Dandiel 4
4
Ndab Nebukadnesa A-abañake Eto
# 4: Ke mme ikpañwed Aramaik ewet Daan 4:1-3 nte Daan 3:31-33, ñko Daan 4:4-37 ewet Daan 4:1-34. 1Adidem Nebukadnesa, anọ ekọọm esọk afịd mme abio ye idịd ke afịd mme usem, e-edʌñọke ke afịd iso isọñ: Yak uforo ndufo akpon eti-eti!
2Ado inemesịd mmi ami adidọkkọ ndufo mbaña mme utịppe idiọọñọ ye mme utịppeñkpọ ñkpaidem se Ñkoñ Ñkan Abasi anam annọọ miin.
3Mme idiọọñọ amọ ekpon die,
Mme akpọsọñ utịppeñkpọ ñkpaidem amọ ekpon die!
Abioubọọñ amọ ado nsi-nsi abioubọọñ;
ukara amọ asọọñọ ada ke afịd emana.
4Ami, Nebukadnesa, ñkeba ke ufọk ke akwere mmi, mmaanie uyʌkkọ ke uwem ye mfọnọñkpọ mmi. 5Ami mmaadappa ndab a-akenamma ami ñkop ndịk. Idaha a-ami ñkesʌkkọ nnaa ke ikʌk, mme ndise ye ñkukịd se ikisaña iboiyo ke akikere esịd mmi emaensịn miin akpọsọñ ndịk ke idem. 6Ke ntoro ami mmaanọ uyio mbo yak enam afịd mbon aniọñ ke Babilọn edi ke iso mmi edikappa ndab ado ennọ miin. 7Ami mmaadọkkọ mme anam mmayịk, mbiamfa, mme aseutịn ye mbiaidiọñ ndab ado ke ini ammọ ekedieghe, ado ammọ ikikanna ikappa ndab ado innọ miin. 8Ke akpatre, Dandiel amaadi ke iso mmi, ndin ami mmaadọkkọ anye ndab ado. (Ekoot anye Beltesasa, akeene anyịñ abasi mmi, ndin sịbidịd mme ndisana abasi asịne anye ke idem).
9Ami ñkebo, “Beltesasa, etubom mbon unam mmayịk, ami mmediọọñọ ke sịbidịd mme ndisana abasi u-uba fiin ke idem, ndin ibaaha ndedịbe ñkpọ a-asọññọ ukan fiin adiyaara. Se ndab mmi mi: Kappa anye nnọ miin. 10Mme ñkukịd se ami ñkekịt idaha a-ami ñkenaaha ke ikʌk edo ami: Ami mmaase, ndin se eto adaaha mi ke iso mmi ke ufọọd isọñ. Anye amaanekke anyọọñ. 11Eto ado amaakọt, akpon anyʌñ anyọọñ aketuuk ikpaanyọñ; emaeda ke afịd utịd ederimbod ekịt anye. 12Mme mfañ amọ emaefọọn, mfịd amọ ewak, anye akenyʌñ ado ndidia anọ afịd awo. Mme unam ikọd emaenie itie nduọkadudu ke idak amọ, mme inuen emaenyʌñ edʌñ ke mme ñkọk amọ, afịd ñkpọ se ebobot emaenie ndidia eto anye.
13“Ke mme ñkukịd a-ami ñkekịtte ke ini nnaaha ke ikʌk, ami mmaase, ndin se keed a-akedooho adisana amaanda miin ke iso, isʌñutom#4:13 Akeme ido awoukpeme; se ñko ke Daan 4:17 ye 23., a-atooho hefịn asọiyọ adi. 14Anye amaatañ ke akpọsọñ uyio ate: ‘Kpịkke eto ado nyʌñ kpooño mme ñkọk amọ sịññe, kịp mme mfañ amọ nyʌñ suan mfịd amọ, yak mme unam efeeñe ewuọñọ ke idak amọ, mme inuen enyʌñ esọọrọ ke mme ñkọk amọ. 15Ado yaak itak ye mme adʌñ amọ, e-ebọppọ ke ukwak ye brọns, esʌk esịne ke isọñ, ke mbid inwañ.
“ ‘Yak mbara hefịn afʌk anye, ñko yak anye anyʌñ adʌñ ye mme unam ke ufọọd mme eto ke iso isọñ. 16Yak ekpəho akikere esịd amọ esio ekpọñ awo enyʌñ ekappa enọ anye akikere unam, tutu isua itiaba aboiyo.
17“ ‘Mme isʌñutom eben etob ami edi, mme ndisana awo esian ubiere ami, nọ mme aduuwem ediọọñọ ebo ke Ñkoñ Ñkan Abasi akaara ke afịd mme abioubọọñ ke iso isọñ anyʌñ ayaak ammọ anọ awo akeedodo a-anye amaaha anyʌñ anịm nsuuhoñkan awo nte adaaha ke iwuod ammọ.’
18“Ndab se ami, Adidem Nebukadnesa, ñkedappa ado ami. Ke ntoro, Beltesasa, ndọkkọ miin se ado awuọñọ, sia ibaaha awo aniọñ ndomokeed ke abioubọọñ mmi akanna akappa anye annọọ. Ado afo amekeme, sia sịbidịd mme ndisana abasi usịne fiin ke idem.”
Dandiel Akappa Ndab
19Ndin idem amaakpa Dandiel (e-ekenyʌññọ ekoot Beltesasa) ke etək ini; akikere amọ amaasịn anye ndịk ke idem. Ke ntoro adidem amaabo anye ate, “Beltesasa, kuuyak ndab ado me se anye ada anọ atịmede esịd mfo.”
