Dandiel 2
2
Ndab Nebukadnesa
1Ke ayọhọ isua ukara amọ iba, Nebukadnesa amaadappa mme ndab; akikere amọ amaatịmede, ñko anye ikikanna idaiya idab. 2Ke ntoro adidem amaanọ uyio ate ekoot mme anam mmayịk, mbiaidiọñ, mbiamfa, mbon ñkukịd ye mme aseutịn yak idọkkọ imọ se ikidappa. Ke ammọ emaekedi edida ke iso adidem, 3adidem amaabo ammọ ate, “Ami mmedappa ndab amfịnake miin, ndin ñyem adidiọọñọ se anye ada anọ.”
4Ndin mme aseutịn emaebọọrọ adidem ete, “Yak itọñ uwem asọñ adidem! Dọkkọ nditọufọk mfo ndab ado, ndin ñnyịn iyaikappa anye.”
5Adidem amaabọọrọ mme aseutịn ate, “Se ami nsọọñọ mbiere ado ami: adieke ndufo imindọkkọke miin se ñkedappa inyʌñ ikappa anye, ami ñyaanam nọ ikpok ndufo mbai-mbai enyʌñ enam mme ufọk ndufo ekappa eba nte mme eboho mbio. 6Ado ndufo ekpendọkkọ miin ndab ado enyʌñ esiak se anye awuọ, ami ñyainọ ndufo mme enọ ye mme utịb ye ekamba ukpono. Ke ntoro indọkkọ miin ndab ami inyʌñ ikappa anye innọ.”
7Ammọ emaebọọrọ ini keed mfen ete, “Yak adidem adọkkọ nditọufọk amọ ndab ami, ndin ñnyịn iyaikappa anye.”
8Akem adidem amaabọọrọ ammọ ate, “Ke akpanikọ ami mmesọọñọ ndiọọñọ ke ndufo edep ini, sia ndufo emediọọñọ ke se ami nsọọñọ mbiere ado ami: 9Adieke ndufo imiitañña ndab ami innọ miin, ufen keed kpọd ana inọọ ndufo. Ndufo emedịbe edioomo edindọkkọ miin abiaña ye mme ndiọi ñkpọ se ikeme edintịn usʌñ, ekere ke ñkpọ ayaakpəho. Do ndin, indọkkọ miin ndab ami, ndin ami ñyaadiọọñọ ke ndufo ekpaekan ekappa anye ennọ miin.”
10Mme aseutịn emaebọọrọ adidem ete, “Ibaaha awo ndomokeed ke ederimbod a-akemeke adinam se adidem abịp abaña ami! Ibaaha adidem ndomokeed, akpọkọm anye akpon die anyʌñ akoñ die, akenaanam a-abịppe utọ ñkpọ ado ato awo unam mmayịk me abiamfa me aseutịn. 11Ñkpọ se adidem abịp asọñ abọhọ. Ibaaha awo ndomokeed a-akemeke adiyaara anye nnọọ adidem ke imiibọhọke mme abasi, ndin ammọ idʌññọ ke atu mbon awo.”
12Ñkpọ ami amaayat anyʌñ afiop adidem esịd eti-eti tutu anye anọ uyio ate ewoot afịd mbon ifiọk ke Babilọn. 13Ndin emaenọ ewʌhọ ebaña adiwot mbon aniọñ, ñko emaenọ mme awo ebo ekeyem Dandiel ye mme ufan amọ nọ ewot ammọ.
14Ke ini Ariọk, adaiso mbon ukpeme adidem, akewuọhọ aka adiwot mbon ifiọk ke Babilọn, Dandiel amaakama aniọñ ye ikike atañ ikọ ye anye. 15Anye amaabịp ekamba akama utom adidem ate, “Nsoo ikinam nọ adidem anọ utọ akpọsọñ ewʌhọ ado?” Ndin Ariọk amaanam ñkpọ ami anwaña Dandiel. 16Akem Dandiel amaadʌk akesoobo ye adidem anyʌñ abeeñe abo yak inọ ini, nọ imọ ikan ikappa ndab ado inọ anye.
