HECHOS 7

Mandaccunahuan Esteban rimashcamanta

1Curacunata mandac curaca Estebantaca:

—Canmanta chashna huillashcaca, ¿chashnatacchu?— nirca.

2Chaimantami Estebanca:

—Huauquicuna, taitacuna, ñuca rimashcata uyaichic: «Poderyuc Diosmi ñucanchic ñaupa taita Abraham manarac Harán pueblopi causangapac ricpi, Mesopotamia llactapi cacpi ricurirca. 3Chaipi ricurishpami Diosca: “Cambac llactatapish, cambac familiatapish saquishpa llucshi. Can maiman rina cashcataca, ñucami ricuchisha” nirca. 4Chaimantami Abrahamca Caldea llactamanta llucshishpa, Harán pueblopi causangapac rirca. Paipac taita huañushca quipami, Diosca cunan cancuna causacuc llactaman pushamurca. 5Diosca chai llactapica, allpataca chaqui saruillatapish mana curcachu. Shina cacpipish, Diosca: “Canmanpish, cambac huahua huahuacunamanpish allpata cushami” nishpami ari nirca. Abraham manarac huahuata charicpimi, chashna nirca. 6Diosca Abrahamtaca: “Cambac huahua huahuacunaca shucpac llactapi pozashpallami causanga. Chai llactapimi chuscu patsac huatata servishpa, llaquilla causanga” nirca. 7Shina cacpipish Diosca: “Servichishpa chariccunataca llaquichishami. Chai quipaca, chai llactamanta llucchishpami, cai llactapi ñucata servingacuna” nircami. 8Diosca circuncisionta ruhuachunmi Abrahamhuan ari ninacurca. Chaimantami Abrahamca paipac churi Isaac pusac punzhata charicpi, circuncisionta ruhuarca. Isaacpish chashnallatacmi paipac churi Jacobotaca ruhuarca. Jacobopish paipac chunga ishcai churicunatapish chashnallatacmi ruhuarca. Chaicunaca ñucanchic ñaupa taitacunami carca.

9Jacobopac churicunaca paicunapac huauqui Joseta piñashpami, Egipto llactaman catushpa cacharca. Diosca Josehuanmi carca. 10Diosca tucui llaquimantami Josetaca cuidarca. Shinallatac Egipto llactata jatun mandacpac ñaupapi alli cachunpish, alli yuyaitami curca. Chaimantami chai jatun mandacca paipac huasipipish, tucui Egipto llactapipish mandachun churarca.

11Egipto llactapipish, cai Canaán llactapipish ima mana pucucpi, yalli yarcaimi tiyarca. Chaimantami llaquihuan carcacuna. Ñucanchic taitacunapish cai llactapica, ima micunata mana charircachu. 12Jacoboca, Egipto llactapi trigo tiyashcata uyashpami, paipac churicunataca punta chai llactaman cacharca. 13Ishcai cutin huauquicuna Egiptoman ricpimi, Joseca, pai pi cashcata huauquicunaman huillarca. Chaimantami mandac Faraonca José maijan aillumanta cashcata yachac chayarca. 14Chai quipami, Joseca paipac taita Jacobotapish, paipac familiacunapish pushachun cacharca. Paicunaca canchis chunga pichcami carca. 15Chaimantami taita Jacoboca Egipto llactapi causangapac rirca. Chaipimi paipish, paipac churicunapish huañurca. Paicunaca ñucanchic ñaupa taitacunami carca. 16Unai huatacuna quipami paicunapac tullucunataca Siquem llactaman apamurca. Chai Siquem llactapimi, Abrahamca Hamorpac churicunaman enterrana allpata randishca carca. Chaipimi chai tullucunataca enterrarca.

17Dios Abrahamman llactata cungapac ari nishca punzhacuna pactamugricpimi, israelcunaca Egipto llactapi mirarishpa, achca tucurca. 18Chai punzhacunapimi, Joseta mana ricsic jatun mandac Egiptota mandai callarirca. 19Chai mandacmi ñucanchic taitacunata umashpa llaquichirca. Ama ashtahuan mirashpa catichunmi, cari huahuacuna huacharicpica, maipi shitachun mandarca. 20Chai punzhacunapimi Moisesca huacharirca. Paica Diospac alli nishcami carca. Quimsa quillatami paipac taita mamaca huasipi pacashpa charirca. 21Chai huahuata huañuchun shitashcatami mandac Faraonpac ushi tarishpa, quiquin huahuata shina huiñachirca. 22Shinami Moisesca Egipto llactapi ima yachanacunatapish alli yachachishca huiñarca. Chaimantami rimangapacpish, imata ruhuangapacpish alli yachac carca.

