Jẹnẹsis 43

Iniọvo ri Josẹf vẹ Bẹnjamin rhoma kpo Ijipt

1Vwẹ ọke nana owẹvwe na rhi fi gangan vwẹ otọ na re. 2Rẹ ayen rha vwọ re emu rẹ ayen dẹ nẹ otọ rẹ Ijipt rhe re nu, ọsẹ rayen da ta kẹ ayen, Wa rhoma yanran, ra de ememu rhe. 3Ẹkẹvuọvo Juda da ta kẹ, Ohwo na kpokpa kẹ avwanre nẹ, jokpa nẹ ọmọsẹ wẹn na nene uwe. 4Wo de siobọ nẹ ọmọ na kẹ avwanre, avwanre ke ra ra dẹ emu rhe we, 5ẹkẹvuọvo wo rhe siobọ no kẹ avwanre-e, avwanre rha sa ra-a, kidie ohwo na ta kẹ avwanre gbagba nẹ, Wo sa mrẹ opharo mẹ-ẹ, jopka nẹ ọmọsẹ wẹn na nene uwe. 6Izrẹl da ta, Die jabọ we vwo ru emu ogbegbo nana ru wa vwọ ta kẹ ohwo na nẹ we ji vwo ọmọsẹ ọfa? 7Ayen da kpahe, Ohwo na jomaotọ no avwanre ekpẹn rẹ uvwiẹ rẹ avwanre, tanẹ, Ọsẹ wẹn je akpọ? We ji vwo omoni ọfa? Obo rẹ avwanre ta kẹ na eye obobo rọ nọ avwanre, kẹ avwanre rha riẹn nẹ ọ cha tanẹ, Reyọ ọmọsẹ wẹn rhe? 8Juda da ta kẹ Izrẹl rẹ ọsẹ rọye, Ji ọmọ na nene uvwe, ke avwanre vrẹn yanran, avwanre ke rhọ Me gbi ghwu-u, te avwanre te emọ rẹ avwanre. 9Me re esarobọ rọye; obọ mẹ wọ da nọ ekpẹn rọye; Ọ da dianẹ Me rha reyọ rhe re vwọ kẹ wẹ-ẹ, ko mẹvwẹ re ghwa abe rọye bẹdẹ, 10ọ dianẹ ke Me gbe eghẹrẹ-ẹ, mane avwanre rhe rhivwi rhe asiava re.

11Etiyin ọsẹ rayen Izrẹl da ta kẹ ayen, ọ da dia ọtiọye, gbe ru ọna: gba sanọ ibi rẹ emamọ esiri rẹ otọ na ẹvo phihọ ekpo, ra phare ọko rhe ohwo na, imi shani vẹ ọnyọ, urho, adjija, ibi ri pistachio, kugbe orhomrẹ. 12Wa ghwa ẹko re igho ivẹ nene oma, reyọ igho re dẹvọ re kru phihọ unu rẹ ibo rẹ ovwan na, ọkeọvo yẹ ọ cho ayen ẹro. 13Wa reyọ ọmọsẹ rẹ ovwan na, we vrẹn, wa rhoma bru ohwo na. 14E jẹn Ọghẹnẹ ro vwo Ẹgba kẹ ovwan aruẹdọn vwẹ obaro rẹ ohwo na, rere o siobọ nẹ ọmọsẹ wẹn ro chekọ vi Bẹnjamin rhe. Ọ da dianẹ emu ru emọ Me nana ivẹ na, ye okpemu ri ru vwe. 15Kọye ihwo na da reyọ ọko na, ayen da reyọ igho na ẹko ivẹ na nene oma, kugbe Bẹnjamin; ayen de vrẹn yanran kpo Ijipt, ayen de mudia vwẹ obaro ri Josẹf.