17Ndin Dandiel amaanyọñ akaa ufọk amọ anyʌñ akeneme ñkpọ ado anọ mme ufan ammọ Hanania, Miseel ye Asaria. 18Anye amaabo ammọ yak ebeeñe mfọn eto Abasi anyọñ ke abaña ndedịbe ñkpọ ami, mbaak ediwot Dandiel ye mme ufan amọ ukem nte mbon aniọñ mbon ako ke Babilọn. 19Emaeyaara ndedịbe ñkpọ ado ewọt Dandiel ke ñkukịd ke akonayio. Ndin Dandiel amaatooro Abasi anyọñ 20ndin Dandiel amaanyʌñ abo:
“Itooro anie anyịñ Abasi ke nsi-nsi nsi-nsi;
aniọñ ye adudu enie anye.
21Anye akpəho mme ini ye mme ayio,
anye adooro ndidem anyʌñ adịppe mbon mfen.
Anye anọ mme adiọọñọñkpọ aniọñ
anyʌñ anọ mbon ikike ifiọk.
22Anye ayaara ntotəño ye ndedịbe ñkpọ;
anye adiọọñọ se isịne ke ekịm,
unwana ñko anyʌñ adʌñ ke anye.
23Abasi mme eteete mmi, ami mmukọọm ñnyʌñ utooro fiin:
Afo amennọ miin aniọñ ye adudu,
afo ameyaara annọ miin se ñnyịn ikubeeñe fiin,
afo ameyaara ndab adidem inọ ñnyịn.”
Dandiel Akappa Ndab
24Akem Dandiel amaakaa abịne Ariọk, a-adidem akenịmme abo awot mbon ifiọk ke Babilọn, anyʌñ akedọkkọ anye ate, “Kuuwot mbon aniọñ Babilọn. Mben miin kaa iso adidem, ndin ami ñyaakappa ndab amọ nnọ anye.”
25Ariọk amaaben Dandiel abịne adidem ini keed anyʌñ akebo ate, “Ami mmekịt awo keed ke atu mbon e-ekebenne esio ke abio Yuda a-akemeke aditañ se ndab adidem awuọñọ.”
26Adidem amaabịp Dandiel (e-enyʌññọ ediọọñọ nte Beltesasa) ate, “Nte afo amekeme aditañ se ami ñkekịt ke ndab mmi anyʌñ akappa anye?”
27Dandiel amaabọọrọ, “Ibaaha ata ifiọk ndomokeed, abiamfa, anam mmayịk, me abiaidiọñ a-akemeke adidọkkọ adidem ndedịbe ñkpọ se anye abịp abaña, 28ado a-aba Abasi ke anyọñ a-akemeke adiyaara mme ndedịbe ñkpọ. Anye a-awọt adidem Nebukadnesa se idiitịppe ke mme usen ke ini iso. Ndab mfo ye mme ñkukịd se ikiboiyo ke akikere esịd mfo naña afo akenaaha ke ikʌk mfo edo ami:
29“Naña Afo Adidem akenaaha do, akikere esịd mfo amaawọññọ akaa mme ñkpọ se idiitịppe, ñko andiyaara ndedịbe ñkpọ amauwọt fiin se idiidat itie. 30Ake mmi ado ke, e-eyaara ndịbe ñkpọ ami ennọ miin, idooho nte ami nnie aniọñ se ikpon ikan awo mfen se iba ke uwem, ado nọ Afo Adidem akeme adidiọọñọ ukappa ndab ye se ikisaña iboiyo ke akikere esịd mfo.
31“Afo Adidem amaase, ndin do ke iso mfo ekamba ubobodñkpọ, ataa ekamba, nsem-nsem uyaiya ubobodñkpọ ndise amaada. 32Ekenam iwuod ubobodñkpọ ado ke ataa kold, enam ikpanesịd ye ubọk amọ ke silfa, idịb ye ifʌkkọ amọ ekedo brọns, 33mme ukod amọ ekedo ukwak, ubaak ñkpad amọ ekedo ukwak ndin ubaak ekedo aduañ. 34Idaha a-afo akesʌkkọ ase, emaekpịkke itiad esio, ado idooho ubọk awo akekpịkke. Anye amaatọ ubobodñkpọ ke ukod ukwak ye aduañ amọ anyʌñ asuan ammọ. 35Akema afịd mme ukwak ado, aduañ, brọns, silfa ye kold emaeboomo mbai-mbai enyʌñ ekappa eba nte mbio ke isọñ ukọkñkpọ ke ini ndaayio. Afịm amaakwọọk ammọ asio tutu nduud ibaaha aba. Ado itiad a-aketọọhọ ubobodñkpọ ado amaakappa ekamba abod anyʌñ atọt ayọhọ afịd ederimbod.
