HECHOS 6
6
Canchis diaconocunata acllashcamanta
1Chai punzhacunapica, achca gentecunami Jesusta crishpa mirarirca. Chaimantami griego rimaita rimaccunaca hebreo rimaita rimaccunata “ñucanchic viuda huarmicunaman punzhanta imalla illashcataca mana alli chaupicunguichicchu” nishpa, rimai callarirca. 2Chaimantami chunga ishcai apostolcuna criccunata tandachishpaca:
—Diosmanta huillanata saquishpa, micunata ñucanchic raquinaca, mana allichu. 3Chaimanta, micunata tucuiman raquichunca cancunapuramanta alli yachac, alli causac, Diospac Espíritu junda, canchis runacunata acllaichic. 4Paicuna chaita ruhuacucpica, ñucanchicca Diosta mañanatapish, paimanta huillanatapish mana saquishunchu— nirca.
5Paicuna chashna nishcaca, tucui criccunapac yuyaipi allimi carca. Chaimantami Estebanta acllarca. Paica Diospac Espirituhuan cashpami, alli cric carca. Shinallatac Felipetapish, Procorotapish, Nicanortapish, Timontapish, Parmenastapish, israelcuna yachachishcata catic, Antioquía pueblomanta Nicolastapishmi acllarca. 6Chashna acllashpami apostolcunapacman pushamurca. Paicunaca chai runacunapac uma jahuapi maquita churashpami, Diosta mañarcacuna.
7Ashtahuanmi Diospac shimita Jerusalenpi huillashpa catirca. Jesusta criccunapish ashtahuanmi mirarishpa catirca. Shinallatac Israel curacunapish, achcacunami Jesusta crircacuna.
Estebanta prezu japishcamanta
8Diosca Estebanta cuyashpami, milagrocunatapish, mancharinacunatapish israelcunapurapi ruhuachun poderta curca. 9Chaimantami, maijan “Servic cashcamanta cacharichishca” nishcacunapish, Cirene pueblomanta, Alejandría pueblomanta, Cilicia llactamanta, Asia llactamanta runacunapish Estebanhuan rimari callarircacuna. 10Ashtahuanpish Diospac Espíritu yuyaita cushpa, Estebanta rimachicpimi, chai runacunaca mana ati pudircacuna. 11Chaimantami maijanman cullquita pagashpa: “Cancunaca: ‘Ñucanchicca cai runataca Moisestapish, Diostapish camishpa rimactami uyarcanchic’ nichun” mañarcacuna. 12Paicuna chashna llullacpimi, israelcunata pushac yuyaccunapish, mandashcacunata yachachiccunapish, tucui chaipi caccunapish Estebanta piñai callarirca. Chaimantami paita japishpa, tandanacushca mandaccunapacman aparcacuna. 13Chaipimi llullac huillaccunaca:
—Cai runaca Diospac huasitapish, Moisés mandashcacunatapish rimactami uyarcanchic. 14Shinallatac Nazaret pueblomanta Jesusca, Diosta mañana huasitapish urmachingami. Moisés ñucanchicta yachachishcatapish chingachishpa, shuclayatami yachachinga nictami uyarcanchic— nirca.
15Chaipi tucui tiyacuc mandaccuna Estebanta ricushpaca, paipac ñahuica ángel shina cashcatami ricurcacuna.
Currently Selected:
HECHOS 6: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
