi shuc yuyailla tandanacuc carca. 13Shuctac gentecunaca paicunahuan tandanacunata mana munarcachu. Chashna cacpipish, chai pueblopi causaccunaca, tucuimi crishpa, paicunata allimi nircacuna. 14Caricunapish, huarmicunapish Apunchic Jesusta crishpa, ashtahuanmi achca criccuna tucurca. 15Shinallatac Pedro llandushpallapish alliyachichunmi, gentecunaca ungushcacunataca huandumushcacunandi ñanman apashpa churarca. 16Cuchulla pueblocunamantami ungushcacunatapish, millai supai llaquichishcacunatapish Jerusalenman apamurcacuna. Chai ungushcacunaca tucuimi alliyarca.

Juantapish, Pedrotapish llaquichishcamanta

17Chaimantami Israel curacunata mandac curapish, paihuan cac saduceocunapish envidiashpa piñarirca. 18Shinami apostolcunataca japishpa, carcelpi churarca. 19Chashna churacpipish, Dios cachashca ángel tuta shamushpa, cárcel punguta pascashpa, paicunata llucchishpaca: 20«Cunanca, Diosta mañana huasiman yaicushpa, tucui uyaccunaman: “Jesucristoca mushuc causaita cucmi” nishpa, huillangapac richic» nirca.

21Ángel chashna nicpimi, tutamanta, Diosta mañana huasiman rishpa, yachachi callarirca. Chaimantami curacunata mandac curaca tucui paihuan caccunahuan rishpa, tucui israelcunata pushac yuyaccunatapish, mandaccunatapish tandachirca. Chai quipami, apostolcunata carcelmanta apamuchun cacharca. 22Soldadocuna carcelman chayashpaca, paicunata mana tarircachu. Chaimanta huillangapac cutimushpaca: 23«Ñucanchic chayashpaca, cárcel pungucuna alli huichcashcata, shinallatac soldadocunapish pungucunapi cuidacushcatami ricurcanchic. Cárcel punguta pascashpa yaicushpaca, pita mana tarircanchicchu» nirca.

24Chashna huillashcata uyashpaca, curacunata jatun mandac curapish, Diosta mañana huasita cuidaccunata mandacpish, curacunata mandac curacunapish caishuc chaishuc parlanacushpaca: “Chai runacunaca, ¿imashi tucushca canga?” nishpami tapunacurca. 25Paicuna chashna tapunacucucpica, cungailla shuc runa chayamushpaca: «Cancuna carcelpi huichcashca runacunaca, Diosta mañana huasipimi tucui gentecunaman yachachicun» nishpa huillarca.

26Chaimantami soldadocunata mandacca soldadocunahuan cutin apostolcunata japingapac rircacuna. Chashna rishpaca, chaipi cac gentecuna rumihuan shitanata manchashpami, mana imata ruhuashpa, sumacta apamurcacuna. 27Paicunata apamushpaca, tandanacushca mandaccunapac ñaupamanmi chayachirca. Chaipi, curacunata mandac cura paicunata tapushpaca:

28—¿Manachu ñucanchicca chai runamanta ama cutin yachachun mandarcanchic? Chashna nishca jahuami tucui Jerusalenpi yachachishcanguichic. Jesús huañushcamantapish ñucanchictami juchanchinguichic— nirca.

29Shina nicpi, Pedropish, caishuc apostolcunapish rimashpaca:

—Runacunata cazunapac randica, Diostami cazuna canchic. 30Cancunami Jesustaca chacatashpa huañuchircanguichic. Shina huañuchicpipish, ñucanchic ñaupa taitacunapac Mandac Diosmi paitaca causachirca. 31Chashnami Diosca paitaca tucuita Mandac cachunpish, Quishpichic cachunpish, paipac alli maquiman tiyachirca. Israelcuna juchayuc cashcamanta llaquirishpa, Diosman cutiricpi, juchacunata perdonangapacmi chashnaca ruhuarca. 32Ñucanchicca cai tucui uyashcatapish, ricushcatapish huillaccunami canchic. Diospac Espiritupish cai tucuita huillacunmi. Diosca paita cazuccunamanmi paipac Espiritutaca cushca— nirca.

33Shina nicta uyashpami, chai mandaccunaca piñarishpa, huañuchinata munarcacuna. 34Ashtahuanpish tandanacushca mandaccunapuramanta fariseo Gamalielca apostolcunata canzhaman llucchichun mandarca. Gamalielca tucuipac alli nishcami carca. Shinallatac Moisés mandashcacunata alli yachachicmi carca.

35Ña llucshicpica, mandaccunataca:

—Israel runacuna, cai runacunata imata ruhuagricushcataca alli yuyarichic. 36Sarun punzhacunapi ima tucushcataca, alli yuyarichic. Teudas runaca: ‘Mandacmi cani’ nishpami, chuscu patsac shina caticcunata charirca. Shina cacpipish, paita huañuchicpica, tucui paita caticcunaca caita chaita rishpami chingarirca. Pai yachachishcapish tucuimi chingarirca. 37Shinallatac shuticunata quillcachina punzhacunapipish, Galilea llactamanta Judasmi yachachi callarirca. Paitapish taucacunami catircacuna. Shina cacpipish, paita huañuchicpica, tucuimi caita chaita rishpa chingarirca. 38Chaimantami cai yuyaita cuni: Cai runacunataca ama imata ruhuashpa saquichiclla. Paicuna yachachishcapish, imata ruhuacushcapish paicunapac yuyailla cacpica, chingaringallami. 39Ashtahuanpish paicuna yachachishca Diosmanta cacpica, mana jarcai pudinguichicchu. Pacta Diospac munaita jarcashun nicunguichicman— nirca.

40Gamaliel chashna nishcata uyashpami, apostolcunataca cutin yaicuchishpa azotichirca. Chashna azotichishpami ama cutin Jesusmanta huillachun mandashpa cacharca. 41Mandaccuna cacharicpi, apostolcuna llucshishpaca, Jesusta caticushcamanta Dios llaquichichun saquishcamantami yallita cushicushpa rircacuna. 42Shinallatac paicunaca Diosta mañana huasipipish, mai huasicunapipish punzhantami yachachishpa, Jesucristomanta alli huillaita huillacurca.

Currently Selected:

HECHOS 5: QCA10

Highlight

Copy