Emọs 6
6
Adọdiọọk Anọ Mbon e-Ebaaha ke Ndueidem
1Adọdiọọk anọ mbon e-ebaaha ke ndueidem ke Saiyọn,
ye ndufo e-enieghe mbuọdidem ke Abod Sameria,
ndufo mme ikpọawo ke ñwuọnda idịd,
a-nditọ Isrel ekaaha ebịne!
2Kaa Kalne ke se anye;
ke to do kaa akwa Hamad,
ndin suuk kaa Kad ke Filistia.
Nte afọn ye ammọ akan mme abioubọọñ ndufo naña iba?
Nte isọñ ammọ akpon akan a-ndufo?
3Ndufo emesịkke usen nsobo,
enyʌñ enam ukara afai akpere.
4Ndufo ena ke ñkpana e-edatta nnʌk eniin ebana,
enyʌñ enyanna eduọk adudu ke mme ñkpọitie ndufo.
Ndufo eta ñyịn edọñ se emek
ye mme ukọkʌk ñyịn enañ.
5Ndufo ebre mme ndido udʌk ndufo nte Defid,
enyʌñ enam mme ñkpọ ubre ikwọ.
6Ndufo enwọñ ukọd ke ayọhọ usan afere,
enyʌñ efiọññọ adan se ifọn ikan,
ado ndufo ifʌhọke ibaña ñwuudo Yosef.
7Ke ntoro ndufo eyaedo keed ke atu mme akpa mbon ediika ntañmfeb;
ndia ye unwọññkpọ ndufo eyaetre.
Abọọñ Imaaha Ntañidem Isrel
8 Abọọñ Andikara amaanwọñọ ke idem amọ, Abọọñ Abasi Andikponñkan atañ:
“Mmesua ntañidem Yekọb,
ñnyʌñ nsua mme ñkpọsọñ itie amọ;
ñyaayaak abio ado nnọ
ye afịd ñkpọ ke esịd amọ.”
9Adieke ekpọññọ awo duob ke ufọk, ammọ ñko eyaekpañña. 10Ndin adieke ayakka a-adiighe adiben mme akpo nsịññe ke ufọk ñkefọp abịppe awo akeedodo a-akpedịbeke do, “Nte aba awo mfen ye afo?” ndin anye abo, “Iyoo,” ndin anye ayaadian do abo, “Dop uyio! Inaaha nte ñnyịn isiak anyịñ Abọọñ.”
11Sia Abọọñ a-anọ ewʌhọ,
ndin anye ayaanuak ekamba ufọk ñkeñe-ñkeñe,
anyʌñ anuak etək ufọk mbai-mbai.
12Nte mme enañmbakara esifeeñe ke anyọñ itiad?
Nte awo ayaadat ñyaaraenañ afʌñ akpainyañ?
Ado ndufo emekappa unenikpe esịn ke ibọkñkpa,
ndin mfịd eti ido akappa ado idod-idod;
13ndufo e-edaarake ke edikan Lo Deba#6:13 Lo Deba awuọñọ ikpuikpu.
enyʌñ ebo, “Nte ñnyịn ikikanna Kanaim#6:13 Kanaim awuọñọke mme nnʌk ; nnʌk ado idiọọñọ adudu. ke adudu idem ñnyịn?”
14Sia Abọọñ Abasi Andikponñkan atañ,
“Ñyaabenne idịd edinwana ye ndufo, Isrel,
a-adiifiik ndufo ke afịd usʌñ
tọọñọ ke Lebo Hamad tutu asịm ke itịkke Araba.”
Currently Selected:
Emọs 6: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.