Emọs 1
1
1Mme ikọ Emọs, keed ke atu mme akpemeedọñ ke Tekoa; ñkukịd a-anye akekịtte abaña Isrel isua iba mbemiso unyekisọñ, ke ini Usaiya akedooho adidem ke Yuda, ñko Yerobuam ayịn Yehoas akedo adidem ke Isrel.
2Anye akebo:
“Abọọñ atie ke Saiyọn akpọi
anyʌñ atie ke Yeruselem asakka nte aduma;
mbid mme akpemeedọñ asaat,
anyọñ abod Kamel anyʌñ ayeeme.”
Ubiereikpe mme Mbọhọidʌñ Isrel
3Ami ado se Abọọñ atañ:
“Ke ntak idiọọkñkpọ Damaskọs ita,
akpekọm ado inaañ, ami ndiikpəhoke akikere.
Sia anye amaanuak Kilied
ke mme akpeti e-enieghe eded,
4Ami ñyaakịm ikañ nsịn ke ufọk Hasel
a-adiita mme ñkpọsọñ itie Ben-Hadad.
5Ñyaawuut inuaatob Damaskọs;
ñyaasobo adidem a-abaaha ke Abedeñ Afen
ye anye a-akamake esañ ubọọñ ke Bed-Idịn.
Mbon Aram eyaekaa ntañmfeb ke Kii,”
Abọọñ atañ.
6Ami ado se Abọọñ atañ:
“Ke ntak idiọọkñkpọ Kasa ita,
akpekọm inaañ, ami ndiikpəhoke akikere,
sia anye amaasịn mme atu awo ke ñkpakọb,
anyʌñ anyam ammọ anọ Edọm,
7ami ñyaakịm ikañ nsịn ke mme ndibene Kasa
a-adiita mme ñkpọsọñ itie amọ.
8Ñyaasobo adidem Asdọd
ye anye a-akamake esañ ubọọñ ke Askelọn.
Ñyaawọññọ ubọk mmi ñkpọñ Ekrọn,
tutu akpatre mbon Filistia ekpañña,”
Abọọñ Andikara atañ.
9Ami ado se Abọọñ atañ:
“Ke ntak idiọọkñkpọ Tai ita,
akpekọm inaañ, ami ndiikpəhoke akikere.
Sia anye amaanyam afịd atu mbon ntañmfeb anọ Edọm,
itoiyoke edioomo nditọeka,
10ami ñyaakịm ikañ nsịn ke mme ndibene Tai
a-adiita mme ñkpọsọñ itie amọ.”
11Ami ado se Abọọñ atañ:
“Ke ntak idiọọkñkpọ Edọm ita,
akpekọm inaañ, ami ndiikpəhoke akikere.
Sia anye amaabịne ayịnete amọ ye akañkañ,
anyʌñ awoot mme ibaan ke idʌñ,
sia iyadesịd amọ amaakpeene abọhọ,
ifiobesịd amọ amaanyʌñ asak inieghe nsuuk,
12ami ñyaakịm ikañ nsịn ke Teman
a-adiita mme ñkpọsọñ itie Bosra.”
13Ami ado se Abọọñ atañ:
“Ke ntak idiọọkñkpọ Amọn ita,
akpekọm inaañ, ami ndiikpəhoke akikere.
Sia anye amaasai ibaan idịb akʌppọ ke Kilied,
nọ anye asịkke mme adaña ammọ,
14ami ñyaakịm ikañ nsịn ke mme ndibene Raba
a-adiita mme ñkpọsọñ itie amọ
ke ufọọd ñkpo ke usen ekọñ,
ye akpọsọñ afịm ke usen ayobio.
15Adidem amọ ayaakaa ntañmfeb,
anye ye mme adaaha amọ ini keed,”
Abọọñ atañ.
Currently Selected:
Emọs 1: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.