Beltesasa amaabọọrọ anye ate, “Abọọñ mmi, akpekapado ndab ami abaña mme asua mfo ñko se anye ada anọ akpebaña mbon utọk mfo! 20Eto a-afo akekịtte, a-akekọttọ atara anyʌñ asọñ idem, e-etịñe amọ aketuuho ikpaanyọñ, nọ ekịt ke afịd iso isọñ, 21ye mfọọn mfañ ye uwak mfịd, a-akenọọhọ afịd awo ndidia, anọ mme unam ikọd itie nduọkadudu, anyʌñ anie mme itie efọk ke ñkọk amọ anọ mme inuen, 22Adidem Mmi, afo ado eto ado! Afo amekpon anyʌñ asọñ adudu, ubom mfo atara tutu awuọ ikpaanyọñ, ñko ukara mfo atara akewuọ mme ñnyan itie ke ekondo.
23“Afo Adidem amaakịt adisana awo keed, isʌñutom, nte asọiyọ ato hefịn adi adibo, ‘Kpịkke eto ami nyʌñ sobo anye, ado saana itak amọ yaak, e-ebọppọ ke ukwak ye brọns, ke mbid inwañ, ke ini mme adʌñ amọ esʌhọke ke isọñ. Yak mbara a-atooho anyọñ afʌk anye, yak anye adʌñ ye mme unam ikọd, tutu isua itiaba aboiyo.’
24“Adidem Mmi, se ndab ado awuọ ado ami, ñko ami ado ewʌhọ a-Ñkoñ Ñkan Abasi anọọhọ abọọñ mmi adidem: 25Eyaubịne fiin esio ke atu mbon awo ndin afo ayaadʌñ ye mme unam ikọd; afo ayaata mbid nte abaakenañ ndin mbara ayaanyʌñ ato hefịn ufʌk fiin. Isua itiaba ayaubọhọ fiin tutu afo awọt ke iminyịmme ibo ke Ñkoñ Ñkan Abasi ada ukara ke afịd abioubọọñ ke iso isọñ anyʌñ ayaak ammọ anọ awo akeedodo a-anye amaaha. 26Ubiere adisaana itak eto ado ye mme adʌñ ñyaak awuọñọ ke eyaemaana ekappa ubọọñ mfo unọ fiin ke ini afo amaawọt unyịmme ke Hefịn akara. 27Ke ntoro, Afo Adidem, yak unem fiin esịd adikop item mmi: kañ mme ndiọiñkpọ mfo ke adinam se inen, ye ibak mfo ke adifọn ido ye mbon se efiik. Akeme adido ke uforo mfo ayaakaa iso ke afo amaanam ami.”
Ndab ado Awuọ Asu
28Afịd ñkpọ ami amaatịppe anọ Adidem Nebukadnesa. 29Ke afiọñ duob mme iba amaakeboiyo, nte adidem akesʌkkọ asaña ke anyọñ ufọk ke akwere ubọọñ Babilọn, 30anye amaabo ate, “Nte ami idooho akwa Babilọn a-ami ñkebọppọ, nte itie idʌñ ubọọñ, ke akpọsọñ adudu mmi nnọ itooro ubọọñ mmi?”
31Idaha a-anye akesʌkkọ atatañ ikọ ado ke inua, uyio amaato ke hefịn abo anye ate, “Ewʌhọ u-unọọhọ fiin ado ami, Adidem Nebukadnesa: U-ubọ fiin adudu ubọọñ mfo. 32Eyaubịne fiin esio ke atu mme awo, afo ñko ayaadʌñ ye mme unam ikọd; afo uduuta mbid nte abaakenañ. Isua itiaba ayauboiyo fiin tutu afo awọt unyịmme ke Ñkoñ Ñkan Abasi ada ukara ke afịd mme abioubọọñ ke iso isọñ anyʌñ ayaak ammọ anọ awo akeedodo anye ayemme.”
33Ataa idaha ado se eketañ ebaña Nebukadnesa amaawuọ asu. Emaebịne anye esio ke atu mme awo, ndin anye amaanyʌñ ata mbid nte abaakenañ. Mbara anyọñ amaafʌk anye idem tutu ided akọt anye ke idem nte ñwa ntrukpuum, mbara amọ anyʌñ adunyọñ nte mbara inuen.
34Ke ini ado amaakeboiyo, ami Nebukadnesa, mmaadịppe anyen mmi nse anyọñ, ndin mmaamaana ndiọọñọ idem. Do ndin ami mmaakọọm Ñkoñ Ñkan Abasi; ami mmaakpono ñnyʌñ ntooro anye a-aduuho uwem ke nsi-nsi.
Ukara amọ ado nsi-nsi ukara;
ubọọñ amọ asọọñọ ada ke afịd emana.
35Ebat afịd mme awo ke iso isọñ
ke ikpu-ikpu.
Anye anam se anye ama
ye mme adudu anyọñ
ye mme awo ke iso isọñ.
Awo ndomokeed ikemeke adimʌm anye ubọk ñkama
me adibịp anye mbo, “Nsoo ke afo anam?”
36Kpa ke ukem ini a-ami ñkemaanake ndiọọñọ idem, emaemaana eyaak ukpono ye uku mmi ennọ miin ke ntak itooro abioubọọñ mmi. Mme anọitem ye mme ikpọ mbon ukara mmi emaedʌk eñyem miin, ndin emaemaana emben miin edot ke ebekpo mmi ndin mmaanie ukpono ñkan naña ñkenie akpa. 37Idahami, ami Nebukadnesa, mmetooro ñnyʌñ ndịppe anyịñ ñnyʌñ nnọ Adidem anyọñ ubọọñ, sia afịd ñkpọ se anye anam ado eti ñko afịd mme usʌñ amọ edo ndinen. Ndin anye akeme adisuuhọ afịd mbon se isaña ke ntañidem.
Currently Selected:
Dandiel 4: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.