Ẹyano 2

Evwiẹ rẹ Mosis

1Asakiephana ohwo ọvo vwẹ uwevwi rẹ Lẹvi da ra rọye ọmọtẹ rẹ Lẹvi vwọ rọvwọn. 2Aye na da mrẹvun o de vwiẹ ọmọshare; rọ vwọ mrẹ nẹ ọmọ na oyoyovwi, o de sionu emeranvwe erha. 3Ọke ro gbi se sionu ọfaa o de rhuo obere rẹ ẹgo ọ da vwẹ orhọrhe vwo gbe, o de mu ọmọ na phiyọ o de muo phiyọ ohri rẹ ẹgo rẹ hẹ oma rẹ urhie na. 4Oniọvo rọye rẹ ọmọtẹ de mudia tephe kẹ, rọ vwọ mrẹ obo re cha phia kẹ. 5Asakiephana ọmọtẹ rẹ Fẹro da rhe họ vwẹ urhie na, emetẹ rọye je yan nene vwẹ oma rẹ urhie na; ọ da mrẹ obere na vwẹ evun rẹ ẹgo na o de ji emetẹ rọye ra reyọ rhe. 6Ọke ro vwo rhie ọ da mrẹ ọmọ na; nighe, ọmọ na ra viẹ. Aro rọye da dọn ọ da ta, ọnana ọvo vwẹ emọ rẹ ihwo rẹ Hibru na. 7Etiyin oniọvo rọye rẹ ọmọtẹ da ta kẹ ọmọtẹ rẹ Fero, “Mi gbe re se aye rẹ Hibru ọvo rhe re ọ ghẹrẹ ọmọ na kẹ wẹ?” 8Ọmọtẹ rẹ Fẹro da ta kẹ, “Oyoma gba yanran.” Etiyin ọmọtẹ na da yanran re se oni rẹ ọmọ na rhe. 9Ọmọtẹ rẹ Fẹro na da ta kẹ, “Reyọ ọmọ nana yanran wọ ra ghẹrẹ kẹ vwẹ, me cha hwa osa wẹn kẹ wẹ.” Aye na da rọye ọmọ na ọ da ra ghẹrẹ. 10Ọmọ na da rhe rho, ọ da rọye vwo rhe ọmọtẹ rẹ Fẹro, ọ da rhe dia ọmọshare rọye. O de se odẹ rọye Mosis, ọ da ta, “Fikiridie mi muro nẹ ame rhe.”

Mosis Djẹ kpo Midian

11Rẹ ẹdẹ ọvo vwo te re, rẹ Mosis vwọ rho nure, o de bru ihwo rọye ra, ra mrẹ oghwa rayen, ọ da mrẹ ohwo rẹ Ijipti ọvo ro hwe ohwo rẹ Hibru ọvo, ọvo vwẹ ihwo rọyen na. 12O de ni obonẹ ni obonẹ, ọke rọ vwọ mrẹ nẹ ohwo ọvuọvo mrẹẹ, o de hwe ohwo rẹ Ijipti na, o de sho. 13Rọ vwọ ra vwẹ ẹdẹ rivẹ, nighe ihwo rẹ Hibru ivẹ e họnra; ọ da ta kẹ ohwo rẹ ọ ria abe vwẹ usun rayen na, “Die nẹrhe wo hwe ọrivẹ wẹn?” 14Ọ da kpahe, “Ono vwẹ owẹ ru osun vẹ oguẹdjọ vwẹ enu rẹ avwanre? Wọ je guọnọ ovwẹ ghwe kirobo rẹ wo hwe ohwo rẹ Ijipt na? Etiyin oshọ de mu Mosis, o de roro, uyota ariẹn emu nana re. 15Ọke rẹ Fẹro vwo nyo, kọ guọnọ Mosis hwe.

Ẹkẹvuọvo Mosis da djẹ nẹ asan rẹ Fẹro, ọ da ra dia otọ rẹ Midian; o de tidia kẹrẹ orhare ọvo. 16Asakiephana orherẹn rẹ Midian vwo emetẹ ighwrẹn; ayen de rhi vo ame, ayen de vo ame vọn echẹ na ra vwọ kẹ eranvwe rẹ ọsẹ rayen. 17Isuigodẹ na da rhe re djẹ ayen yanran; ẹkẹvuọvo Mosis vrẹnri ọ da ra cha ayen uko, ọ da vwẹ ame kẹ uchuru rayen. 18Ọke rẹ ayen rhi vwo bru ọsẹ rayen Roẹl rhire, ọ da ta, “Mavọ wa vwọ fobọ rhe nonẹ na?’’ 19Ayen da ta, Ohwo rẹ Ijipt ọvo yi si avwanre nẹ obọ rẹ isuigodẹ na, o de ji vo ame buebu kẹ avwanre, ọ da vwẹ ame kẹ uchuru na”. 20Ọ da ta kẹ emetẹ rọye na, “Kẹ ohwo na rhọ? kidie sorọ wa vwọ yan jovwo? We re se rhe rere ọ re emu.” 21O de je Mosis nẹ ọ vẹ ohwo na dia; ọ da rọye Zipora rẹ ọmọtẹ rọye vwọ kẹ Mosis vwọ rọvwọn. 22O de vwiẹ ọmọshare kẹ, o de se odẹ rọye Gẹshọm; kidie ọ tare, “Mẹvwẹ ọrhorha vwẹ otọ ọrhorha.”

23Vwẹ evun rẹ ọke buebu yena, ovie rẹ Ijipt de rhi ghwu. Emọ rẹ Izrẹl ki brenu fiki rẹ ọviẹn rẹ ayen epha na, ayen da viẹ, oviẹ rayen de bru Ọghẹnẹ rhe. 24Ọghẹnẹ de nyo enuebro rayen, Ọghẹnẹ da karohọ ọphọ rọ vẹ Ebraham, Aizik, kugbe Jekọp rere. 25Ọghẹnẹ da mrẹ ẹdia rẹ emọ rẹ Izrẹl, Ọ da re ehrọre rẹ ayen.

Currently Selected:

Ẹyano 2: UBV77

Highlight

Copy