Ẹyano 1

Omaẹlaghọ rẹ ihwo rẹ Izrẹl vwẹ Ijipiti

1Enana edẹ rẹ emeshare rẹ Izrẹl ri nene Jekọp kpo Ijipt, ọvuọvo vẹ evwruwevwi rọye. 2Rubẹn, Simiọn, Lẹvi, vẹ Juda, 3Isaka, Zebulọn, vẹ Bẹnjamin, 4Dan vẹ Naftali, Gad vẹ Asha. 5Emọ rẹ nẹ oma rẹ Jekọp rhe na ejobi da dia ujorha gbẹ ihwe; yẹ Josẹf hẹ Ijipiti ire. 6Etiyin Josẹf de ghwu, vẹ imoni rọye ejobi, vẹ uvwiẹ yena na ejobi. 7Ẹkẹvuọvo emọ rẹ Izrẹl de vwiẹ i de bu phiyọ; ayen da rho phiyọ, ayen de reghe asan na eje, ayen da vọn otọ na.

8Ovie ọkpokpọ ro ji Josef ẹriẹn de rhi mu vwẹ Ijipiti. 9Ọ da ta kẹ ihwo rọye, Nighe, ihwo rẹ Izrẹl bunọ avwanre, ayen jivwo ẹgba nọ avwanre. 10Ovwan gba yanrhe, rere avwanre vwẹ aghwanre ru ayen, ọ dia ọtiọyee ayen ki bu phiyọ, ofovwi da rhe, ayen ki ku oma gbe ivwighrẹn rẹ avwanre vwọ họnre avwanre ayen ke djẹ nẹ otọ na. 11Fiki rẹ ọtiọye na ayen da vwẹ ilori rẹ iruo vwo mu vwẹ enu rayen rere ayen vwẹ iruo ọgagan kẹ ayen; ayen da bọn ki Fero irere ra ghwẹ emu phiyọ, Pitọm vẹ Rẹmisis. 12Ẹkẹvuọvo obo re shenyẹ ayen te na, eriyin ayen ji ghwe buẹ phiyọ eriyin rhe ayen je ghwa hra nene asan ejobi te. Oshọ rẹ ihwo rẹ Izrẹl de mu ihwo rẹ Ijipt. 13Ọtiọye na ayen da vwẹ ihwo rẹ Izrẹl wian owian ọgagan, 14ayen da re osọnọ akpọ rayen kọ yara fiki rẹ owian ọgagan na, owian rẹ ikorekpẹn, vẹ oghẹrẹ rẹ owian efa vwẹ evun rẹ aghwa; owian ọgagan kọye a vwẹ ayen wian.

15Ovie rẹ Ijipt da ta kẹ irhere rẹ ihwo rẹ Hibru na, ọvo rọye e se Shifra, ọrivẹ Pua. 16Ọ da vuẹ ayen nẹ, ọke wo de vwiẹ eya rẹ Hibru na, rẹ ọmọ na de ghwe shotọ, ọ da dia ọmọshare, we mi ghwe hwe nu, ọ da dia ọmọtẹ wo mi jọ dia akpọ. 17Ẹkẹvuọvo irhere na da djẹ oshọ rẹ Ọghẹnẹ, ayen rhe ru obo rẹ ovie rẹ Ijipt na ta kẹ ayeen, ẹkẹvuọvo ayen da yan jẹn emeshare na vwo. 18Etiọye na ovie rẹ Ijipt de se irhere na, ọ da ta kẹ ayen, “Die ovwan vwo ru emu nana, wa vwọ yan jẹn emeshare na vwo vwẹ akpọ? 19Irhere na da ta kẹ Fero, Fikiridie eya rẹ Hibru na e họhọ eya rẹ Ijipt naa; kidie ayen goma gagan. Ayen ọvo vwiẹ nẹ tavwe rẹ irhere na ki te etiyin. 20Fiki rẹ ọtiọye na Ọghẹnẹ da vwẹ ẹro te irhere na; ihwo na de bu phiyọ ayen da rha gan phiyọ. 21Fikiridie irhere na djẹ oshọ rẹ Ọghẹnẹ ọ da kẹ ayen emọ. 22Fero de ji urhi kẹ ihwo rọye ejobi, nẹ ọmọshare kọmọshare rẹ ihwo rẹ Hibru na vwiẹri ejobi we mu ayen phiyọ Nail, ẹkẹvuọvo wa yan jẹn ọmẹtẹ vwo vwẹ akpọ.

Currently Selected:

Ẹyano 1: UBV77

Highlight

Copy