LUCAS 23

Mandac Pilatopacman Jesusta apashcamanta

(Mt 27.1-2,11-14; Mr 15.1-5; Jn 18.28-38)

1Chaimantaca tucui chaipi caccuna jatarishpami, Jesustaca mandac Pilatopacman aparcacuna. 2Paipac ñaupapica Jesustaca juchanchishpaca:

—Cai runataca mandacta ama cazuchunmi gentecunata jatarichicucta japircanchic. Paica: “Ñucami Jatun Mandac Cristo cani” nishpami, impuestota jatun mandac Cesarman ama pagachun ninmi— nirca.

3Chashna nicpimi Pilatoca:

—¿Canchu israelcunata Jatun Mandac cangui?— nishpa tapurca.

Shina nicpimi, Jesusca:

—Ari, canllatac nishcanguimi— nirca.

4Pilato curacunata mandac curacunatapish, gentecunatapish:

—Cai runapica, ima juchata mana tarinichu— nirca.

5Shina nicpipish paicunaca:

—Paica tucui Judea llactacunapi, Galilea llactamanta Jerusalén llactamanmi gentecunata mana allita yachachishpa, piñanacuipi churacun— nircacuna.

Mandac Herodespacman Jesusta apashcamanta

6Chashna “Galilea” nicta Pilato uyashpaca:

—Cai runaca, ¿Galilea llactamantachu?— nishpa tapurca.

7Herodes mandacuc Galilea llactamanta cashcamantami Jesustaca mandac Herodespacman cacharca. Chai punzhacunapica, Herodespish Jerusalenpimi carca. 8Herodesca “Jesusca milagrocunatami ruhuan” nicta uyashpami, utcamanta pacha Jesusta ricunata munacurca. Shinallatac ima milagrota ruhuacta ricunatapishmi munacurca. 9Herodes caita chaita tapucpipish, Jesusca imata mana nircachu. 10Curacunata mandac curacunapish, mandashcacunata yachachiccunapish Jesusta juchanchishpami chaipi carcacuna. 11Herodespish, paipac soldadocunapish Jesusta burlashpa, asishpami, jatun mandac churana sumac churanata churachirca. Chashnami Pilatopacman cutichishpa cacharca. 12Chai punzhamantami Pilatoca Herodes-huan alli tucurca. Ñaupamanca piñanacushcami carca.

Jesusta huañuchingapac juchanchishcamanta

(Mt 25.15-26; Mr 15.6-15; Jn 18.39—19.16)

13Pilato curacunata mandac curacunatapish, mandaccunatapish, tucui gentecunatapish tandachishpaca:

14—Cai runataca ‘Gentecunatami mana allita yachachicun’ nishpami, juchanchishpa apamushcanguichic. Cai runata cancunapac ñaupapi tapushpaca, ima cancuna juchanchishcata mana tarinichu. 15Herodespish manallatac ima juchata tarircachu, chaimantami cutichishpa cachashca. 16Chaimanta macachishpallami cacharigrini— nirca.

17Cada huatami Pascua punzhapica shuc prezuta cacharic carca. 18Tucui chaipi caccunaca shuc shinalla caparishpaca:

—¡Chai Jesustaca huañuchilla! ¡Barrabasta cachari!— nishpa caparirca.

19Barrabasca mandac-huan piñarishpa gentecunata jatarichishcamanta, huañuchishcamantami carcelpi carca. 20Pilatoca Jesusta cacharina yuyaihuan cashpami, cutin gentecunata tapurca. 21Shina tapucpipish tucuimi:

—¡Chacatailla, chacatailla!— nircacuna.

22Pilato quimsa cutin tapushpaca:

—Paica, ¿ima mana allitatac ruhuashcayari? Paita huañuchingapacca, ima juchata mana tarinichu. Paitaca macachishpallami cacharigrini— nirca.

23Gentecunaca “chacatailla” nishpa ashtahuan caparirca. Chaimantami paicuna munashcata pactachirca.

24Chaimantami Pilatoca paicuna munashcata pactachishpa, Jesusta huañuchichun mandarca. 25Cutin, mandac-huan piñarishpa gentecunata jatarichishcamanta, huañuchishcamanta prezu cac runataca cacharircami, ashtahuanpish Jesustaca gentecuna munashca ruhuachunmi curca.

