Jẹnẹsis 17

Oyanvwe oka rẹ Ọphọ na

1Ọke rẹ Ebram vwọ ikpe ọvo nuro vwẹ ujori re Ọrovwohwo da vwẹ oma phia kẹ Ebram, ọ da ta kẹ, Mẹvwẹ Ọghẹnẹ ro vwo Ẹgba, yan nene uvwe, wo gbe ẹgua-a. 2Ke Me vẹ owẹ re ọphọ, ku wo vwiẹ buebu gangan. 3Ebram de she bọvwọ opharo rhuotọ, Ọghẹnẹ da ta kẹ, 4Nighe, ọphọ mẹ vẹ owẹ herọ, ku wọ cha dia ọsẹ rẹ ẹgborho buebu. 5E gbi se we Ebram ọfa-a, ẹkẹvuọvo ke se we Ebraham, fikiridie mi ru we vwọ dia ọsẹ rẹ ẹgborho buebu. 6Mi ru we vwọ dia ọgbọmiọvwọ, ẹgborho ride ki nẹ agada wẹn rhe, ivie ki nẹ oma wẹn rhe. 7Ọphọ na kọ dia uvwre mẹ vẹ owẹ kugbe uvwiẹ wẹn rọ cha vwẹ obuko wẹn; kọ dia ọphọ re rara, kọ dia Ọghẹnẹ kẹ wẹn kugbe uvwiẹ wẹn rọ cha obuko wẹ. 8Ke Me vwọ kẹ wẹ kugbe uvwiẹ wẹn rọ cha obuko wẹ, otọ nana rẹ ovwan da ọrharha na, otọ ri Kenan ejobi, kọ dia ẹkẹn uku wẹn bẹdẹ, ke Me dia Ọghẹnẹ rayen.

9Ọghẹnẹ da ta kẹ Ebraham, Vwọ kẹ wẹ, ku wọ sẹro rẹ ọphọ mẹ na, te owẹ vẹ emọ wẹn kugbe uvwiẹ wẹn ejobi re cha vwẹ obuko wẹn. 10Ọnana kọye ọphọ mẹ na, ru wọ sẹro rọye na, rọ uvwre mẹ vẹ owẹ kugbe emọ wẹn re cha obuko wẹn na: Kọshare kọshare rọ uvwre rẹ ovwan kọ yanvwe. 11Ku wọ yanvwe ohọrọ rẹ ẹsosuọ rẹ oma wẹn, kọ cha dia oka rẹ ọphọ rọ uvwre mẹ vẹ owẹ. 12Ọ ro te ẹdẹ ẹrenren nure vwẹ usun rẹ ovwan ka yanvwọ; kọshare kọshare vwẹ uvwiẹ wẹn ejobi, ọ re vwiẹri vwẹ uwevwi wẹn eyẹ ọ ra vwẹ igho dẹ eyẹ ọrharha rọ dia uwviẹ wẹ-ẹn. 13Te ọ re vwiẹri vwẹ uwevwi wẹn kugbe ọ ra vwẹ igho dẹ, ka yanvwọ. Kọye ọphọ mẹ na kọ dia oma wẹn dia ọphọ re rara. 14Kọshare kọshare ra yanvwe jovwo-o rọ gbe rha yanvwe ohọrọ rẹ ẹsosuọ rẹ oma rọye-e, ke bro kufia nẹ usun rẹ ihwo rọye, yọ chọ urhi rẹ ọphọ mẹ na.

15Ọghẹnẹ da ta kẹ Ebraham, Vwọ kẹ Serai rẹ aye wẹn, wo gbi se Serai ọfa-a, ẹkẹvuọvo Sera kọye dia odẹ rọye. 16Ke Me nẹ ẹrhovwo kẹ, ọ rọ marho ke Me kẹ ọmọ vwiẹ kẹ wẹ; ki mi bruphihọ kẹ, ko dia oni rẹ ẹgborho buebu; ivie rẹ ihwo ki nẹ agada rọye rhe. 17Etiyin Ebraham de gbe opharo otọ ọ da hwẹ, ọ da ta kẹ oma rọye, Kẹ ohwo rọ ghwo te ikpe ujori nure na se vwiẹ ọmọ? Ki Sera rẹ ikpe ujọne gbe ihwe na ji se vwiẹ ọmọ rhe? 18Ebraham da ta kẹ Ọghẹnẹ, E mane ke wan rhọvwe nẹ Ishmael dia obaro wẹn vwonẹ; 19Ọghẹnẹ da ta, Ẹjo, ẹkẹvuọvo Sera rẹ aye wẹn na che vwiẹ ọmọshare kẹ wẹ, ku wo se odẹ rọye Aizik. Ọphọ mẹ na kọ sẹ nene kọ dia ọphọ re rara kẹ vẹ uvwiẹ rọye rọ cha vwẹ obuko rọye. 20Vwọ kẹ Ishmael, mi nyo we; nighe, mi bruphihọ kẹ, kọ dia ọmiọvwọ ko ji bu gangan; kọ dia isun ihwivẹ, kọ dia ẹgborho rode. 21Ẹkẹvuọvo Aizik ọye ọphọ mẹ cha sẹ nene, ri Sera che vwiẹ kẹ vwẹ eghẹre ọtiọnana ukpe ọfa.

22Ọke rẹ Ọghẹnẹ vẹ ọye vwọ ta ota ejobi nu, Ọghẹnẹ da yanran kpenu jẹ Ebraham vwo. 23Etiyin Ebraham da reyọ Ishmael rẹ ọmọ rọye na kugbe ibiẹdo rọye re vwiẹ vwẹ uwevwi rọye eyẹ eviẹn ra vwẹ igho dẹ, kọshare kọshare vwẹ evun rẹ uwevwi rẹ Ebraham na, ọ da yanvwe ayen ejobi vwẹ ẹdẹ yena ọvuọvo na, kirobo rẹ Ọghẹnẹ ta kẹ. 24Ebraham da dia ikpe ọvo nuro ujori ọ ghwo te vwẹ ọke rọ vwọ yanvwe. 25Ishmael rẹ ọmọ rọye da dia ikpe ihwerha ọke rọ vwọ yanvwe. 26Vwẹ ẹdẹ yena ọvuọvo na ọye Ebraham vẹ ọmọ rọye Ishmael yanvwere; 27te ire vwiẹri vwẹ uwevwi rọye te e ra vwẹ igho dẹ mie erhorha, a da yanvwe ayen ejobi kugbe.

Currently Selected:

Jẹnẹsis 17: UBV77

Highlight

Copy