Dandiel 7
7
Dandiel Adappa Ndab abaña Amọn Inaañ
1Ke akpa isua ukara Belsasa, adidem Babilọn, Dandiel amaadappa ndab, mme ñkukịd ñko emaenyʌñ eboiyo anye ke akikere ke ini anye akenaaha ke ikʌk. Anye amaawet akpan ñkpọ se ibaña ndab ado.
2Dandiel amaabo ate, “Ke ñkukịd mmi ke akonayio ami mmaase, ndin ke iso mmi ami mmaakịt afịm anyọñ mbeñ inaañ nte ebịmme ewuọ ebəkko akwa akpainyañ. 3Ikpọ amọn inaañ, ammiidubiottoke emọ-emọ ndomokeed, emaeto ke inyañ ewuọñọ edi.
4“Akpa akeba nte ekpe, anyʌñ anie mba nte ntrukpuum. Ami mmaase tutu ediwai mme ñwa amọ esịññe enyʌñ edịppe anye ekpọñ isọñ, ndin anye amaada ke ukod iba nte awo, ñko emaenam anye akere ñkpọ nte ataa awo.
5“Ñko ayọhọ amọn iba amaaba ke iso mmi, a-akebaaha nte amọn. Emaedịppe anye ke ñkañ amọ keed, ñko anye akefịbe mme akpọñkañ ita ke inua ke ufọọd eded amọ. Ndin emaebo ate, ‘Dakka da nyʌñ ta abʌkunam nọ uyʌkkọ!’
6“Ke ado amaakeboiyo, ami ñkese, ayọhọ amọn ita amaada ke iso mmi, anye akebit ekpeikọd. Ñko anye akenie mba inaañ ke edem amọ nte inuen. Amọn anye ami akenie iwuod inaañ, ndin emaenọ anye unen adikara.
7“Ke ado amaakeboiyo, ami mmaakịt ke ñkukịd mmi ke akonayio, ayọhọ amọn inaañ mmọ ke iso mmi akeda, anie ndịk ye akwa adudu. Anye akenie ikpọ eded ukwak; ndin anye amaanuak anyʌñ ata afịd se anye akekịt anyʌñ asọnnọ se ikisʌhọ ke idak ñkpad. Anye amaanie adiañña ye afịd mme amọn mbon ako, anye akenie nnʌk duob.
8“Ami ñkesʌk ñkere mbaña mme nnʌk ado, se nnʌk mfen mi ke iso mmi, etək nnʌk, a-akewuọhọ ato atu ammọ; ndin emaekpʌkkọ nnʌk ita ke iso atu mme akpa nnʌk ado. Nnʌk ami akenie anyen nte anyen awo anyʌñ akpoon inua ikọ.
9“Naña ami ñkesʌkkọ nse,
“emaenam mme ebekpo ewuọñọ eda ke mme itie,
ñko Abasi Usen Esed amaatie ke itie amọ.
Afọñidem amọ akesana nte sino;
ided iwuod amọ akesana nte mfịdukịm.
Ebekpo amọ akesak ye edemeikañ,
mme wiil amọ afịd ekedo ikañ-ikañ.
10Ikañ amaasakka nte inyañ
awuọ ato iso amọ adi.
Tọsịn ke tọsịn ekese ñkpọ ebaña anye;
tọsịn duob ke tọsịn duob ekeda ke iso amọ.
Esob emaebono,
emaenyʌñ ekʌppọ mme ñwed.
11“Ndin ami mmaakaa iso nse ato ke ntak ñkpoon inua ikọ a-nnʌk ado aketañña. Ami mmaakaa iso nse tutu ewot amọn ado enyʌñ esobo ikpọkidem amọ enyʌñ etop esịn ke ekamba edemeikañ ado. 12(Emaebọi mme amọn mbon ako adudu ammọ, ado emaeyaak ammọ edu uwem ke etok ini).
