Dandiel 6
6
Dandiel ke Ube mme Ekpe
# 6: Ke ikpañwed Aramaik Daan 6:1-28 ewet Daan 6:2-29. 1Akedo ñkpọ inemesịd Dariọs adimek mme iwuod ikpeghe ukara ikie mme edịb (120) adikara ke afịd abioubọọñ, 2ye mme adaiwuod ukara ita, a-akeed ke atu ammọ akedooho Dandiel. Mme iwuod ikpeghe ukara ekeba ke idak mme adaiwuod ukara nọ ato do ukaara adidem asaña afọn. 3Dandiel amaanekke anam utom amọ awuọ ada asaña-asaña ke atu mme iwuod ikpeghe ukara ye mme adaiwuod ukara ato eti ubọkutom amọ tutu adidem aduak adisio anye nnịm nte akwa adaiwuod ke afịd abioubọọñ amọ. 4Ke ntak ado, mme adaiwuod ukara ye mme iwuod ikpeghe ukara emaeyem usʌñ adidot Dandiel ikọ ke abaña naña anye anam utom ukara, ado ammọ ikikanna ikịt idiọọk ke utom amọ. Ammọ ikikịtte ñwo ke idem amọ, sia anye amaanam akpanikọ, idiaha ñwo inyʌññọ ikpọt ke utom amọ. 5Ke akpatre ideen ado emaebo ete, “Ñnyịn idiikịtte ntak se idot Dandiel uyio ibọhọke ñkpọ se ibaña mbed Abasi amọ.”
6Ndin mme adaiwuod ukara ye mme iwuod ikpeghe ukara emaekaa nte atu awo keed ebịne adidem ekebo anye ete: “Yak itọñ uwem asọñ Adidem Dariọs ke nsi-nsi! 7O! Adidem, afịd mme ikpọawo ukara, mme adaaha, iwuod ikpeghe ukara, mme anọitem ye mme adaukara enyịmme ebo ke akpena adidem anọ mbed anyʌñ asọọñọ ewʌhọ ami abo ke awo ndomokeed a-abọññọ akam anọ abasi akeedodo me awo ke ufañ usen edịb mme duob ke iso, ibọhọke ado afo, ke eyaetop anye esịn ke ube mme ekpe. 8O! Adidem, nam ewʌhọ ami nyʌñ nam ewet ke ñwed mbaak edikan ekpəho anye, akeene mbed mbon Miid ye Pesia, a-awo imiikemeke adikpəho.” 9Do ndin Adidem Dariọs amaawet ewʌhọ ado asịn ke ñwed.
10Ndin ke ini Dandiel amaakediọọñọ ke emaesuan etob ewʌhọ ami, anye amaanyọñ ufọk ke ubeed ufọkanyọñ amọ ke itie u-ubenafịm anaaha inwañ ase Yeruselem. Anye amaatọọñọ edọñ abọñ akam akañ ita ke usen anọ Abasi amọ ekọọm, ukem naña anye akesidak anam. 11Akem ideen ado emaesaña nte atu ekekịt nte Dandiel abọñ akam anyʌñ abeeñe Abasi unwam. 12Ndin ammọ emaekaa ke iso adidem ekeneme ye anye ke abaña ewʌhọ adidem ete: “O! Adidem. Nte afo ukuwette ewʌhọ anwa-anwa ubo ke awo akeedodo a-abọññọ akam anọ abasi me awo ndomokeed ke imiibọhọke afo, ke usen edịb mme duob ke iso, ke eyaetop anye esịn ke ube mme ekpe?”
Adidem amaabọọrọ ate, “Ewʌhọ ado mmọdo ada, asaña akeene mbed mbon Miid ye Pesia, a-awo imiikemeke adikpəho.”
