Jẹnẹsis 44

Uko ro Ghwruru

1Etiyin ọ da vuẹ omuemu rẹ uwevwi rọye nẹ, Kru emu vọn ibo rẹ ihwo na, uche oghwa rẹ ayen sa ghwa, kru igho rẹ ohwo ọvuọvo phihọ ebo rọye, 2phi uko mẹ, uko rẹ idọnọ na, phihọ unu rẹ ebo rẹ ọrotete na kugbe igho rọ rhe vwọ dẹ ọka na. O de ru kirobo ra vuẹrẹ na. 3Rẹ ọke ghwe vwo rhie nu, ihwo na ghwe krẹn te ayen te ekẹtẹkẹtẹ rayen ghwe vrẹn kọye oyan. 4Ọke rẹ ayen je ghwa yan sheri nẹ orere na-a, Josẹf de se omuemu rọye, Vrẹn vwọ tua ihwo na; wọ da djẹ mu ayen, ta kẹ ayen, Die wa vwọ vwẹ umwemwu hwosa rẹ ẹse mẹ kẹ vwẹ? 5O dia ọna ọrovwovwe vwọ da ame, ọ je dia ọna o vwọ bọ epha? Ọna we ruru na we ru chọ gangan.

6Rọ vwọ yan mu ayen nu, ọ da ta eta nana ke ayen. 7Ayen da ta ke, Die nẹrhẹ ọrovwovwe ta oghẹre re eta etiena? Idibo wẹn se ru oka re emu ọtiọna-a; 8Nighere, igho rẹ avwanre mrẹre vwe unu rẹ ibo na dẹvo ma rhoma ghwa ayen nẹ otọ ri Kenan rhe, komavọ avwanre vwo cho idọnọ eyẹ oro vwẹ uwevwi rẹ ọrovwovwe? 9Obọ ri kohwo kohwo ru wọ da mrẹ, e jo ghwu, avwanre ri chekọ na ke dia eviẹn rẹ ọrovwovwe. 10Ọ da ta, E jọ dia kirobo re wa tare na, ohwo ra mrẹrẹ vwẹ obo rọye kọ dia ọviẹn mẹ, otu ri chekọ ke riase. 11Etiyin ohwo ọvuọvo da rhan ebo rọye, 12ọ da hiẹ ayen ọvuọvo, nẹ ọkpako rhiri rẹ te omotete, ọ da mrẹ uko na vwe ebo ri Bẹnjamin. 13Ayen da bẹrẹ emwa rayen, ohwo ọvuọvo de kru oghwa kpahe ekẹtẹkẹtẹ rọye, ayen de rhivwi rhe obo orere na.

14Ọke ri Juda vẹ emesẹ rọye rhi vwo te uwevwi ri Josẹf, yọ je Etiyin; ayen de diguẹ te otọ kẹ. 15Josẹf da ta kẹ ayen, Didi emu we ruru na? Wa rha riẹn nẹ ohwo ọtio mẹvwẹ na sa mraro? 16Juda da ta, Kidie avwanre cha ta kẹ ọrovwovwe? Die avwanre mrẹ ta? Eyẹ komavọ avwanre se si oma rẹ avwanre no? Ọghẹnẹ guọnọ otọ rẹ abe rẹ idibo wẹn mrẹ nure; nighe, avwanre ke dia eviẹn rẹ ọrovwovwe, te avwanre te ekpuyovwi re ohwo ra mrẹ uko na vwẹ obọ rọye. 17Ẹkẹvuọvo o da ta, Si ota yena nu oma mi se ru ọtiọye-e; Ohwo ra mrẹ uko na vwẹ obọ rọye ọye re dia ọviẹn mẹ; ẹkẹvuọvo vwọ kẹ wẹ, we kpo bru ọsẹ wẹn egberhẹnẹdẹ.