23Moisés chuscu chunga huatata charishpami, paipac aillu israelcunata ricugrinata munarca. 24Chashna rishpami, shuc Egipto runa, Israel runata macacucta ricushpa, Israel runata misashpa, Egipto runata huañuchirca. 25Moisesca ‘Israel aillucunaca ñucatami Diosca millai runacunapac maquimanta cacharichichun cachashcata entendingami’ yuyarcami. Ashtahuanpish paicunaca mana chashna entendircachu. 26Quipa punzha ricungapac rishpa, israelcunapurallatac macanacucucta ricushpaca: “Cancunaca huauquindimi canguichic. ¿Ima nishpatac cashna macanacucunguichic?” nirca. 27Chashna nicpi, chai macac runaca Moisesta tangashpaca: “¿Pitac cantaca mandachun, juez cachun churarca? 28¿Caina Egipto runata huañuchishca shinachu, ñucatapish huañuchisha ningui?” nirca. 29Chaita uyashpami, Moisesca Madián llactaman miticushpa rirca. Chai caru llactapi causacushpami, ishcai churicunata charirca.

30Chuscu chunga huatata chai llactapi causacushpami, Moisesca Sinaí urcu cuchulla shitashca pambapi, shuc zarza yura rupacucta ricurca. Chai rupacuc yura chaupipica, shuc angelmi ricurirca. 31Moisés mancharishpa, ricungapac cuchuyacucpi, Mandac Dios rimashpaca: 32“Ñucaca cambac taita Abrahampac, Isaacpac, Jacobopac Diosmi cani” nishcatami uyarca. Chaimantami Moisesca manchaihuan chucchushpa, mana ashtahuan cuchuyanata munarca. 33Chaimantami Mandac Diosca: “Can shayacuc pambaca ñucapaclla saruna allpami. Chaimanta cambac ushutata llucchi. 34Egiptopi ñuca acllashca israelcuna llaquihuan causacuctami ricuni. Paicuna huacacuctapish uyanimi. Chaimantami llaquimanta llucchingapac shamurcani. Cunanca shamui, cantami Egiptoman cachagrini” nirca.

35Chai Moisestami israelcunaca Egiptopica: “¿Pitac cantaca mandac cachun, juez cachun churarca?” nishpa, piñarishca carca. Ashtahuanpish paicuna piñashca Moisesllatatacmi, Diosca zarza yurapi ricuric angelta rimachishpa, mandac cachun, Egiptomanta israelcunata llucchic cachun churarca. 36Chai Moisesmi israelcunata Egiptomanta mancharinacunata ruhuashpa, Puca Cucha chaupita llucchimurca. Shinallatac shitashca pambapipish chuscu chunga huatatami carca. 37Chai Moisesllatacmi israelcunataca: “Cancunata Mandac Diosca ñucata cachashca shinami, cancunapuramanta shuc huillacta cachanga. Pai ima nishcata cazunguichic” nirca. 38Chai Moisesllatacmi shitashca pambapi ñaupa taitacunahuan carca. Paillatacmi Sinaí urcupi ángel rimashcata ñaupa taitacunaman huillangapac apamurca. Chai rimashcacunaca causaita cuc rimaicunami.

39Chashna cacpipish, ñaupa taitacunaca Moisés yachachishcataca mana cazushun nishpami, piñarishpa, Egiptollamantac cutinata munarcacuna. 40Chaimantami Moisespac huauqui Aarontaca: “Ñucanchicta Egiptomanta llucchimuc Moisesca mana uyarinchu. Cunanca ñucanchicta pushac dioscunata ruhuai” nirca. 41Chashna nishpami, beciman riccha diosta ruhuashpa, chaicunaman animalta huañuchishpa rupachishpa cushicurca. 42Chaimantami Diosca quiquin munaita ruhuashpa, lucerocunatapish adorachun saquishpa, paicunamanta caruyarca. Dios ima nishcata huillaccuna quillcachishpaca:

“Israelcuna, cancuna

chuscu chunga huatata

shitashca pambapi cashpa,

animalta rupachishpaca,

mana ñucamanchu curcanguichic.