13Do ndin ke ammọ ekedọkkọ adidem ete, “O! Adidem, Dandiel, a-adooho keed ke atu mbon se ekekoono esio ke abio Yuda, ikpañña utọñ ikop se afo atañ, me ewʌhọ afo awette ke ñwed. Anye asʌk abọbọñ akam akañ ita ke usen anọ Abasi amọ.” 14Akikere amaatịmede adidem eti-eti, ke anye adikikop ikọ ami; anye amaanekke abiide adifak Dandiel nsio, tutu ayio usen ado akekịm, adidem amaanyʌñ adomo afịd ukeme adinyaaña anye.
15Akem mme ideen ado emaesaña ke atu ekaa iso Adidem Dariọs enyʌñ ekebo anye ete, “Adidem Ñnyịn, toiyo bo ke naña asịne ke mbed mbon Miid ye Pesia awo ikemeke adikpəho ewʌhọ me mbed adidem awuukọ.”
16Do ndin adidem amaanọ uyio, ammọ ñko emaeben Dandiel edi enyʌñ etop anye esịn ke ube mme ekpe. Adidem amaadọkkọ Dandiel abo, “Yak Abasi mfo, a-afo anamma ñkpọ anọọ afịd ini, ufak fiin asio!”
17Emaeben itiad efʌk ke inua ube ado, ndin adidem amaakọp anye anyʌñ akama ñkpannuun amọ ye ake mme ñkpisọñ amọ afiik idiọọñọ anịm, mbaak edikpuho se ekebiere ebaña Dandiel. 18Ndin adidem amaanyọñ esa abọọñ amọ, ado anye ikidiaha ndidia, inyʌññọ iyak mbon mbre edi iso amọ afịd akonayio ado. Ñko anye ikikanna idaiya idab.
19Ke ataa akpa utịn usiere, adidem amaasọp idem adakka akaa ube mme ekpe ado. 20Anye akesaña akpere ube ado, anye amaabọñ akoot Dandiel ke uyio mfʌhọ, “Dandiel, awo Abasi uwem, nte Abasi mfo, a-afo anamma ñkpọ anọọ afịd ini akan ufak fiin asio ke atu mme ekpe?”
21Dandiel amaabọọrọ ate, “Yak itọñ uwem asọñ adidem ke nsi-nsi! 22Abasi mmi amaadọñ mme enyere amọ, ñko anye amaakuup mme ekpe inua. Ammọ innamma miin idiọọk, sia anye ikikịtte ndudue mmi ke iso amọ. Akenaanam ami ñko nnamma idiọọk ke iso mfo, O! Adidem.”
23Adidem amaayọhọ ye inemesịd, anye amaanyʌñ anọ uyio ate edịppe Dandiel esio ke ube. Ndin emaedịppe Dandiel esio ke ube, awo ikikịtte unan ndomokeed ke idem amọ, sia anye amaabuọt idem ke Abasi amọ.
24Ke uyio adidem, emaeben ibon e-ekedotto Dandiel uyio eketop edọñ ke ube mme ekpe ukem ye mme ibaan ye nditọ ammọ. Mme ekpe ado emaekan ammọ ubọk, enyʌñ eboom akpọ ammọ mbemiso ammọ ekewuọwuọ esịd isọñ ube ado.
25Ndin Adidem Dariọs amaawet anọ afịd mme idịd ye mme awo ke afịd usem ke iso isọñ ate:
“Yak uforo ndufo awak!
26“Ami mmenọ ewʌhọ mbo ana nte mme awo ke afịd idaha abioubọọñ mmi ebaak enyʌñ ekpono Abasi Dandiel.
“Sia anye ado aduuwem Abasi,
ñko anye aba ke nsi-nsi;
abioubọọñ amọ idiibiarake,
ukara amọ idiinieghe utịd.
27Anye a-afak anyʌñ anyaaña;
anye a-anam mme idiọọñọ ye utịppeñkpọ
ke mme hefịn ye ke isọñ.
Anye amaafak Dandiel
asio ke adudu mme ekpe.”
28Ndin ñkpọ amaafọn ye Dandiel ke ini ukara Dariọs ye ke ini ukara Sairọs awo Pesia.
Currently Selected:
Dandiel 6: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.