Dandiel 1
1
Ukpeebñkpọ a-Dandiel Akebọọhọ ke Babilọn
1Ke ayọhọ isua ita ke ini ukara Yehoiyakịm nte adidem ke Yuda, Nebukadnesa adidem Babilọn amaadi Yeruselem anyʌñ adikanna anye akʌk. 2Abọọñ amaanyʌñ akappa Yehoiyakịm, adidem Yuda asịn anye ke ubọk, ye ubaak ñkpoduoho tembịd Abasi. Anye amaakoono mme ñkpo ami akaa ke tembịd abasi amọ ke Babilọn#1:2 Ke Hibru ado Sina anyʌñ akedọñ ke ufọk ubono ñkpọuto abasi amọ.
3Akem adidem amaanọ uyio ate yak Aspenas, adaiwuod ke atu mbon utom ke akwere amọ, asio usʌk nditọ Isrel e-etooho ufọk ubọọñ ye aduuk adidem nọ edinam utom enọ adidem, 4mfọọn ñkparawa ideen se imiinieghe ndo, enie nti iwuod ukpeep afịd ñkpọ, mme adiọọñọ ñkpọ, esọp iwuod ke unie ifiọk, enyʌñ edot se ikeme edinam utom ke akwere adidem. Anye akenie adikpeep ammọ usem ye ñwed mbʌk mbon Babilọn#1:4 Akeme ido mbon Kaldi. 5Adidem amaanọ ammọ ubakka ndidia ye ukọd ke usen ke usen a-atooho akpokoro ndidia adidem. Akena enọ ammọ ukpeebñkpọ ke ufañ isua ita, mbemiso eyak ammọ edʌk enam utom ke ufọk adidem.
6Usʌk ke atu mbon se ekesio ekedo mbon Yuda: Dandiel, Hanania, Miseel ye Asaria. 7Ekamba adaiwuod ke atu mbon utom adidem amaanọ ammọ mme ufa anyịñ: Dandiel anye akoot Beltesasa, Hanania anye akoot Sedrak, Miseel anye akoot Mesak; ndin Asaria anye akoot Abedneko.
8Ado Dandiel amaabiide abo ke imọ idiisappake idem imọ ke ndidia ye ukọd ufọk adidem, anye ñko amaabeeñe ekamba adaaha abo ke ayak imọ isappa idem ke utọ usʌñ ami. 9Ndin Abasi amaanam nọ ekamba adaaha awọt Dandiel mfọn mme mbọm, 10ndin adaaha ado amaadọkkọ Dandiel ate, “Ami mmenie ndịk mbaña abọọñ mmi adidem, a-akenịmme ndidia ye ukọd ami inọọ ndufo. Anye adiinam die ikịt naña afo adiọọk idem akan ñkparawa mfen e-edooho ñka isua emana ye afo? Ami ayaanam adidem añwot miin ke ntak iwuod mfo#1:10 Ke Hibru ado ndufo.”
11Akem Dandiel amaabo awoukpeme a-adaaha ekamba akama utom akesioho abo akpeme Dandiel, Hanania, Miseel ye Asaria ate, 12“Mbọk domo nditọufọk mfo se ke usen duob: Kuunọọ ñnyịn ñkpọ ndomokeed adidia ukan mme ndisi ñkọñ ye unwọnwọñ mmọọñ. 13Amaanam se idem ñnyịn nyʌñ ben domo ye mme ñkparawa se idia ndidia adidem, ndin nam ye nditọufọk mfo keene se afo akịt.” 14Anye amaanyịmme anyʌñ adomo ammọ ase ke usen duob.
15Ke utịd usen duob, idem ammọ amaasọñ anyʌñ aseghe akan ake mme ñkparawa e-ekediaha ndidia adidem. 16Ndin awoukpeme ado amaakoono mme nsọñudua ndidia ammọ ye mme ukọd a-akenaaha ammọ enwọñ asio, akappa anọ ammọ ndisi ñkọñ.
17Abasi amaanọ ñkparawa inaañ ami ifiọk ye ikike abaña afịd mbʌk ye ukpeeb. Ñko Dandiel amaanie enọ adidiọọñọ afịd ñkukịd ye ndab.
18Ke utịd ini a-adidem akenịmme abo yak ekoono ammọ esịn ke utom ke akwere amọ, ekamba adaaha amaaben ammọ akaa iso Nebukadnesa. 19Adidem amaaneme nneme ye ammọ, ndin anye ikikịtte mbid Dandiel, Hanania, Miseel ye Asaria ndomokeed; ndin ammọ emaetọọñọ utom ke akwere adidem. 20Ke afịd mme ñkpọ se ibaña aniọñ ye ikike a-adidem akebịppe ammọ, anye amaakịt ke ammọ e-efọn akañ duob ekan afịd mbon unam mmayịk ye mbiaidiọñ ke afịd abioubọọñ amọ.
21Ndin Dandiel amaaba do tutu awuọ akpa isua ukara Adidem Sairọs.
Currently Selected:
Dandiel 1: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.