Ẹyano 3

Ọghẹnẹ se Mosis

1Asakiephana Mosis kọ sẹro rẹ uchuru rẹ Jẹtro ọgọ rọyen, orherẹn rẹ Midian; o de sun uchuru na kpo eghara rẹ aton na, o de rhi te Horẹb, ugbenu rẹ Ọghẹnẹ, 2amakashe rẹ Ọrovwohwo da vwẹ oma phia kẹ vwẹ evun rẹ erhanre vwẹ evun rẹ aghwa; o de ni, nighe, erhanre na la, jẹ aghwa na tuaa. 3Mosis da ta, “Mi bi oma phiyọ akakọ rere me mrẹ okpo ughe nana, obo re sorọ rẹ aghwa na vwo jẹ tuọn.” 4Ọke rẹ Ọrovwohwo vwọ mrẹ nẹ o bi oma hẹ akakọ re o vwo nughe, Ọghẹnẹ de se nẹ evun rẹ aghwa na rhe, ọ da ta, “Mosis, Mosis,” ọ da ta, “Mẹvwẹ na.” 5Etiyin ọ da ta, “Wo biẹ kẹrẹ obonẹẹ; ku isabato wẹn nẹ awọ wẹn, kidie asan ru wo mudia na otọ ọfuanfon.” 6Ọ da ta, “Mẹvwẹ Ọghẹnẹ rẹ ọsẹ wẹn, Ọghẹnẹ rẹ Ebraham, Ọghẹnẹ rẹ Aizik vẹ Ọghẹnẹ rẹ Jekọp.’’ Etiyin Mosis de si opharo rọye nu, fikiridie oshọ ro vwo ni Ọghẹnẹ muro.

7Etiyin Ọrovwohwo da ta, “Me mrẹ oma ẹlaghọ rẹ ihwo mẹ re hẹ obo Ijipt, mi nyo oviẹ rayen fiki rẹ ilori rẹ iruo re vwẹ ayen wian owian; me riẹn oja rayen. 8Ọtiọye na ke me rhere rhi si ayen nẹ obọ rẹ ihwo rẹ Ijipt, re mi si ayen nẹ otọ yena vwo kpo otọ rọ yoma rọ rhoro, otọ rọ djẹ ọkẹre rẹ ame rẹ ivie vẹ ọnyọn. Otọ rẹ ihwo rẹ Kenan, ihwo rẹ Hit, ihwo rẹ Amọr, ihwo rẹ Periz, ihwo rẹ Hiv kugbe ihwo rẹ Jebu. 9Asakiephana, gbe nighe oviẹ rẹ ihwo rẹ Izrẹl bru vwe rhe, me je mrẹ oshenyẹ rẹ ihwo rẹ Ijipt shenyẹ ayen. 10Yanrhe, mi ji we bru Fẹro rere wọ rọye ihwo mẹ, emọ rẹ Izrẹl, nẹ otọ rẹ Ijipt rhe. 11Ẹkẹvuọvo Mosis da ta kẹ Ọghẹnẹ, “Mẹvwẹ ono ri mi vwo bru Fẹro ra, ra vwọ rọye emọ rẹ Izrẹl nẹ Ijipt rhe?” 12Ọ da kpahe kẹ nẹ, “Mi che mi nene uwe ra; ọnana kọ dia oka kẹ wẹ, nẹ Mẹvwẹ ri ji we; ọke wọ da rọye ihwo na nẹ otọ rẹ Ijipt rhe nu, ku wọ cha gọ Ọghẹnẹ vwẹ ugbenu nana.

13Etiyin Mosis da ta kẹ Ọghẹnẹ nẹ, “Ọ da dianẹ mi bru ihwo rẹ Izrẹl na ra me da ta kẹ ayen, ‘Ọghẹnẹ rẹ esẹ rẹ ovwan ji vwe bru ovwan rhe,’ rẹ ayen da nọ vwẹ, ‘Die ọyen odẹ rọyen?’ Kidie me ta kẹ ayen? 14Ọghẹnẹ da ta kẹ Mosis, “MẸVWẸ ỌYE ỌMẸVWẸ.” Ọ da ta, “Vuẹ ayen nẹ, ‘MẸVWẸ ọyen ju vwe bru ovwan rhe.’ ” 15Ọghẹnẹ da ta kẹ Mosis rhe, Ta ọnana kẹ ihwo rẹ Izrẹl, Ọrovwohwo na, Ọghẹnẹ rẹ esẹ rẹ ovwan, Ọghẹnẹ rẹ Ẹbraham, Ọghẹnẹ rẹ Aizik, Ọghẹnẹ rẹ Jekọp, ọyen ju vwe bru ovwan rhe: ọnana odẹ mẹ bẹdẹ, enẹ a vwọ karophiyọ ovwẹ vwẹ evun rẹ uvwiẹ na ejobi. 16Yanran ra ghwẹ ekpako rẹ Izrẹl na koko, re wọ ta kẹ ayen, Ọrovwohwo na, Ọghẹnẹ rẹ ọsẹ rẹ ovwan, Ọghẹnẹ rẹ Ebraham, ọ rẹ Aizik, vẹ ọ rẹ Jekọp, vwẹ oma phia kẹ vwẹ, tanẹ, me nabọ ni we mu vẹ obo rẹ e ruẹ uwe vwẹ Ijipt; 17Mi de ve nẹ me rọye ovwan nẹ evun rẹ omaẹlaghọ rẹ Ijipt na rhe, vwo kpo otọ rẹ Kenan; o rẹ Hit, vẹ Amọr, o rẹ Feriz, vẹ Hiv kugbe Jebu, otọ rọ djẹ ọkẹre rẹ ame rẹ ivie vẹ ọnyọn. 18Kẹ ayen kerhọ rẹ urhuru wẹn; ku wọ vẹ ekpako rẹ Izrẹl bru ovie rẹ Ijipt ra, ra ta kẹ nẹ, Ọrovwohwo na, Ọghẹnẹ rẹ Hibru na, bru avwanre rhe; asakiephana, avwanre rẹ wẹ, jẹn avwanre yan oyan rẹ ẹdẹ erha kpo obo aton na, rere avwanre re ze izobo kẹ Ọrovwohwo Ọghẹnẹ rẹ avwanre. 19Me riẹnre nẹ ovie rẹ Ijipt che se siobọ nẹ uwee jokpa nẹ a vwẹ obọ ọgagan yọnrọn. 20Ọtiọye ke me riẹn obọ me phia vwo ghwiẹ Ijipt vẹ emu rẹ igbunu ri mi che ruẹ vwọ; Ọyena da wan nu ko jẹ ovwan kpo. 21Ke me vwe aruesiri kẹ ihwo nana vwẹ obaro rẹ Ijipt; ọke we de che kpo, we gbi kpo abọ diodii, 22ẹkẹvuọvo aye ọvuọvo kọ nọ ekpẹn rẹ eravwọ ri jere mie ọrivẹ rọye, kugbe ọrhorha ro wo uwevwi rọye, ẹrovwo vẹ idọnọ kugbe oro, kugbe emwa, ku wọ vwẹ ayen rhuẹrẹ emeshare rẹ ovwan kugbe emetẹ rẹ ovwan; kẹ enẹ ovwan cha vwọ ghwa ihwo rẹ Ijipt na ria.

Currently Selected:

Ẹyano 3: UBV77

Highlight

Copy