Dandiel 5
5
Ubọkñwed ke Ndibene
1Adidem Belsasa amaanam ekamba usọrọ ndidia ndubiayio anọ ikpọ mbon ukara amọ, awo tọsịn keed (1,000), anyʌñ anwọñ ukọd ye ammọ. 2Naña Belsasa akesʌkkọ anwọñ ukọd amọ, anye amaanọ uyio ate ekekoono mme ukpok kold ye silfa e-ete amọ Nebukadnesa akekoonoke ato tembịd ke Yeruselem adi, nọ adidem ye mme ñkpisọñ amọ, ibaan ndọ ye ibaan esa amọ ekama enwọñ ñkpọ. 3Akem ammọ emaekoono mme ukpok kold e-eketañña esio ke tembịd Abasi ke Yeruselem, ndin adidem ye mme ñkpisọñ, ibaan ndọ ye ibaan esa amọ emaekama ammọ enwọñ ñkpọ. 4Nte ammọ ekesʌkọ enwọñ ukọd, ammọ emaetooro mme abasi e-ebotto ke kold ye silfa, brọns, ukwak, eto ye itiad.
5Ke unana idodanyen mme nnuunubọk awo emaewuọ ewet ñkpọ ke ndibene a-akekpereke ñkpọ udodikañ ke akwere ubọọñ adidem. Adidem amaase naña ubọk ado awet ñkpọ. 6Iso amaabọkkọ adidem, ñko ndịk amaanam anye tutu ukod amọ ameem ndin edọñ amọ edutọọrọ.
7Adidem amaadọñ ekoot mbiaidiọñ, mme aseutịn ye mbiamfa. Ndin anye amaadọkkọ mbon aniọñ ami ke Babilọn ate, “Awo akeedodo akanna akoot ubọkñwed ami anyʌñ andọkkọ miin se anye ada anọ, eyaesịn anye iduod-iduod afọñ enyʌñ ekọọñ anye kold ke itọñ, ñko eyaenam anye ado ayọhọ adaukara ita se ikoñ ikan ke Babilọn.”
8Ndin afịd mbon aniọñ adidem emaedʌk edi, ado ammọ ikikanna ikoot me adikappa ubọkñwed ado. 9Ke ntoro idem amaadọdiọñ anyeñ adidem Belsasa ndin iso anyʌñ adọdiọñ abọkkọ anye. Idem amaakpa mme ñkpisọñ amọ.
10Abọọñanwaan amaadʌk adi afe ndidia, ke ini anye akekoppo uyio adidem ye ake mme ñkpisọñ amọ. Anye amaabo, “Yak itọñ uwem asọñ adidem ke nsi-nsi! Kuukop ndịk! Kuunyʌñ uba ke mfʌhọ! 11Aba awo ke abioubọọñ mfo a-anieghe sịbidịd mme ndisana abasi ke idem. Ke ini ukara ete mfo, ekekịt anye nte awo a-anieghe ikike ye ifiọk ye aniọñ ukem nte mme abasi. Ete mfo, Adidem Nebukadnesa, akemek anye nte abọọñ ke atu mbon unam mmayịk, mbiaidiọñ, mme aseutịn ye mbiamfa. 12Anye akenam ami sia Dandiel, a-adidem akekoodo Beltesasa, amaanie eti iwuod, ifiọk ye ndiọọñọ idem, anyʌñ anie ukeme adikappa ndab, adisiak ñke, ñnyʌñ ñyọọ ñkpọsọñ mfịna. Dọñ ekoot Dandiel, ndin anye ayaudọkkọ fiin se ubọkñwed ado awuọñọ.”
13Ke ntoro emaeben Dandiel edi iso adidem, ndin adidem amaabịp anye abo, “Nte afo ado Dandiel, keed ke atu mbon ekebịneke esio ke abio e-ete mmi adidem akebenne ato Yuda adi? 14Ami mmekop ke sịbidịd mme abasi aba ye afo, ñko ke afo amenie ntotəño ifiọk, ikike ye ñwuọnda aniọñ. 15Emaeben mbon aniọñ ye mbiaidiọñ edi ke iso mmi adikoot ubọkñwed ami ñnyʌñ indọkkọ miin se anye awuọ, ado ammọ ikikanna ikappa. 16Idahami ami mmekop ke afo amekeme adikappa anyʌñ ayọ mme ñkpọsọñ mfịna. Adieke afo akanna akoot ubọkñwed ami anyʌñ andọkkọ miin se anye awuọñọ, eyausịn fiin iduod-iduod afọñ enyʌñ ukọọñ fiin ñkpọitọñ kold, ñko eyaunam fiin ado ayọhọ awo ita se ikoñ ikan ke ukara abioubọọñ ami.”
