Emọs 7
7
Ñkukuñkpọyọriyọ, Ikañ ye Udʌk Ñked
1Ami ado se Abọọñ Andikara akeñwọt miin: anye akesʌk anam ndutʌm abaña ñkukuñkpọyọriyọ ke ini emaekedọk ñkpọinwañ adidem kpa ke ini mfịd inwañ e-eketọọhọ akpatre eketọọñọke editịppe. 2Ke ini ammọ emaekenam isọñ asana ana ifed, ami mmaaseeme ñkoot nte, “Abọọñ Andikara, feen! Yekọb adiinam die idu uwem? Anye asịp abọhọ!”
3Ke ntoro Abọọñ amaamʌm idem.
“Ami idiitịppeke,” Abọọñ amaatañ.
4Ami ado se Abọọñ Andikara akeñwọt miin: Abọọñ Andikara akebo yak edat ikañ emia ufen; ikañ amaanam ekamba ntotəño inyañ asat anyʌñ asobo isọñ. 5Akem ami mmaaseeme ñkoot Abasi: “Abọọñ Andikara, ami mmuukpe fiin ubọk, tre! Yekọb adiinam die idu uwem? Anye asịp abọhọ!”
6Ke ntoro Abọọñ amaamʌm idem.
“Anyem ñko idiitịppeke,” Abọọñ Andikara amaatañ.
7Ami ado se anye akeñwọt: Abọọñ akeda akpere ndibene e-ekedatta udʌk ñked ebọp, ye udʌk ñked ke ubọk amọ. 8Akem Abọọñ ambịp miin abo, “Emọs, nsoo ke afo akịt?”
Ami mmaabọọrọ, “Udʌk ñked.”
Akem Abọọñ amaabo, “Se, ami mmenịm udʌk ñked ke atu ikọd mmi Isrel; ami ndiifeene nnọ ammọ aba.
9“Ñyaasobo mme ñkoñ-ñkoñ itie Aisik,
ñnyʌñ ñwuut mme ndisana itie ke Isrel;
ñyaadịppe akañkañ mmi ñnwana ye ufọk Yerobuam.”
Emọs ye Amasaiya
10Akem Amasaiya a-akedooho aku ke Beteel amaadọñ utom anọ Yerobuam adidem Isrel ate: “Emọs a-adʌk idiọọk adu ubaña fiin ke isọñ abio Isrel. Isọñ ikanna adiyọ afịd ikọ amọ. 11Sia se Emọs atañ ado ami:
“ ‘Yerobuam ayaakpa ke akañkañ,
ndin Isrel idiitreke adika ntañmfeb,
ewuọ ekpọñ isọñemana ammọ.’ ”
12Ndin Amasaiya amaabo Emọs, “Wuọ nyọñ, afo akịdñkukịd! Tịmme kaa ke isọñ Yuda. Ke nwana idem, dia ñkpọ ke udo nyʌñ tañ prọfesi mfo ke udo. 13Kuutañ prọfesi mfo aba ke Beteel, sia umi ado adisana itie adidem ye tembịd abio adidem.”
14Emọs amaabọọrọ Amasaiya, “Ami ñkedooho prọfed kpak ndooho ayịn prọfed, ñkedo akpemeedọñ, ñkenyʌñ nse ñkpọ mbaña mme eto sikamọ-fik. 15Ado Abọọñ amamben miin asio ke ukpeme edọñ anyʌñ ambo miin, ‘Kaa, ke tañ prọfesi nọ ikọd mmi Isrel.’ 16Ndin idahami, kop ikọ Abọọñ. Afo abo,
“ ‘Kuutañ prọfesi ubaña Isrel,
nyʌñ tre ukwọrọikọ mbaña ubon Aisik.’
17“Ke ntoro ami ado se Abọọñ atañ:
“ ‘Anwaan mfo ayaakappa akpara ke abio,
ndin nditọ mfo ideen ye ibaan eyaekpañña ke akañkañ.
Eyaedomo isọñ mfo ebakka,
ndin afo ke idem mfo uduukpa ke idʌñ mbon i-imiidiọọñọke Abasi.
Ndin Isrel idiitreke adika ntañmfeb,
ewuọ ekpọñ isọñ emana ammọ.’ ”
Currently Selected:
Emọs 7: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.