Emọs 2
2
1Ami ado se Abọọñ atañ:
“Ke ntak idiọọkñkpọ Mọb ita,
akpekọm inaañ, ami ndiikpəhoke akikere.
Sia anye amaafọp
mme akpọ ndidem Edọm ke ikañ tutu aforo ntọñ,
2ami ñyaakịm ikañ nsịn ke Mọb
a-adiita mme ñkpọsọñ itie ke Keriọd.
Mọb ayaakpa ke ndutʌhọ
ke ufọọd ñkpo ekọñ ye ke ufịt adukpoñ.
3Ñyaasobo andikara amọ,
ñnyʌñ ñwot afịd mme adaaha ye anye,”
Abọọñ atañ.
4Ami ado se Abọọñ atañ:
“Ke ntak idiọọkñkpọ Yuda ita,
akpekọm inaañ, ami ndiikpəhoke akikere.
Sia ammọ emaesịn mbed Abọọñ,
inyʌññọ inịm mme ewʌhọ amọ,
sia mme abasi abiaña emaedat ammọ etịn usʌñ,
mme abasi a-mme eteete ammọ ekekeeneke,
5ami ñyaakịm ikañ nsịn ke Yuda,
a-adiita mme ñkpọsọñ itie Yeruselem.”
Ubiereikpe Isrel
6Ami ado se Abọọñ atañ:
“Ke ntak idiọọkñkpọ Isrel ita,
akpekọm inaañ, ami ndiikpəhoke akikere.
Ammọ enyam nti awo ebọ silfa,
enyʌñ enyam mbon uweene ebọ ukod ikpaukod iba.
7Ammọ efiik iwuod mme uweene
nte ntan ke isọñ,
inyʌññọ ikpe unenikpe inọ mbon se efiik.
Ete ye ayịn enaa ye abọikpa keed
enyʌñ esappa adisana anyịñ mmi.
8Ammọ esuuk enaa ke mben afịd akpokoro uwa
ye mme afọñ e-ekebọọhọ ke ubiọñ.
Ke esịd ufọk abasi ammọ
ammọ enwọñ mmịn e-ekebọọhọ nte isob.
9“Ado ami mmaasobo mbon Amọọ ke iso ammọ,
akpesʌkado a-ammọ ekedunyọññọ nte mme eto sida,
enyʌñ esọñ idem nte eto afriyo.
Mmaasobo mfịd ammọ ke anyọñ
ye mme adʌñ ke idak isọñ.
10Ami ñkisioño ndufo ke Iyib mben ndọọk ndi,
ñnyʌñ idat ndufo usʌñ ke isua aba ke anaan
adinọọ ndufo isọñ mbon Amọọ.
11“Ami ñko mmaamek mme prọfed ke atu nditọ ndufo,
ye mbon Nasariin ke atu mme ñkparawa.
Nte ami idooho akpanikọ, nditọ Isrel?”
Abọọñ atañ.
12“Ado ndufo emaenam mbon Nasariin enwọñ mmịn,
enyʌñ enọ mme prọfed iwuuk ete ekuukịt ñkukịd.
13“Amaakem, ñyaikọk ndufo,
kpa naña ukpadñkpọ akọk ñkpọ ke ini edọññọ abakpa.
14Asọbitọk idiibọkkọke,
ñkpọsọñ awo idiikanna ikoot inweek ammọ,
ndin awo ekọñ idiikanna inyaaña uwem amọ.
15Atob utịgha idiikanna ituak ida,
awo ekọñ asọp ukod itọk idiifegheke ibọkkọ,
ndin awad enañmbakara idiinyaañake uwem amọ.
16Akpekọm awo ekọñ a-anieghe adudu akan
ayaafeghe ifed ke usen ado,”
Abọọñ atañ.
Currently Selected:
Emọs 2: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.