13“Ke ñkukịd mmi ke akonayio ami mmaase, ndin se ke iso mmi anye a-akebitte ayịn awo, naña adi ye ntọñanyọñ ke hefịn. Anye amaasaña akpere Abasi Usen Esed ndin emaeben anye ekaa iso amọ. 14Emaenọ anye adudu, ukpono ye unen adida ke idem ñkara; afịd mme idịd ye mbon awo ke afịd mme usem emaekpono anye. Ubọọñ amọ ado nsi-nsi ubọọñ i-idiiduakka iboiyo mfep, ñko abioubọọñ amọ ado anye se awo idiiduakka ibiat ke nsi-nsi.
Adikappa Ndab ado
15“Ami, Dandiel mmaanie mfʌhọ ke sịbidịd, ñko mme ñkukịd se ikiboiyo ke akikere esịd mmi emaentịmede miin. 16Ami mmaasaña ñkpere keed ke atu mbon se ikida do ñnyʌñ mbịp anye se afịd ami awuọọñọ.
“Ndin anye amandọkkọ anyʌñ annọ miin uyaara afịd mme ñkpọ ami: 17‘Mme ikpọ amọn inaañ ami edo ndidem inaañ se idiito ke ederimbod iwuọ ida. 18Ado mme ndisana ikọd Ñkoñ Ñkan Abasi eyaebọ ubọọñ enie ke nsi-nsi, ado ntoro, ke nsi-nsi nsi-nsi.’
19“Ndin ami mmaayem adidiọọñọ se ayọhọ amọn inaañ ada anọ, a-akenieghe ukpʌhọde ye afịd mbon ako, a-akenyʌññọ anekke anie ndịk, ye eded ukwak amọ ye mbara brọns; amọn a-akenuakka anyʌñ ata mbon se anye akekan anyʌñ asọọk se ikisʌhọ ke ñkpad. 20Ami ñko mmaayem adidiọọñọ mbaña mme nnʌk duob ke iwuod amọn ye nnʌk keed anye ako a-akewuọhọ ada, ake ita mbio ako ekeduọññọke ke iso amọ, nnʌk anye akekoñño akan mbio ako, a-akenyʌññọ anie anyen ye inua, a-aketañña ikọ ye ñkpoon inua. 21Ami ñkese, nnʌk ami akesʌk anwana ekọñ ye mme ndisana awo anyʌñ akan ammọ, 22tutu Abasi Usen Esed adi adinọ ubiideikpe nọ atoppo ndisana ikọd Ñkoñ Ñkan Abasi, ndin ini amaadikem a-ammọ ekedidatta abioubọọñ enie.
23“Anye amaanọ uyaara ami: ‘Ayọhọ amọn inaañ ami ado ayọhọ abioubọọñ se idiiba ke ederimbod. Anye ayaakpʌhọ ye afịd mme abioubọọñ mbon ñko, ayaanyʌñ aben afịd ederimbod amen, asọọk anye ke isọñ anyʌñ anuak anye. 24Mme nnʌk duob ado edo mme ndidem duob se idiito iwuọñọ ke abioubọọñ ami. Ammọ emaesọiyọ, adidem mfen ayaawuọ ada ukara, anie adiañña ye mbon usen edem; anye ayaasịn mme ndidem ita ke idak amọ. 25Anye ayaatañ ikọ adian Ñkoñ Ñkan Abasi anyʌñ afiik ndisana ikọd Abasi anyʌñ anwana adikpuuñọ mme ini ye mme mbed. Eyaekappa ndisana awo edọñ ke ubọk amọ ke ini keed, mme ini ye ubaak ini.
26“ ‘Ado esob eyaebono ikpe, ndin eyaebọ anye adudu enyʌñ esobo anye afịd-afịd ke nsi-nsi. 27Ndin eyaekappa ubọọñ, adudu ye ubom afịd mme abioubọọñ ke anyọñ enọ ndisana ikọd Ñkoñ Ñkan Abasi. Abioubọọñ amọ adiido nsi-nsi abioubọọñ, ñko afịd mme adaukara eyaekpono enyʌñ ekop uyio amọ.’
28“Utịd ñkukịd ado ami. Ami, Dandiel mmaanekke nnie mfʌhọ ke akikere mmi, ndin iso amambọkkọ, ado ami mmaasịn ñkpọ ami ke esịd mmi.”
Currently Selected:
Dandiel 7: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.