Juda ra re kẹ Bẹnjamin

18Juda da yanran bro o da ta, E ọrovwovwe, jẹn odibo wẹn, Me rẹ wẹ, dje ota nana phihọ erhọn rẹ ọrovwovwe, wo jẹ ophu wẹn tua kpahe odibo wẹ-ẹn; kidie okpuyovwi wẹn họhọ Fero. 19Ọrovwovwe nọ idibo rọye nẹ, We ji vwo ọsẹ, eyẹ ọmọsẹ? 20Avwanre da ta kẹ ọrovwovwe, Avwanre vwo ọsẹ, ọmare, kugbe ọmọsẹ otete, ọmọ re esha rọye; oniọvo rọye o ghwuru, ọye ọvo kọye ọmọ rẹ oni rọye ro chekọ; ivun rọye vwerha ọsẹ rọye gangan. 21Etiyin wọ da ta kẹ idibo wẹn, Reyọ vwo rhe vwe, rere Me. mrẹ. 22Avwanre da ta kẹ ọrovwovwe, Ọmọ na sa yan je ọsẹ rọye vwo-o, kidie ọ da yan je ọsẹ rọye vwo, ọsẹ na ko ghwu. 23Etiyin wọ da ta kẹ idibo wẹn, jokpa ne ọmọsẹ rẹ ovwan rẹ otete na nene ovwan rhe-e, wa sa mrẹ opharo mẹ ọfa-a. 24Me vwo rhivwi bru odibo wẹn ọsẹ mẹ, avwanre da ta ota na ejobi kẹ, ọrovwovwe. 25Ọke rẹ ọsẹ rẹ avwanre vwọ tanẹ, Rhoma ra, wọ ra dẹ ememu rhe avwanre, 26avwanre da ta, Avwanre sa ra-a. Ọ da dianẹ ọmọsẹ rẹ avwanre rẹ otete na de nene avwanre ra, avwanre ke ra; kidie avwanre sa mrẹ opharo rẹ ohwo na ọfa-a jokpa nẹ ọmọsẹ rẹ ovwan rẹ otete na nene ovwan. 27Etiyin odibo wẹn ọsẹ mẹ da ta kẹ avwanre, Wa riẹnre nẹ aye mẹ vwiẹ emọ ivẹ kẹ vwẹ, 28ọvo yan ju vwe vwo, Me da ta, Uyota eranvwe rerọ nure, Me je mrẹ te ọke na-a. 29Ọ da dianẹ wa rhoma mie vwe Ọnana, emu de ruo, ẹro rẹ ọmọ mẹ na ko hwe vwe. 30Kọye, ọke ri mi vwo te asan rẹ odibo wẹn ọsẹ mẹ, ọmọ na gbi nene avwanre, kirobo rọ vwẹ akpọ kpahọ na, 31rọ da mrẹ nẹ ọmọ na rhe nene avwanre rhe-e, ko ghwu, idibo wẹn ki vwẹ ẹro mu odibo wẹn ọsẹ rẹ avwanre, ko ghwu vẹ oja. 32Odibo wẹn kọ re esarobọ rẹ ọmọ na kẹ ọsẹ mẹ tanẹ ọ da dianẹ Me rha reyọ ọmọ na rhe we-e, ke Me riabe rẹ ọsẹ mẹ vwẹ ẹdẹ rẹ akpọ mẹ ejobi. 33Vwẹ ọtiọye na, gbe jẹn odibo wẹn, Me rẹ wẹ, daji vwẹ ẹdia rẹ ọmọ na vwọ kẹ ọrovwovwe, Me dia ọviẹn kẹ wẹ rere ọmọ na vẹ emesẹ mẹ ri chekọ kpo. 34Komavọ mi se rhivwi bru ọsẹ mẹ rẹ ọmọ na gbi nene uvwe-e? Mi se yivwi mrẹ ughwu ro che hwe ọsẹ mẹ-ẹ.

Currently Selected:

Jẹnẹsis 44: UBV77

Highlight

Copy