36“Ndab ado akedo ami, ndin idahami ñnyịn iyaikappa anye inọ adidem. 37Afo Adidem, afo ado adidem mme ndidem. Abasi anyọñ unọ fiin ukara ye adudu ye ukeme ye ubọọñ; 38anye akappa afịd ubonawo ye mme unam ke ikọd ye mme inuen ke ikpaanyọñ usịn fiin ke ubọk. Nte ammọ ekpedọdʌñ, anye anam afo ado andikara afịd ammọ. Afo ado iwuod kold ado.
39“Afo umaukpọñ ukara, abioubọọñ mfen ayaadakka ada, ado idiikponno nte ake mfo. Akem ayọhọ abioubọọñ ita, ake brọns, ayaada ukara ke afịd ederimbod. 40Ke akpatre, ayọhọ abioubọọñ inaañ ayaaba, asọñ idem nte ukwak, sia ukwak abom anyʌñ anuak afịd ñkpọ, ñko ukem naña ukwak abom ñkpọ mbai-mbai, ukem ado ke anye adiinuak inyʌñ ibom afịd mbon mfen. 41Kpa naña afo akekịt ke ubaak ñkpad ye nnuunukod ekedo aduañ, ubaak ukwak, kpa ntoro abioubọọñ ami ayaanie ubakka; ado anye ayaanie ubaak adudu ukwak ke idem amọ, ukem naña afo akekịt nte ukwak awuaha ye aduañ. 42Kpa naña mme nnuunukod ekedo ubaak ukwak ubaak aduañ, kpa ntoro ke abioubọọñ ami adiido ubaak akpọsọñ ubaak mmeem-mmeem. 43Ñko kpasʌk naña afo akekịt naña ukwak awuaha ye aduañ, kpa ntoro ke mbon ado ediido ñwuaha idiinyʌññọ isọọñọ idiana keed, kpa nte ukwak imiisisọññọ imʌm aduañ ikama.
44“Ke ini ukara mme ndidem ado, Abasi anyọñ ayaasio ubọọñ anịm a-awo imiidiisoboke ke nsi-nsi, me ediikpọñ inọ mbon mfen. Anye ayaanuak afịd mme abioubọọñ mbon ñko anyʌñ akịt utịd ammọ, ado anye ke idem amọ ayaasọọñọ ada ke nsi-nsi. 45Ami ado se ñkukịd a-abañake itiad e-ekpịkkeke esio eto ekamba abod ada anọ, ado itooho mme ubọk awo, itiad a-akebuuñọ ukwak, brọns, aduañ, silfa ye kold mbai-mbai.
“Akwa Abasi awọt adidem se idiidat itie ke iniiso. Ndab ami ado akpanikọ ñko adikappa amọ ado se enịm ke akpanikọ.”
46Akem Adidem Nebukadnesa amaaduọ ke isọñ ke iso Dandiel anyʌñ akpono anye anyʌñ anọ uyio abo yak enọ anye enọ ye insensi. 47Adidem amaadọkkọ Dandiel ate, “Ke akpanikọ Abasi mfo ado Abasi mme abasi ye Abọọñ mme ndidem ye andiyaara mme ndedịbe ñkpọ, sia afo amaakan ayaara ndedịbe ñkpọ ami.”
48Ndin adidem amaanịm Dandiel ke ñkoñ-ñkoñ itie anyʌñ anwañña ataa uwak enọ afʌk anye. Anye amaanam Dandiel akara ke afịd ikpeghe ukara Babilọn anyʌñ anam anye adaaha ke atu afịd mbon aniọñ. 49Ke akanna ado, adidem amaakop ebeeñe Dandiel ke adimek Sedrak, Mesak ye Abedneko nte ikpọ mme adaukara ke ikpeghe ukara Babilọn, ke ini Dandiel ke idem amọ akesʌhọke ke akwere ubọọñ adidem.
Currently Selected:
Dandiel 2: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.