LUCAS 21

Huaccha viuda huarmi ofrendata churashcamanta

(Mr 12.41-44)

1Jesusca Diosta mañana huasipi chayuccuna ofrendata churacuctami ricurca. 2Shuc huaccha viudapish, ishcai ashalla valic cullquita churacuctami ricurca. 3Chaimantami Jesusca yachacuccunataca:

—Huaccha viudami, caishuccunamanta yalli ofrendata cushca. Chaica chashnatacmi. 4Tucui chayuccunami puchushcallata ofrendata Diosman cuncuna, ashtahuanpish cai huarmica paipac causaipac charishcatami cushca— nirca.

Diosta mañana huasita urmachinamanta

(Mt 24.1-2; Mr 13.1-2)

5Tauca runacuna Diosta mañana huasita sumac rumicunahuan ruhuashcamanta, pircapish sumacta allichishcamanta parlanacucucpimi, 6Jesusca:

—Tucui urmachishca, rumillapish mana pircashca saquirina punzhacunami chayamucun— nirca.

Cai pacha manarac tucuricpi llaquicuna tiyanamanta

(Mt 24.3-28; Mr 13.3-23)

7Chashna nicpimi yachacuccunaca:

—Yachachic, ¿ima punzhatac chaica tucungayari? Ña chashna tucungapacca, ¿imacunatac ricuringayari?— nirca.

8Shina tapucpimi Jesusca:

—Achcacunami ñuca shutipi shamushpa: “Ñucami Cristoca cani” ningacuna. Maijanca: “Cunanmi pai cutimuna punzhaca chayamun” ningami. Pacta paicunata pacta catinguichicman, ashtahuanpish alli yuyaihuan puringuichic. 9Cancunaca llactacunapura macanacuitapish, llacta ucupi macanacuitapish uyanguichicmi. Ama mancharinguichicchu. Chai llaquicunaca cai pacha manarac tucuricpi tiyanallatacmi can. Chashna tucucpipish, cai pachaca manarac tucuringachu— nirca.

10Shinallatac Jesusca:

—Llactacunapurami macanacunga. Jatun mandaccunapurapish macanacungami. 11Maipica, jatun allpa chucchuimi tiyanga. Yalli yarcaipish, ungüicunapish tiyangami. Jahua cielopica, jaicapi mana ricushcacunami ricuringa. Yalli manchaimi tiyanga.

12Manarac caicuna tucucpimi, ñucata caticushcamantaca piñashpa prezunga. Cancunata juchanchishpami, tandanacuna huasicunaman apanga. Carcelpipish churangacunami. Llactacunata jatun mandaccunapacmanpish, quiquin llactata mandaccunapacmanpish apangami. 13Chashna apacpimi, paicunamanpish ñucamanta huillanguichic. 14Ama paicunapac ñaupapica: “¿Imatashi nishun?” nishpa, chai yuyailla canguichicchu. 15Ñucallatacmi cancunamanca rimana alli yuyaicunatapish cusha. Chashna allita rimacpica, cancunata piñaccunaca mana imata ni pudishpa, upalla saquiringallami. 16Cancunataca ricsishcacunallatac, familiacunallatac, huauquicunallatac, taita mamacunallatacmi huañuchichun japichinga. Chashna japichicpica, maijan cancunataca huañuchingami. 17Ñucata caticushcamantami, tucui gentecunapac piñashca canguichic. 18Chashna cacpipish cancunapac shuc uma acchallapish mana chingaringachu. 19Chashna llaquichicucpipish, tucui shunguhuan catirashpaca quishpiringuichicmi.

20Jerusalén pueblota soldadocuna muyunacushpa shayacucta ricushpaca, tucui chingachishca cashca shinata yachanguichic. 21Judea llactapi caccunaca urcucunapi miticugrichun. Jerusalenpi caccunapish llucshishpa richun. Chagrapi caccunapish ama cutichun. 22Chai punzhacunaca, Dios quillcachishca shina llaquichina punzhacunami canga. 23Chai punzhacunaca Dios cai llactapi causaccunata nina japiric shina piñarishpa llaquichinami canga. ¡Chai punzhacunapi huicsayuc huarmicunalla, chuchucuc huahuayuc huarmicunalla, imachari tucunga! 24Maijantaca espadahuanmi huañuchinga. Maijantaca huatashpami, tucui llactacunaman prezu apanga. Dios llaquichichun saquishca punzhacuna pactangacamanmi, Jerusalenpi causaccunataca shuctac llactacunaca paicuna munashcata ruhuashpa llaquichinga.

Apunchic Jesús ima shina cutimunamanta

(Mt 24.29-35,42-44; Mr 13.24-37)

25Intipipish, quillapipish, lucerocunapipish jaicapi mana ricushcacunami ricuringa. Cutin cai pachapica mama cucha yallita cuyurishpa huajiacta ricushpami yallita mancharishpa, yuyaita chingachinga. 26Cai pachapi yalli llaquicuna catipi shamucpi, jahua cielopi tiyaccunapish chucchucpimi, gentecunaca yallita mancharishpa, yuyaita chingachinga. 27Chashna tucucpica, Runa Tucungapac shamushca ñuca poderhuan, sumaimana achiclla cashcahuan achicyachishpa, puyupi shamucuctami ricunga. 28Chai tucui llaquicuna callaricpica, Dios cancunata quishpichigricushcamanta huichaita ricushpa, cushicuihuan chaparacuichic— nirca.

29Jesús cai chimbapurashca parlohuan parlashpaca: «Higo yurata, mana cashpaca ima yuracunatapish ricushpa alli yuyarichic. 30Chai yuracunapi pangacuna jundarimucta ricushpaca, usyai punzhacuna chayamucushcatami cancunallatac yachanguichic. 31Chai shinallatac cancunapish caicuna pactamucucta ricushpaca, Dios mandana punzhacuna ña chayamucushcatami yachanguichic.

32Cunan punzha causaccuna cai ñuca huillashcacunaca tucui pactangacaman manarac huañungachu. Chashnami canga. 33Cai pachapish, jahua pachapish tucuringami. Ashtahuanpish ñuca huillashcacunaca pactacungallami.

34Cancunallatac alli yuyarichic. Pacta machanallapi, micunallapi, cai pachapi imatapish charinallapi yuyashpa causacunguichicman. Pacta cancuna mana yuyashca horas chai punzhaca chayamunman. 35Cai pachapi causaccunataca, shuc tucllahuan japic shinami chai punzhaca chayamunga. 36Chaimanta cancunaca allichirishca, ña rinalla shinami cana canguichic. Chai tucui llaquimanta quishpiringapacca, Runa Tucungapac shamushca ñucapac ñaupapi alli ricuringapac Diosta mañaracuichic» nirca.

37Jesusca punzhaca Diosta mañana huasipimi yachachic carca. Tutaca Olivos urcumanmi ric carca. 38Tucui gentecunami Jesús yachachishcata uyangapac utca jatarishpa, Diosta mañana huasiman shamuc carca.

Currently Selected:

LUCAS 21: QCA10

Highlight

Copy