Jẹnẹsis 18

E vẹ Ive kpahe Evwiẹ rẹ Aizik

1Ọrovwohwo da vwẹ oma phia kẹ vwẹ oma rẹ ọhahe ri Mamre, ro vwo tidia anurhoro rẹ utughẹ rọye vwẹ oghẹruvo na. 2Ọ vwọ kparo ni, nighe eshare erha mudia vwẹ obaro rọye. Ọke rọ vwọ mrẹ ayen, ọ da djẹ nẹ anurhoro rẹ utughẹ na ra vwa ayen, o de diguẹ kẹ ayen, 3ọ da ta, Ọrovwovwe, ọ da dianẹ ivun mẹ vwerhe owẹ, wọ wanvrẹn odibo wẹ-ẹn. 4E jo vo ama ame rhe, re wa hworhẹ awọ wẹn, rere we rovwoma vwẹ otọ rẹ urhe na, 5re Me ra guọnọ eme emu rhe ru we vwo te unu, re wa ke wanvrẹn kidie ọ guakẹ ovwan ghwa vwẹriẹ asan rẹ odibo wẹn nure. Kọye ayen da ta kẹ nẹ, Gbe ru kiri obo rẹ wo tare na. 6Ebraham de bru Sera kpata kpata kpo obo utughẹ, ọ da ta, Chere emu kpata kpata kẹ ihwo erha, omamọ rẹ emu, gbe, re wọ kaka ikara. 7Ebraham da ghwa djẹ kpo obo uchuru rọye, o de mu upene rẹ erhuẹn, sọkọ sọkọ yoyovwi, ọ da vwọ kẹ odibo rọye, nọ ra rhuẹrẹ phẹrẹkpẹ. 8Ọ da reyọ evwri, kugbe ameivie vwo chere upene rẹ erhuẹn na, o de muo kẹ ayen, o de mudia kẹrẹ ayen vwẹ otọ rẹ urhe na je ayen ra ria.

9Ayen da nọ nẹ, Tivọ Sera rẹ aye wẹn epha? Ọ da tanẹ, Ọ obo utughẹ. 10Ọ da ta, Uyota Me cha rhoma rhe vwẹ asan evwru, Sera rẹ aye wẹn na che vwiẹ ọmọshare. Yi Sera ra kerhọ vwẹ anurhoro rẹ utughẹ na 11Vwẹ ọke nana Ebraham vi Sera eghwore, ekpakoro gangan re; okpuyovwi ri Sera bru afe re. 12Etiyin Sera da hwẹ phihọ evun tanẹ, Ọke nana Me vwọ ghwo nure na, ekpuyovwi rẹ ọshare mẹ je ghwo, kẹ ọke na a ke mrẹ avwerhe ọfa? 13Ọrovwohwo da ta kẹ Ebraham, Kidie Sera vwọ hwẹ, tanẹ, Ke Me cha rhoma vwiẹ ọmọ vwẹ emare na? 14O vwo emuọvo rọ bẹn kẹ Ọrovwohwo? Ọke ri mi seri na ke Me cha rhoma bru we rhe, vwẹ asan evwru na, Sera ko che vwiẹ ọmọshare. 15Ẹkẹvuọvo Sera da ghwunu, tanẹ, Me hwẹre-e, kidie oshọ muro. Ọ da ta, Ẹjo, ẹkẹvuọvo wọ ghine hwẹ.

Ebraham ra rẹ orẹ kẹ Sodọm

16Etiyin eshare na da yan nẹ Etiyin, ayen da garo vi Sodọm; Ebraham de sun ayen te idjerhe. 17Ọrovwohwo da ta, Ki mi si obo ri mi che ru na nu kẹ Ebraham, 18ye Me mrẹre nẹ Ebraham cha rho ri hirhe ẹgborho rode, rẹ ẹgborho rẹ akpọ na ejobi da wan oma rọye vwo ebruphihọ? 19Ẹjo, kidie Me jẹrẹ reyọ nure, nẹ oyono emọ rọye vẹ evwruwevwi rọye ejobi re ayen sẹro rẹ idjerhe rẹ Ọrovwohwo re ayen ru uruemu rẹ ọvwata vẹ ọsoso; rere ive rẹ Ọrovwohwo vẹ kẹ Ebraham na o vwo se ruo gba kẹ. 20Etiyin Ọrovwohwo da ta kẹ, Kidie ekuvwie rẹ edo ri Sodọm vi Gomora ọ rhoro gangan umwemwu rayen brare gangan, 21Me ra Me ra mrẹ sẹ ekuvwie ri mi nyo kpahọ ayen na ghine uyota eyẹ efia, ọ rha dia uyota-a ke Me riẹn. 22Etiyin ihwo na de ku oma rhẹriẹ nẹ Etiyin, ayen da garo vi Sodọm; ẹkẹvuọvo Ebraham ji mudia vwẹ obaro rẹ Ọrovwohwo.

23Etiyin Ebraham de sikẹrẹ, ọ da ta, Ku wo ghine ghwọrọ evwata kugbe iruimwemwu? 24Ọ da dianẹ a mrẹ ihwo ujuvẹ gbe ihwe re dia evwata vwẹ orere na; wọ je ghwọrọ asan na, wo rhe jẹ ihwo ujuvẹ gbẹ ihwe rẹ evwata na vwo vwọ? 25A gha e se ru emu ọtiọye-e, rẹ e vwo hwe evwata kugbe iruimwemwu, re evwata vwọ họhọ iruimwemwu, A sa mrẹ-ẹ; Obrorhiẹ rẹ akpọ na rhe se ru obo re gbare? 26Ọrovwohwo da ta, Me da sa mrẹ evwata ujuvẹ gbẹ ihwe vwi Sodọm, ki mi ji asan na vwo vwi fiki rẹ ayen. 27Ebraham da kpahe, Nighe, Me ra ta ota kẹ Ọrovwohwo, mẹvwẹ re ekpẹn vẹ iwurhie diodi na, 28Ọ da dianẹ a mrẹ evwata ujuvẹ gbẹ iyori? Ku wọ je ghwọrọ orere na fiki rẹ iyori ọvo ri nuro na? Ọ da ta, Me sa ghwọrọ-ọ ọ da dianẹ a mrẹ evwata ujuvẹ gbe iyori vwọ. 29Ọ da rhoma ta kẹ nẹ, Ọ da dianẹ a mrẹ ujuvẹ vwọ. Ọ da kpahe, Vwi fiki rẹ ujuvẹ na mi se ruo-o. 30Etiyin ọ da ta, Biko e jẹn ophu mu Ọrovwohwo-o, re Me ta Ọnana. Ọ da dianẹ a mrẹ ọgban vwọ. Ọ da ta, Mi se ruo-o, ọ da dianẹ Me mrẹ ọgban vwọ. 31Ọ da ta, Nighe, ki mi kpokpo Ọrovwohwo na. Ọ da dianẹ a mrẹ uje vwọ. Ọ da kpahe, Vwi fiki rẹ uje na Me gbe sa ghwọrọ-ọ. 32Ọ da rhoma ta, Biko e jẹn ophu mu Ọrovwohwo-o, Me je ta obọ nana tavwe. Ọ da dianẹ a mrẹ ihwo ihwe vwọ. Ọ da ta, Fiki rẹ ihwe na Me je sa ghwọrọ-ọ. 33Ọrovwohwo da yanran, vwẹ ọke rẹ Ebraham vẹ ọye vwọ ta ota nu: Ebraham de rhivwi kpo.

Currently Selected:

Jẹnẹsis 18: UBV77

Highlight

Copy