17Akem Dandiel amaabọọrọ adidem ate, “Afo amekeme adinịm mme enọ mfo nnọọ idem mfo anyʌñ anọ awo mfen utịb mfo. Ado ikpanna ami adikoot ubọkñwed ami nnọ adidem ñnyʌñ ndọkkọ anye se awuọñọ.
18“Afo Adidem, Ñkoñ Ñkan Abasi amaanọ ete mfo Nebukadnesa ukara ye ubom ye ubọọñ ye uyai. 19Ke ntak ñkoñ-ñkoñ itie A-Abasi akenọọhọ anye, afịd mme idịd ye mme awo ye mme usem emaebaak enyʌñ ekpono anye. Mbon se adidem akeyem adiwot, anye amaawot; mbon se anye akeyem inịm uwem, anye amaasaana ayaak; anye amaabenne mbon se anye akeyem adidịppe itie; ñko mbon se anye akeyem isuuhọ itie, anye amaasuuhọ. 20Ado ke ini ñkokkoidem ye isọñesịd ye ntañidem ekedʌkkọ esịd amọ, emaedooro anye ke ebekpo ubọọñ amọ enyʌñ ebọ anye ubọọñ amọ. 21Emaebịne anye esio ke atu mme awo enyʌñ enọ anye esịd unam; anye akedʌñ ye mme dọñki ikọd anyʌñ ata mbid nte abaakenañ, mbara amaato ke anyọñ afʌk anye idem, tutu anye akenyịmme abo ke Ñkoñ Ñkan Abasi ado andikara ke afịd abioubọọñ ke iso isọñ anyʌñ anọ awo a-anye ayemme akara ammọ.
22“Ado afo, Belsasa, ayịn amọ, usuuhọke idem mfo, akpesʌkado afo amaadiọọñọ afịd ami. 23Utu ke ado, afo amedịppe idem mfo ke anyọñ anyʌñ adomo idem mfo ye Abọọñ hefịn. Afo amaanam nọ esịññe mme ukpok ke tembịd amọ usọk fiin, ñko afo ye ñkpisọñ mfo, ibaan ndọ ye ibaan esa mfo emaekama ammọ enwọñ ukọd. Afo amaatooro mme abasi ake silfa ye kold, brọns, ukwak, eto ye itiad, idiikanna ikịt ñkpọ me ikop ñkpọ me idiọọñọ ñkpọ. Ado afo ukukponoke Abasi a-akamake uwem mfo ye afịd usʌñ mfo ke ubọk amọ. 24Do ndin anye amaanọ ubọk akewette ñkpọ ado.
25“Ñkpọ e-ekewette ado ami:
Mene, Mene, Tekel, Parsin
26“Se mme ikọ ami ewuọñọ edo ami:
“Mene#5:26 Mene akeme ido adibat me mina (udomo akʌk).: Abasi abat mme usen ukara mfo, anyʌñ aben anye akesịm utịd.
27“Tekel#5:27 Tekel akeme iwuọñọ edidomo me sekel.: Emauben fiin edot ke udomo ñkpọ, ndin ekịt ebo ke afo uyọhọke.
28“Peres#5:28 Peres akeme iwuọñọ adibakka me Pesia me ubaak mina me ubaak sekel.: E-ebakka abioubọọñ mfo enyʌñ eyaak enọ mbon Miid ye mbon Pesia.”
29Ndin Belsasa amaanọ uyio ate, esịn Dandiel iduod-iduod afọñ, ekọọñ anye ñkpọitọñ kold, enyʌñ esian anwa-anwa ke anye ado ayọhọ ñkponñkan atu adaukara ita ke abio Babilọn.
30Emaewot Belsasa, adidem Babilọn, kpa ke akonayio ado, 31ndin Dariọs awo Miid amaadat ubọọñ, anye akedo awo isua ata mme iba.#5:31 Ke ikpañwed Aramaik ufañ ami Daan 5:31 ewet Daan 6:1.
Currently Selected:
Dandiel 5: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.