Emọs 4
4
Isrel Itịmmeke Ikeene Abasi
1Ikop ikọ ami, ndufo mme enañ Basan ke Abod Sameria,
ndufo ibaan e-efiighe uweene enyʌñ etʌkkọ mbon unana,
e-enyʌññọ ebo mme ebe ndufo, “Idat ukọd isọk ñnyịn!”
2 Abọọñ Andikara anwọñọ ke adisana anyịñ amọ:
“Ke akpanikọ ini ayaadi
ediiben ndufo ke uwaam ifep,
tutu ataa akpatre ke atu ndufo ke uwaam ukọ iyak.
3Ndufo keedekeed ediisaña nnen-nnen ewuọ
ekeene ñwuudo ndibene.
Eyaitop ndufo eduọñọ yak eka ke Hamọn,”
Abọọñ atañ.
4“Ikaa ikinam idiọọkñkpọ ke Beteel;
ikaa Kilkal ikinam kpasʌk idiọọkñkpọ anenekke awak.
Idat mme uwa ndufo idi afịd ubakusen,
mbaak duob ndufo kwa isua ita.
5Ifọp uyo a-asịneke yiis nte uwa ekọọm
inyʌñ inam inua ibaña enọ imaesịd ndufo;
iwọk inua ibaña ammọ, ndufo mbon Isrel,
sia se afo ama adinam adoodo,”
Abọọñ Andikara atañ.
6“Ami ñkinọọ ndufo idịb abiọọñ ke afịd abio
ye unana uyo ke afịd idʌñ,
ado ndufo itịmmeke iñkeene miin,”
Abọọñ atañ.
7“Ami mmaamʌm edịm, ndin anye ideppe inọ ndufo
ke idọk akesʌkkọ ado afiọñ ita ke iso.
Mmaanọ edịm ke idʌñ keed,
ado mmaamʌm ñkama ke idʌñ mfen.
Inwañ keed amaanie edịm;
mfen ikinieghe, ndin anye asaat.
8Mme awo emaedutịn ke abio ke abio eyem mmọọñ,
ado ikinieghe se iwak ikem se enwọñ,
ado ndufo ikitịmmeke iñkeene miin,”
Abọọñ atañ.
9“Uwak ini ami mmaatahade inwañ ye inwañ fain ndufo,
nsobo ammọ ke udọñọ ye ke ntọdibọ.
Ñkukuñkpọyọriyọ amaata eto fik ye ọlif ndufo,
ado ndufo itịmmeke iñkeene miin,”
Abọọñ atañ.
10“Ami mmaadọñ ndiọi udọñọ nsobo ke atu ndufo,
kpa naña ñkenam ke Iyib.
Ami mmaawoot ñkparawa ndufo ke akañkañ,
dian ye mme enañmbakara se ekekoono.
Ami mmaanam mme nduduiwuo ndufo eyọhọ ye utebe nnaaekọñ ndufo,
kpayeado ndufo itịmmeke iñkeene miin,”
Abọọñ atañ.
11“Ami mmaatop ndusʌk ndufo ñkappa nnịm
ukem naña ñkenam Sọdọm ye Komora.
Ndufo eketie nte ntaikañ eto e-edappake ke ikañ,
ado ndufo itịmmeke iñkeene miin,”
Abọọñ atañ.
12“Ke ntoro ami ado se mbo nnam ye ndufo, Isrel,
ndin sia mbooho nnam ami ye ndufo, Isrel,
ibeeñe idem adisoobo ye Abasi ndufo.”
13Anye a-anamma mme ikpọabod,
a-anamma afịm,
a-anyʌññọ ayaara akikere amọ anọ ubon awo,
a-anamma usiere akappa ekịm,
anyʌñ anuakka mme ñkoñ-ñkoñ itie ke ederimbod,
Abọọñ Abasi Andikponñkan ado anyịñ amọ.
Currently Selected:
Emọs 4: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.