Dandiel 8
8
Ñkukịd Dandiel a-Abañake Akukịmedọñ ye Ebod
1Ami, Dandiel mmaakịt ñkukịd ke ayọhọ isua ita ke ini ukara Adidem Belsasa, ke anye a-ami ñketooho ñkịt amaakeboiyo. 2Ke ñkukịd mmi ami mmaakịt idem mmi ke esịd akpọsọñ itie ke Susa ke ikpeghe Elam; ke ñkukịd ado ami ñkeba ke ñkañ Akpaubom Ulai. 3Ami ñkebenne anyen nse, se akukịmedọñ ye nnʌk iba ke iso mmi, ada ke ñkañ akpaubom ado, mme nnʌk ado emaedunyọñ. Keed ke atu mme nnʌk iba ado amaanyọọñ akan keed, ado amaadikọt ke akpatre. 4Ami mmaakịt nte akukịmedọñ ado abịmme adʌk aka usobutịn, adoro ye usuuk. Ibaaha unam ndomokeed a-akekanna akpan anye, ñko inyʌññọ iba se ikikan ifak nsio ke adudu amọ. Anye akenam se inem anye ke idem anyʌñ akaa iso akpon.
5Nte ami ñkesʌkkọ ñkere mbaña ñkpọ ami, ebod amaawuọ ke ataa iyokko ato usobutịn adi ye ñwuọnda nnʌk ke iso ufọọd anyen amọ, afrọ aboiyo ke afịd ederimbod, ado ukod amọ ikituuho isọñ. 6Anye amaasaña akpere akukịmedọñ a-akenieghe nnʌk iba a-ami ñkekịtte nte ada ke ñkañ akpaubom anyʌñ abịmme abịne anye ke akpọsọñ ifiobesịd. 7Ami mmaakịt naña anye anwana ye akukịmedọñ ado ke ifiobesịd, atuak anye anyʌñ abʌñ nnʌk amọ naña iba. Akukịmedọñ ado ikinieghe adudu adida anye ke iso; ebod ado amaatuak anye atọ ke isọñ anyʌñ asọnnọ anye ke ukod, ndin ikibaaha se ikan ifak akukịmedọñ ado isio ke adudu amọ. 8Ebod ado amaanekke anie adudu, ado ke ataa ekamba adudu amọ, ekamba nnʌk ado amaabʌññọ awuọ, ndin ke itie amọ mme awuọiso nnʌk inaañ emaetịppe ewuọ esak iso ese iso mbañ inaañ afịm e-etooho anyọñ.
9Nnʌk mfen amaatịppe ato keed ke atu ammọ, a-aketọọñọke etək-etək ado akọt ke adudu, atara akewuọ usuuk ye usakkautịn tutu ukañ Uyaiya Isọñ. 10Anye amaakọt tutu akesịm mme udịm hefịn, anye amaanyʌñ atop ubaak udịm ntantaafiọñ aduọọk ke isọñ anyʌñ afiik ammọ ke ñkpad. 11Anye amaabenne idem amọ tutu akpon nte adaiso udịmekọñ Abọọñ; anye amaaben uwa afịd usen Abọọñ afep, anyʌñ awuut adisana itie idʌñ amọ. 12Ato ke ntak nsọñiwuod, emaeyaak ikọd Abọọñ ye uwa afịd usen enọ anye. Anye amaaforo ke afịd ñkpọ se anye akenam, ndin emaetop akpanikọ eduọọk ke isọñ.
13Akem ami mmaakop naña adisana awo atañ ikọ, ndin adisana awo mfen amaabo anye ate, “Adiikpeene die mbemiso ñkukịd ami awuọ asu, ñkukịd a-abañake uwa afịd usen, nsọñiwuod a-adatta ñwuudo adi, adiyaak adisana itie idʌñ nnọọ ye adisọnnọ udịm ikọd Abọọñ ke idak ñkpad?”
14Anye amandọkkọ miin ate, “Adiidat ndubiayio ye ubakusen tọsịn iba mme ikie ita; ndin eyaemaana enam adisana itie asana.”
Adikappa Ñkukịd
15Ke ini ami Dandiel, ñkeseeghe ñkukịd ado nsʌk ñnwana adidiọọñọ se anye awuọñọ, anye a-akebitte awo amaada ke iso mmi. 16Ndin ami mmaakop uyio awo nte akoot ato Ulai, “Kebreel, dọkkọ awo ami se ñkukịd ami awuọñọ.”
17Idaha a-anye akesañake akpere itie a-ami ñkedaaha, idem amañnyeñ miin, ami mmaanyʌñ nduọ ñnyanna nnaa ke isọñ. Anye amambo miin, “Ayịn awo, diọọñọ bo ke ñkukịd ami abaña utịd ini.”
18Idaha a-anye akesʌkkọ atañ ikọ annọ miin, ami ñkeba ke ataa akpọsọñ idab, iso mmi amaanyʌñ akʌbọ ke isọñ. Ndin anye amantuuk miin anyʌñ andịppe miin adaaha ke ñkpad mmi.
19Anye amaabo ate, “Ami mbuudọkkọ fiin se idiitịppe ke ukpereedem ini ifiobesịd, sia ñkukịd ami abaña ini enịmme enọ anye ke utịd ini. 20Akukịmedọñ a-afo akekịtte nte anie nnʌk iba ada anọ ndidem Media ye Pesia. 21Adusu ebod ado ada anọ adidem Kriis, ndin ekamba nnʌk ke ufọọd anyen amọ ada anọ akpa adidem. 22Mme nnʌk inaañ e-edatta itie a-anye akebʌññọke aduọ ada anọ mme abioubọọñ inaañ se idiito idịd amọ iwuọ, ado idiinieghe ukem adudu nte anye.
23“Ke ukpereedem ini ukara ammọ, ke ini mbon nsọñiwuod emaenekke enam ibak, aniendịk adidem, ataa ayọhọ awo a-adiọọñọke ñkara, ayaada ukara. 24Anye ayaanie akpọsọñ adudu, ado idiitooho adudu idem amọ. Anye ayaabiat ñkpọ tutu idem akpa afịd awo anyʌñ akịt unen ke se adodo anye anamma. Anye ayaasobo mme ñkpọsọñ ye mme ndisana awo. 25Anye ayaaforo ato abiaña anyʌñ akịt idem amọ nte mfiọkñkan. Ke ammọ emaekere ke imisọọñọ ida, anye ayaasobo akpakʌb awo anyʌñ anwana ye Akpan ke atu mme akpanabọọñ. Kpayeado eyaesobo anye, ado idiitooho adudu ubọk awo.
26“Ñkukịd ake mme ndubiayio ye mme ubakusen e-ekunọọhọ fiin ado akpanikọ, ado fʌk ñkukịd ado nịm, sia anye abaña anyan ini ke iso.”
27Ami, Dandiel mmaakop ekaha ke idem. Ami mmaanaa ke mmemidem ke uwak usen. Akema ami mmaadakka nda ñkenam utom adidem. Ñkukịd ado amaanam mbọribọ antuak miin; anye amambọ ifiọk.
Currently Selected:
Dandiel 8: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.