LUCAS 22
22
Jesusta huañuchingapac yuyarinacushcamanta
(Mt 26.1-5,14-16; Mr 14.1-2,10-11; Jn 11.45-53)
1Levadura illac tandata micuna Pascua fiestami chayamucurca. 2Curacunata mandac curacunapish, mandashcacunata yachachiccunapish gentecunata manchashcamantami, Jesusta ima shina huañuchinata yuyarinacurca.
3Chashna cacpimi, Jesuspac chunga ishcai yachacuccunapuramanta Judas Iscariotepac shungupi Satanasca yaicurca. 4Judasmi curacunata mandac curacunahuan, Diosta mañana huasita cuidaccunahuan Jesusta ima shina japichinata parlangapac rirca. 5Chaimantami paicunaca cushicushpa, Judasman cullquita pagashun nircacuna. 6Paicuna cullquita cushun nicpica, Judasca ari nishpami, Jesusta pi mana yachacpi, pacalla japichinata yuyarishpa puricurca.
Apunchic Jesús pai huañunata yuyarishpa micushcamanta
(Mt 26.17-29; Mr 14.12-25; Jn 13.21-30; 1 Cor 11.23-26)
7Levadura illac tandata micuna punzhami chayamurca. Chai punzhapimi Pascua fiestapac pactalla ovejata huañuchishpa micuna carca. 8Chaimantami Jesús Pedrotapish, Juantapish cayashpaca:
—Richic, ñucanchic Pascua fiesta micunata allichigrichic— nirca.
9Shina nicpica paicunaca:
—¿Maipitac allichigrichun ninguiyari?— nirca.
10Shina nicpimi Jesusca:
—Cancuna puebloman chayacushpaca, yacu puñu aparishca shuc runahuanmi tupanguichic. Pai mai huasiman yaicungacaman catishpa ringuichic. 11Shina rishpa huasiyuctaca: “Yachachicca: ‘¿Maijan ucupitac ñuca yachacuccunahuan Pascua fiesta micunata micusha?’ ninmi” ninguichic. 12Chashna nicpimi, chai huasiyucca sumacta allichishca jatun ucuta altopi ricuchinga. Chaipi micunata allichinguichic— nirca.
13Yachacuccuna rishpaca, Jesús nishca shinallatacmi tarirca. Chaipimi Pascua fiesta micunata allichirca.
14Micuna horas chayamucpimi, Jesusca paipac apostolcunahuan micungapac mizapi tiyarirca. 15Chaipimi Jesusca:
—¡Ñucaca manarac llaquita apashpami, cancunahuan Pascua fiestata micunata munacurcani! 16Ñucaca ninimi: Cai micunataca Dios mandacucpi micungacaman manatac micushachu— nirca.
17Jesús vaso vinota japishpa, Diosta pagui nishpaca:
—Caica japichic, asha ashata ubiaichic. 18Ñucaca ninimi: Cunanmanta pacha cai uvas vinotaca, Dios mandana punzhacaman manatac ubiashachu— nirca.
19Shinallatac tandata japishpa Diosta pagui nishpa, chaupishpa chaupishpa cushpaca:
—Caica, cancunamanta cushca ñuca cuerpomi. Ñucata yuyarishpa, cashna ruhuacunguichiclla— nirca.
20Micushca quipaca, Jesús vaso vinota japishpaca:
—Cai vaso vinoca, cancunamanta jichana ñuca yahuarmi. Chaihuanmi Diosca shuc mushuc ari ninacuita ruhuagrin. 21Ashtahuanpish ñucata japichic runaca, ñucallahuantacmi cai mizapi micucun. 22Runa Tucungapac shamushca ñucaca, Dios munashca shinami huañusha, ashtahuanpish ñucata japichic runalla, ¡imachari tucunga!— nirca.
23Chaimantami paicunaca ‘¿Maijantac paita japichicca canchic?’ nishpa tapunacurca.
Serviccuna tucuita yalli cashcamanta
24Jesuspac yachacuccunapurami maijan ashtahuan alli mandac canamanta rimanacurca.
25Chashna rimanacucucpimi, Jesusca:
—Jatun llactacunata mandaccunallami, paicuna munashcata ruhuachishpa mandan. Shinallatac mandaccunallami: ‘Allita mandacun’ nichunmi munan. 26Cancunaca ama chashna canguichicchu. Ashtahuanpish cancunapurapi maijan alli nishca casha nishpaca, quipa huiñaicuna shina cachun. Mandac cashpapish, servic runa shina cachun. 27¿Maijantac ashtahuan alli nishcaca? ¿Mizapi micungapac tiyaric, mana cashpaca, micunata cushpa servic? ¿Manachu mizapi tiyaric ashtahuan alli nishca? Chashna cacpipish, ñucaca servic shinallami cancunapurapica cani.
