LUCAS 19

Jesús Zaqueohuan parlashcamanta

1Jesús Jericoman yaicushpaca, chai pueblo chaupitami ricurca. 2Chaipimi impuestota japiccunata mandac, chayuc Zaqueo shuti runa causarca. 3Zaqueo runaca Jesús pi cashcata yachangapacmi ricunata munarca. Shina cashpapish, pai uchilla cashcamanta, tauca gentecuna Jesus-huan ricushcamantami mana ricui pudirca. 4Chaimantami ñaupata callpa rishpa, Jesusta ricungapac sicómoro yuraman huichicurca. Jesusca chaitami rina carca. 5Jesús chaita pasacushpa, yura jahuata huichailla ricushpaca:

—Zaqueo, utca uricui. Cunanca cambac huasipimi pozangapac rina cani— nirca.

6Chaimantami Zaqueoca utca uricushpa, cushilla Jesusta paipac huasiman pushashpa rirca. 7Chaita gentecuna ricushpa piñarishpaca:

—Caica, juchasapa runapac huasimanmi yaicun— nishpami, rimarca.

8Zaqueo jatarishpaca:

—Apunchic Jesús, ñuca charishcacunamanta chaupitami huacchacunaman cugrini. Maijanmanta umashpa shuhuashcataca chuscu cutin yallihuanmi cutichigrini— nirca.

9Chashna nicpimi Jesusca:

—Canpish Abrahampac huahua huahuami cangui. Chaimantami cunan punzha quishpirinaca cai huasiman chayamushca. 10Runa Tucungapac shamushca ñucaca, chingarishcacunata mashcashpa, quishpichingapacmi shamurcani— nirca.

Chunga cullquihuan chimbapurashpa parlashcamanta

(Mt 25.14-30)

11Jesús Jerusalenman chayagricushpaca, gentecuna: “Dios mandanaca ñami chayamugrin” yuyacucta yachashpami chimbapurashca parlohuan parlarca. Pai chashna parlashpaca: 12«Shuc alli mandacmi paipac llactata mandanata chasquishpa, cutingapac caru llactaman rirca. 13Pai manarac rishpa, chunga paita serviccunata cayashpa, chunga cullquita cushpaca: “Ñuca cutingacaman, cai cullquihuan randishpa, catushpa” nirca. 14Pai ña ricpica, chai llacta gentecuna paita piñashpa: “Cai runa ñucanchicta mandachunca, mana munanchicchu” nichun, huillaccunata quipata cacharca. 15Chashna nishpa cachacpipish, chai runaca mandac tucurcami. Pai cutimushpaca, chai saquishca cullquicunamanta mashna mirachishcata yachangapacmi, tucui chunga serviccunata cayachun cacharca. 16Chaimantami punta shamuc runaca: “Amito, can saquishca cullquitaca, chunga cutinhuanmi mirachircani” nirca. 17Chashna nicpimi chai mandacca: “Allimi, allitami ruhuashcangui. Ashallatapish, alli ruhuashcamantaca chunga pueblocunatami mandachun cugrini” nirca. 18Cutin shuc shamushpaca: “Amito, can saquishca cullquitaca, pichca cutinhuanmi mirachircani” nirca. 19Chashna nicpimi, chai mandacca: “Canca pichca pueblocunatami mandangui” nirca. 20Cutin shuc shamushpaca: “Amito, caipimi cambac cullqui. Quipishpami huacaichircani. 21Chaica, canca piñami cangui. Manapish cushpa chasquiclla, manapish tarpushpa cosechacmi cangui. Chaimantami chashna ruhuarcani” nirca. 22Chashna nicpimi chai mandacca: “Mana allita ruhuac servicmi cangui. Chashna nishpaca, canllatacmi llaquita apangui. Ñuca cashcatapish, manapish cushpa chasquiclla cashcatapish, manapish tarpushcata cosechaclla cashcatapish yacharcanguimi. 23¿Chaita yachashca jahuachu ñuca saquishca cullquitaca bancollapipish mana churarcangui? Ñuca cutimushpaca, interes cullquindimi chasquiman carcani” nirca. 24Chashna nishpami, chaipi caccunataca: “Cai runamanta ñuca cushca cullquita quichushpa, chai chunga cullquita charicman cuichic” nirca. 25Chashna nicpimi chai runacunaca: “Amito, paica ñami chunga cullquita charin” nirca. 26Chashna nicpimi, chai mandacca: “Ñucaca ninimi: Charicmanmi, ashtahuan cushca canga. Mana charicmantaca, ashallata charishcatapish quichushcami canga. 27Cutin, ñucata piñashpa mana mandac cachun munaccunataca apamushpa, ñuca ñaupapi huañuchichic” nircami» nirca.

