Emọs 3
3
Ekoot mme Ntiense Ebaña Isrel
1Ikop ikọ ami, nditọ Isrel, ikọ A-Abọọñ atañña ibaña ndufo, abaña afịd ekpək añkesịññeke ke Iyib mben ndọọk ndi:
2“Afo ikpọọñ ke ami mmek
ke atu afịd mme ekpək ke ederimbod;
ke ntoro ami ñyaimia ndufo ufen
ke ntak afịd ndiọiñkpọ ndufo.”
3Nte awo iba ekeme edisaña keed
ibọhọke ammọ enyịmme edinam ntoro?
4Nte ekpe asikuun ke akai
ke ini anye imiikịtte unam se ata?
Nte anye asisio uyio ke itie nnaa amọ
ke ini anye imiimʌmmọ ñkpọ?
5Nte inuen asifuurọ akedʌk afia ke isọñ
ke ini ndidia imiisịneke ke afia?
Nte afia asitamma ke isọñ
ke ini anye imiimʌmmọ ñkpọ ndomokeed?
6Ke ini adukpoñ asioho uyio ke abio,
nte mme awo isinyeññe idem?
Ke ini nsobo adʌkkọ abio,
nte isidooho Abọọñ asinam?
7Ke akpanikọ Abọọñ Andikara inamma ñkpọ ndomokeed
ke anye imiiyaarake uduak amọ
inọ nditọufọk amọ mme prọfed.
8Ekpe akuun
anie idiidịkkeke?
Abọọñ Andikara atañ,
anie imiidiitañña prọfesi?
9Dọkkọ mme ñkpọsọñ itie Asdọd
ye mme ñkpọsọñ itie Iyib:
“Isoobo idem ndufo ke abod Sameria;
ise ekamba ntịme a-abaaha ke esịd amọ
ye ufiik ke atu mme awo.”
10“Ammọ idiọọñọke adinam se inen,” Abọọñ atañ,
“e-ebonoke se ammọ ekoono ke mbịme
ke mme ñkpọsọñ itie ammọ.”
11Ke ntoro ami ado se Abọọñ Andikara atañ:
“Asua ayaakan abio mfo,
awuut mme ñkpọsọñ itie mfo,
anyʌñ abịme mme ñkpọsọñ itie mfo.”
12Ami ado se Abọọñ atañ:
“Kpa naña akpemeedọñ asio ke inua ekpe
akpọ ukod iba kpọd me ubaak utọñ,
kpa ntoro ke ediinyaaña nditọ Isrel e-edʌññọ ke Sameria,
ke iwuod ikʌk kpọd
ye ubaak afọñ a-atooho itie nnaa.”
13“Ikop ami inyʌñ inọ ikọ ntiense ibaña ubon Yekọb,” Abọọñ atañ, Abọọñ Abasi Andikponñkan.
14“Ke usen a-ami mmiaha Isrel ufen ke ntak idiọọkñkpọ amọ,
ñyaawuut mme akpokoro uwa ke Beteel;
eyaekpịkke mme nnʌk akpokoro uwa efep,
enyʌñ enyuuk ebon ke isọñ.
15Ami ñyaawuut ufọk winta
ndian ye ufọk ndaayio;
eyaewuut mme ufọk e-ekamake nnʌkeniin ebana,
eyaenyʌñ ewuut mme ikpọ ufọk idʌñ,”
Abọọñ atañ.
Currently Selected:
Emọs 3: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.