Jesusta chacatashcamanta

(Mt 27.32-44; Mr 15.21-32; Jn 19.17-27)

26Jesusta chacatangapac apacushpami, campomanta shamucuc Cirene pueblomanta Simonhuan tuparca. Paitami Jesuspac huashata cruzta apachishpa pusharca. 27Jesuspac huashataca achca gentecunami caticurca. Huarmicunapish Jesusta llaquishpami llaquilla huacashpa caticurca. 28Jesús chai huacacuc huarmicunata tigrarishpa ricushpaca:

—Jerusalén huarmicunalla, ama ñucamantaca huacaichicchu, ashtahuanpish cancunamanta, cancunapac huahuacunamanta huacaichic. 29Chaica: “Huahuata mana chari pudic, mana huicsayuc tucuc, mana chuchuchic huarmicunapish cushicuichic” nina punzhacuna chayamungami. 30Chaimantami urcucunataca: “Ñucanchic jahuapi tuñiri” cutin lomacunataca: “Ñucanchicta tapai” ningacuna. 31Verde yura shina ñucata cashna ruhuashpaca, chaquishca yura shina cancunatacarin, ¿imatachari ruhuanga?— nirca.

32 Ishcai millai runacunatapish Jesus-huan pacta chacatangapac aparcacuna. 33Calavera nishca urcuman chayashpaca, Jesusta chacatarcami. Ishcai millai runacunatapish, shuctaca alli maquiman, shuctaca lluqui maquimanmi chacatarca. 34Chashna chacatacpipish Jesusca:

—Ñuca Taitalla, cai gentecunaca ima ruhuacushcata mana yachanchu. Chaimanta perdonai— nirca.

Cutin Jesuspac churanacunata suerteta ruhuashpami chaupinacurca. 35Gentecunaca Jesusta chaparacurcami. Cutin, mandaccuna burlashpaca:

—Shuccunataca quishpichircami. Dios cachashca Cristo cashpaca, paillatac quishpirichun— nircami.

36Soldadocunapish vinagreta ubiachisha nishpa burlashpaca:

37—¡Can, israelcunata Jatun Mandac cashpaca, canllatac quishpiriyari!— nirca.

38Jesuspac uma jahua caspipica, griego rimaipi, latín rimaipi, hebreo rimaipi: «Caica Israelcunata Jatun Mandacmi» nishpami, quillcashca carca.

39Chacatashca millai runaca:

—¡Can Cristo cashpaca, canllatac quishpirishpa, ñucanchictapish quishpichiyari!— nishpami rimarirca.

40Shina nicpi, caishuc millai runaca:

—Canpish pai shinallatac llaquita apacushpapish, ¿manachu Diosta manchangui? 41Ñucanchicca millaita ruhuashcamantaca llaquita apanatacmi canchic, ashtahuanpish cai runaca ima millaita mana ruhuashcachu— nirca.

42Shina nishpami chai runaca Jesustaca:

—Can mandangapac shamushpaca, ñucata yuyaringuiyari— nirca.

43Chashna nicpimi Jesusca:

—Cunanllatacmi jahua pachapi ñucahuan cangui. Chaica chashnatacmi canga— nirca.

Jesús huañushcamanta

(Mt 27.45-56; Mr 15.33-41; Jn 19.28-30)

44Chaupi punzhamanta quimsa horas chishicamanmi, tucui cai pachaca amsayarca. 45Intipish amsayarcami. Diosta mañana huasi ucupi cac jatun pañopish, jahuamanta uraiman chaupita lliquirircami. 46Jesús sinchita caparishpaca:

—Taitalla, cambac maquipimi ñuca espirituta mingani— nirca. Shina nishpaca huañurcallami.

47Mandac soldado chaita ricushpa, Diosta “allimari cangui” nishpaca:

—Cai runaca cashcata ruhuacmi cashca— nirca.

48Tucui chaipi cac gentecunapish chaita ricushpaca, llaquihuan shungupi huactarishpami cutircacuna. 49Jesuspac tucui ricsishcacunapish, Galilea llactamanta Jesus-huan shamuc huarmicunapish carumantami chai tucuitaca ricucurca.

Jesusta enterrashcamanta

(Mt 27.57-61; Mr 15.42-47; Jn 19.38-42)

50Judea llacta Arimatea pueblomanta José shuti runami tiyarca. Paica israelcunata mandacpuramanta cashcata ruhuac runami carca. 51Paipish Dios mandacucta ricusha nishpami shuyacurca. Jesusta japichingapac yuyarishcatapish, imata ruhuashcatapish mana allichu nicmi carca. 52Paimi mandac Pilatopacman rishpa, Jesuspac cuerpota enterrangapac mañarca. 53Jesuspac cuerpota cruzmanta uricuchishpa pañohuan pillushpami, rumi quingrai jutcushca sepulturapi churarca. Chaipica pitapish manarac enterrashcami carca. 54Chaica samana punzhapac allichirina punzha chishimi carca.

55Galilea llactamanta Jesus-huan shamushca huarmicunapish catishpa rishpami, Jesuspac cuerpota ima shina sepulturapi churacta ricucurca. 56Chai huarmicuna huasiman cutimushpaca, mishquilla ashnacuctami Jesuspac cuerpopi churangapac allichirca. Samana punzha chayamucpica, Dios mandashca shinami samarirca.

Currently Selected:

LUCAS 23: QCA10

Highlight

Copy