28Cancunaca ñuca mai llaquihuan cacpipish, ñucahuanmi carcanguichic. 29Chaimantami ñuca Taita ñucata Jatun Mandacta ruhuashca shina, cancunatapish jatun mandacta ruhuasha. 30Cancunaca ñuca mandacucpimi, mizapi tiyarishpa ñucahuan micunguichic, ubianguichic. Mandashpa tiyarinapi tiyarishpami, Israelpac chunga ishcai aillucunata mandanguichic— nirca.
Pedro Jesusta negana cashcamanta
(Mt 26.31-35; Mr 14.27-31; Jn 13.36-38)
31Shinallatac Jesusca:
—Simón, Simón, Satanasca trigota shushuc shina ruhuangapacmi, Cancunataca mañashca. 32Chashna cacpipish, can sinchi cric cachunmi ñucaca Diosta mañarcani. Can ñucaman cutirishpaca, ñucata caticcunamanpish ñucata catichun alli yuyaita cungui— nirca.
33Chaimantami Pedroca:
—Apunchic Jesús, canta carcelman apacpipish, canhuanmi risha. Huañuna cacpipish, canhuanmi huañusha— nirca.
34Chashna nicpimi Jesusca:
—Pedro, canca cunan tutallatacmi gallo manarac cantacpi, quimsa cutin ‘mana ricsinichu’ nishpa negangui— nirca.
Jesús llaquita apanaca chayamushcamanta
35Jesús paicunata tapushpaca:
—Ñuca cancunata mana cucayuhuan, mana cullquihuan, mana ushutahuan cachacpica, ¿ima faltarcachu?— nirca.
Shina nicpimi yachacuccunaca:
—Mana ima faltarcachu— nircacuna.
36Shina nicpimi Jesusca:
—Cunanca maijanpish cucayutapish, cullquitapish charicca, apaichiclla. Maijanpish espadata mana charicca, churanata catushpa randichic. 37Ñucaca ninimi: Ñuca ima tucunamanta Dios quillcachishcapica: “Juchayuc runacuna shinami huañunga” nishcaca, pactanatacmi can. Ñucamanta Dios quillcachishcaca pactanami can— nirca.
38Chashna nicpimi yachacuccunaca:
—Apunchic Jesús, caipimi ishcai espadacuna tiyan— nirca.
Chashnacpimi Jesusca:
—Upallai— nirca.
Jesús Getsemaní huertapi Diosta mañashcamanta
(Mt 26.36-46; Mr 14.32-42)
39Jesús chaimanta llucshishpaca, Olivos urcumanmi ric cashca shinallatac rirca. Yachacuccunapish catishpami rirca. 40Ña chaiman chayashpaca:
—Mana pandachishca cangapacca, Diosta mañaichic— nirca.
41Chashna nishpami yachacuccunapacmanta ashata caruyashpa, Diosta mañangapac cungurirca. 42Pai mañashpaca: «Ñuca Taitalla, can munashpaca, cai jayac ubiana shina llaquita ñucamanta anchuchiyari. Shina cacpipish, ama ñuca munashca shina ruhuaichu, ashtahuanpish can munashcata ruhuai» nirca.
43Chashna mañacucpimi, jahua pachamanta ángel shamushpa sinchiyachirca. 44Jesús yalli llaquihuan cashpami, ashtahuan Diosta mañarca. Jumbipish yahuar shinami pambaman shuturca.
45Diosta mañashpa jatarishpaca yachacuccunapacmanmi cutirca. Yachacuccuna llaquihuan cashcamanta sueñucucpimi tuparirca. 46Chaimantami paicunataca:
—¿Ima nishpatac sueñucunguichic? Mana pandachishca cangapacca Diosta mañaichic— nirca.
Jesusta japishcamanta
(Mt 26.47-56; Mr 14.43-50; Jn 18.2-11)
47Jesús nicucllapitacmi achca gentecuna chayarca. Paipac chunga ishcai yachacuccunapuramanta Judasmi ñaupashpa chayarca. Pai cuchuyashpami Jesusta mucharca. 48Chaimantami Jesusca:
—Judas, canca Runa Tucungapac shamushca ñucataca, ¿muchashpachu japichingui?— nirca.