43Ashtahuanpish ruhuashcalla

Moloc diostami adorashpa,

pai tiyanandi huandushpa purircanguichic.

Renfán nishca

diospac lucerocunatapish,

cancunallatac ruhuashpami

adorarcanguichic.

Chaimantami cancunataca

cai llactamanta llucchishpa,

Babilonia llactata pasachishpa,

ashtahuan caruman cachasha” nishcami.

44Ñaupa taitacuna shitashca pambapi cashpaca, Dios-huan tupana huasita huandushpami, puric carca. Chai carpa huasitaca Dios Moisesman ricuchishca shinami ruhuashca carca. 45Ñaupa taitacunami chai huasitaca paicunapac ñaupa taitacunamanta japishca carca. Tauca huata quipami, Josué paicunata pushamucpi, chai shitashca pambamantaca cai cunan ñucanchic causacuc llactaman apamurca. Ñucanchic taitacuna cusha nishca llactapi causachunmi, Diosca chai mana israelcunataca llucchishpa cacharca. Chai huasitaca David mandac tucungacamanmi charircacuna. 46Mandac Davidmi Dios cuyashca cashpa, taita Jacobo alli nina Mandac Diospac huasita ruhuangapac mañarca. 47Davidpac churi Salomonmi Diosta mañana huasitaca ruhuachirca. 48Shina cacpipish, jahua pacha Diosca gentecuna ruhuashcalla huasicunapica mana causanchu. Dios ima nishcata huillaccuna quillcachishpaca:

49“Jahua pachaca

ñuca mandashpa tiyarinami.

Cai allpaca

ñuca chaqui sarunami.

¿Imalaya huasitatac ruhuagringui?

¿Maipitac samarisha?

50Ñucallatacmi tucui

tiyashcatapish ruhuarcani” ninmi.

51Rumi shungu gentecuna, Dios ima nishcata mana cazuccunami canguichic. Cancunapac ñaupa taitacuna shinami, Diospac Espiritutapish mana cazunguichic. 52Ñaupa taitacunaca, Dios ima nishcata huillaccunata mana ricushun nishpami llaquichirca. Paicunami shamuna cashca Jucha illac, imatapish cashcata ruhuacmanta huillaccunata huañuchircacuna. Chai Jucha illac shamucpica, millai runacunaman cushpami huañuchircanguichic. 53Dios mandashcacunata angelcuna cancunaman cucpipish, mana cazunguichicchu» nirca.

Estebanta huañuchishcamanta

54Esteban chashna nicpimi, chai mandaccunaca quirucuna canirishpa, yallita piñarirca. 55Ashtahuanpish Diospac Espíritu junda cashpami, Estebanca jahua pachata huichailla ricushpa, Diospac sumaimana cashcatapish, Apunchic Jesús paipac alli lado maquiman shayacuctapish ricurca. 56Chashna ricushpami, Estebanca: «Ñucaca jahua pacha pascarishpa, Runa Tucungapac shamushca Jesús Diospac alli lado maquiman shayacuctami ricuni» nirca.

57Chashna nishcata mana uyashun nishpami, ringrita taparishpa caparircacuna. Chaimantaca huaicashpami, Estebanta japirca. 58Chashna japishpami pueblomanta llucchishpa, huañuchingapac rumicunahuan shitai callarirca. Shina shitacucpimi, Estebanta juchanchishpa huillaccunaca paicunapac jahualla churanacunata surcushpa, Saulo mosoman mingarca. 59Chashna rumicunahuan shitacucpimi, Estebanca: «Apunchic Jesús, ñuca almata pushaiyari» nishpa mañarca.

60Esteban cungurishpaca: «¡Apunchic Jesús, paicuna cai mana allita ruhuashcamanta ama juchanchinguichu!» nishpami caparirca. Chashna nishpaca huañurcallami.

Currently Selected:

HECHOS 7: QCA10

Highlight

Copy