Jesús Jerusalén puebloman yaicushcamanta

(Mt 21.1-11; Mr 11.1-11; Jn 12.12-19)

28Chashna nishca quipami, Jesusca yachacuccunapac ñaupata Jerusalenman rirca. 29Betfagé pueblo, Betania pueblo cuchulla, Olivos urcumanmi chayarca. Chaimanta Jesús paipac ishcai yachacuccunata cachashpaca:

30—Chimba, chai uchilla llactaman richic. Chaiman chayashpaca, pi manarac montashca shuc burro huatashca shayacuctami ricunguichic. Chai burrota cacharishpa apamugrichic. 31Maijan: “¿Imapactac aparicunguichic?” nicpica: “Apunchic Jesusmi apamuchun cachan” ninguichic— nirca.

32Yachacuccuna rishpaca, Jesús nishca shinallatacmi burro shayacucta tarirca. 33Cacharicucpi, dueñocunaca:

—¿Imapactac cacharicunguichic?— nirca.

34Chashna nicpica:

—Apunchic Jesusmi apachun cachan— nirca.

35Jesuspacman apamushpaca, churanacunata burropi sudashpami, Jesusta montachirca. 36Jesús montashca ricucpimi, gentecunaca churanacunatami ñanpi tendirca. 37Jesús ña Jerusalenman cuchuyashpa, Olivos urcu cuchuta urai ricucpica, pai milagrocunata, mancharinacunata ruhuashcamantami tucui paita catishpa riccunaca cushicushpa, Diosta alli nishpa caparirca. 38Paicuna caparishpaca:

—¡Diospac shutipi shamucuc Jatun Mandacca alli nishca cachun! ¡Jahua pachapipish alli sumac cushicui cachun! ¡Diostapish alli nishca cachun!— nishpami caparirca.

39Chaimantami gentecunapuramanta maijan fariseocunaca:

—Yachachic, cambac yachacuccunataca upallachi— nirca.

40Chashna nicpimi Jesusca:

—Paicuna upallacpica, rumicunami caparinga— nirca.

41Jesús Jerusalenman chayagrishpa, chai pueblota ricushpaca: 42“¡Cai pueblopi causaccunalla! Cunan punzhallapish cushi causaimanta yachashpaca, allichari canguichicman, ashtahuanpish yuyai illac cashpami, mana entendinguichic. 43Cancunata piñaccuna shamushpa, muyundita jarcashpa shayarina punzhacunami shamun. 44Cai pueblota urmachishpa, caipi causaccunatapish tucuchingami. Shuc rumillapish pircashcaca mana saquiringachu. Dios quishpichingapac shamucpi, mana chasquishcamantami llaquita apanguichic” nirca.

Diosta mañana huasimanta catuccunatallucchishpa cachashcamanta

(Mt 21.12-17; Mr 11.15-19; Jn 2.13-22)

45Jesús Diosta mañana huasiman yaicushpa, catuccunatapish, randiccunatapish llucchishpa cachacushpaca: 46“Dios quillcachishcapica: ‘Ñuca huasica, ñucata mañana huasimi canga’ ninmi. Ashtahuanpish cancunaca shuhuaccuna miticuna machaitami ruhuashcanguichic” nirca.

47Jesusca tucui punzhacunami Diosta mañana huasipi yachachic carca. Cutin curacunata mandac curacunapish, mandashcacunata yachachiccunapish, llactata mandaccunapish Jesustaca ima shina huañuchinatami yuyacurca. 48Ashtahuanpish Jesús huillacucta tucui gentecuna alli uyacushcamantami, paicunaca imata mana ruhuai pudirca.

Currently Selected:

LUCAS 19: QCA10

Highlight

Copy