49Paihuan cac yachacuccuna Jesusta japicucta ricushpaca:
—Apunchic Jesús, ¿espadahuan macanacushunchu?— nirca.
50Jesus-huan caccunamanta shucmi espadahuan huactashpa, curacunata jatun mandac curapac servicpac alli lado ringrita pitirca. 51Chashna piticpimi Jesusca:
—Ña chailla, saquichic— nirca.
Chaimantami chai runapac ringri chugripi tuparishpa, alliyachirca.
52Jesús, paita japingapac shamuc curacunata mandac curacunatapish, Diosta mañana huasita cuidaccunata mandaccunatapish, cunac yuyaccunatapish rimashpaca:
—¿Ñucataca shuhuacta shinachu espadacunahuan, caspicunahuan japingapac shamunguichic? 53Punzhantami Diosta mañana huasipi cancunahuanca carcani. Chashna cacpipish, mana japircanguichicchu. Cunanca ñucata japina horas chayamucpimi, amsapi mandacuc supai yuyaita cucpi, ñucataca japinguichic— nirca.
Pedro Jesusta negashcamanta
(Mt 26.57-58,69-75; Mr 14.53-54,66-72; Jn 18.12-18,25-27)
54Jesusta japishpaca, curacunata jatun mandac curapac huasimanmi aparirca. Pedroca caru carullatami caticurca. 55Pungu pambapimi ninata japichishpa, muyundita tiyarishpa masharicurca. Pedropish paicunahuanmi masharicurca. 56Pedro masharishpa tiyacucpi, shuc servic huarmi paita alli ricushpaca:
—Cai runapish Jesus-huan puricmi carca— nirca.
57Chashna nicpimi Pedroca:
—Marmi, mana ricsinichu— nirca.
58Chai quipalla, shuc runa Pedrota ricushpaca:
—Canpish chai runacunapurami cangui— nirca.
Shina nicpimi Pedroca:
—Uyai, mana paicunapurachu cani— nirca.
59Shuc hora caipac shinapi, shuc runaca:
—Cai runapish Jesus-huan puricmi carca. Paipish Galilea llactallamantatacmi— nirca.
60Chashna nicpipish, Pedroca:
—Imamantapish nicunguichari, mana entendinichu— nirca.
Pedro chashna nicucpimi, ñapish galloca cantarca. 61Chashna cantacpimi, Apunchic Jesusca Pedrota tigrarishpa ricurca. Chashna ricucpimi: «Manarac gallo cantacpimi, quimsa cutin ñucataca negangui» nishpa, Apunchic Jesús nishcata yuyarirca. 62Chaimantami Pedroca canzhaman llucshishpa munai huacarca.
Jesusta burlashpa asishcamanta
(Mt 26.67-68; Mr 14.65)
63Jesusta cuidac runacunaca pucllashpa paita huactarca. 64Ñahuita pañohuan huatashpa, huactashpaca:
—¿Maijantac huactanchic? ¡Huillai!— nircami.
65Shinallatac Jesustaca munai camishpami imatapish rimarcacuna.
Mandaccunapuralla tandanacushcapacman Jesusta apashcamanta
(Mt 26.59-66; Mr 14.55-64; Jn 18.19-24)
66Ña punzhayacpimi, Israel curacunata mandac curacunapish, cunac yuyaccunapish, mandashcacunata yachachiccunapish tandanacushca mandaccunapacman Jesusta aparca. Chaiman apacpica:
67—¿Canchu Cristo cangui? Huillai— nirca.
Chashna nicpimi Jesusca:
—Ari nicpipish, cancunaca mana cringuichicchu. 68Cancunaman ñuca tapucpipish, cancunaca mana huillanguichicchu, shinallatac mana cacharinguichicchu. 69Shina cacpipish, cunanmanta pachami, Runa Tucungapac shamushca ñucaca poderyuc Diospac alli maquiman tiyacusha— nirca.
70Chashna nicpica, tucui mashna tapushpaca:
—Shinashpaca, ¿canchu Diospac Churi cangui?— nircacuna.
Shina tapucpimi paica:
—Ari, cancuna nishca shinallatacmi cani— nirca.
71Shina nicpimi paicunaca:
—Paipac shimimantami uyashcanchic. Chaimanta mana piman ashtahuan tapunachu canchic— nircacuna.
Currently Selected:
LUCAS 22: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