16Ri Josẹf vwọ mrẹ Bẹnjamin vẹ ayen, ọ da ta kẹ omuemu rẹ uwevwi rọye, Reyọ ihwo na kpo obo uwevwi, hwe eranvwe vwo chere emu, kidie ihwo na vo vwẹ cha re emu oghẹruvo na. 17Ohwo na de ru kirobo ri Josẹf ta kẹ na, o da reyọ ihwo na rhe uwevwi ri Josẹf. 18Oshọ de mu ihwo na fiki robo ra vwọ reyọ ayen rhe obo uwevwi ri Josẹf, ayen da ta, Fiki rẹ igho na, ra rhoma kru phihọ ibo kẹ avwanre dẹvo na, ọye a vwọ reyọ avwanre rhe uwevwi na, rere ayen guọnọ obo rẹ ayen ru mu avwanre, re ayen vwẹ avwanre ru eviẹn re ayen mrasa gborho ekẹtẹkẹtẹ rẹ avwanre. 19Kọye ayen da yan bru omuemu rẹ uwevwi ri Josẹf na, ayen de nene ta ota vwẹ anurhoro rẹ uwevwi na, 20ayen da ta, E ọrovwovwe, avwanre rhere vwẹ obọ rẹ ẹsosuọ re dẹ emu; 21rẹ avwanre rhi vwo te asan re de muerhọ avwanre da rhan ibo rẹ avwanre, Me vwo ni, ma da rhoma mrẹ ọko rẹ igho rẹ avwanre na vwẹ unu rẹ ibo na, e gbare dẹn kirobo re epha jovwo; kọye avwanre da rhoma ghwa ayen rhe, 22avwanre je ghwa igho efa boma rhe re ma cha vwọ dẹ emu. Avwanre rha riẹn ohwo ro phi igho na phihọ ibo rẹ avwanre-e. 23Ọ da kpahe, Wa ruẹ ẹnwa-an, wa djẹ oshọọ, Ọghẹnẹ rẹ ovwan kugbe Ọghẹnẹ rẹ esẹ rẹ ovwan ọye ri si efe nana nu vwẹ ibo na kẹ ovwan, Me reyọ igho rẹ ovwan. Ọ da reyọ Simiọn vwọ phia kẹ ayen. 24Ọke rẹ ohwo na vwọ vwẹ ayen te uwevwi ri Josẹf, ọ da vwẹ ame kẹ ayen, ayen da hworhẹ awọ rayen, ọke rha vwẹ emu kẹ ekẹtẹkẹtẹ rayen re, 25ayen da nabọ rhuẹrẹ ọko na kpahe bẹsiẹ ri Josẹf vwọ rhe vwẹ oghẹruvo, kidie ayen nyori nẹ ayen cha re emu vwẹ Etiyin. 26Ri Josẹf vwo te uwevwi re, ayen da reyọ ọko na rẹ ayen phare rhe na vwọ kẹ, ayen de diguẹ te otọ kẹ. 27Ọ da nọ ekpẹn rẹ oma rayen, ọ da nọ, Oma rẹ ọsẹ wẹn dori, ọmare rẹ ovwan ta kẹ vwẹ na? Ọ jẹn akpọ? 28Ayen da kpahe, Odibo wẹn ọsẹ rẹ avwanre na oma rọye dori, ọ jẹn akpọ? Ayen de gbe uyovwi kpotọ ayen da vwarọ. 29Ọ da kpare opharo ọ da mrẹ oniọvo rọye Bẹnjamin, ọmọ rẹ oni rọye, ọ da ta, Ọnana ọmọsẹ rẹ ovwan rẹ otete na, rẹ ovwan ta kẹ vwẹ na? Ọghẹnẹ ni arodọvwẹ wẹ, ọmọ mẹ. 30Etiyin Josẹf de bru okpakpa, kidie ọhoho rẹ oviẹ gbahọ udu fiki rẹ oniọvo rọye na, ọ da guọnọ asan rọ da viẹ. Ọ da ro uvun rọye ọ da viẹ. 31Ọ da hworhẹ opharo ọ da ro otafe; jẹ ochiri oma rọye ọ da ta, E ja jẹn emu rhe. 32Ayen da jẹn emu rọye san, a da rha jẹn ọrayen san, ihwo rẹ Ijipt re vẹ ayen gba ria na a da rha jẹn ọrayen san, fiki rẹ ihwo rẹ Ijipt vẹ ihwo ri Hibru ria emu kuẹgbe-e, kidie ọye ẹgua kẹ ihwo rẹ Ijipt. 33Ayen de tidia obaro rọye, ọkpọkpako kirobo rayen ghwote, ọmọmọ kirobo rẹ ayen boba te; o de gbe ihwo na unu ayen ohwohwo ki di nẹ ohwo. 34Imẹjẹ ri Josẹf kẹ Etiyin e de mu ẹkẹ emu rayen kẹ ayen, ẹkẹvuọvo ẹkẹ emu ri Bẹnjamin de bu te ọrayen ọvuọvo akuori. Etiyin ayen vọye da re da kugbe ghọghọ.

Currently Selected:

Jẹnẹsis 43: UBV77

Highlight

Copy