Dandiel 9
9
Akam Dandiel
1Ke akpa isua ukara Dariọs ayịn Seeses#9:1 Ke Hibru ado Ahasuerus (awo ubon Media), e-ekenamma nọ ado adaukara ke abio Babilọn; 2ke akpa isua ke ini ukara amọ, ami, Dandiel mmaadiọọñọ nto Ñwed Abasi, akeene ikọ se Abọọñ akenọọ prọfed Yerimaiya, abo ke ñwuudo Yeruselem adiido isua ata mme duob. 3Ndin ami mmaawọññọ iso nse Abọọñ Abasi ñnyʌñ ñkpe anye ubọk ke akam ye ebeeñe, ke utreudia, ye ke usịne afọñikpo ye ke ntọñ.
4Ami mmaabọñ akam nnọ Abọọñ Abasi mmi ñnyʌñ ñyaara idiọọkñkpọ mmi:
“Abọọñ mmi, akwa ye anie ndịk Abasi, a-anịmme enwọñọ ima amọ ye mbon se ima anye inyʌñ inịm mme ewʌhọ amọ, 5ñnyịn iminam idiọọkñkpọ inyʌñ udue fiin. Ñnyịn imibak ibak inyʌñ isọñ iwuod; ñnyịn imiwuọ ikpọñ mme ewʌhọ mfo ye mme mbed mfo. 6Ñnyịn ikpañña utọñ inọ mme isʌñutom mfo mme prọfed, e-eketañña ikọ ke anyịñ mfo enọ ndidem ñnyịn, nditọ ideen abọọñ ye mme eteete ñnyịn, ye afịd mbon awo ke abio.
7“Abọọñ, afo ado adinen, ado mfịn ami abuud ifʌk ñnyịn iso; mbon Yuda ye mbon se idʌñọ ke Yeruselem ye afịd Isrel, ke ñkped-ñkped ye ke nsan-nsan, ke afịd mme abio se afo isuan ñnyịn adọñ ke ntak unana mbuọdidem ñnyịn ke afo. 8Abọọñ, abuud i-ifʌk ñnyịn iso ye ndidem ñnyịn, nditọ ideen abọọñ ye mme eteete ñnyịn, sia ñnyịn imudue fiin. 9Abọọñ Abasi ñnyịn anie mbọm ye ndakkannọ, akpesʌkado ñnyịn imaisọñ iwuod ye anye; 10ñnyịn ikoppo uyio Abọọñ Abasi ñnyịn, inyʌññọ inịm mme mbed se anye akinọọ ñnyịn ato mme isʌñutom amọ mme prọfed. 11Afịd Isrel e-ebiat mbed mfo enyʌñ ewọññọ ekpọñ usʌñ, ke adisịn adikop uyio mfo.
“Ke ntoro e-enwañña mme isuuñọ ye mme ubiere enwọñọ se ekewet ke Mbed Moses, awo Abasi, ifʌk ñnyịn ke idem, sia ñnyịn imudue fiin. 12Afo amenam mme ikọ se eketañ ibaña ñnyịn ye mme adaukara ñnyịn ewuọ esu ke adiben ekamba nnananyen inọọ ñnyịn. Akenam awo inamma utọ ñkpọ e-enamma Yeruselem mi akpa ke afịd idak anyọñ. 13Kpa naña ewet ke Mbed Moses, afịd ukuud ami isịm ñnyịn, kpayeado, ñnyịn inieghe aniọñ iyem mfọn Abọọñ Abasi ñnyịn, ke adikappa esịd ñkpọñ mme idiọọkñkpọ ñnyịn ñnyʌñ ñkpañ utọñ nnọọ akpanikọ mfo. 14Abọọñ ikibiatta ini adiben ukuud ami idot ñnyịn, sia Abọọñ Abasi ñnyịn anen ke afịd se anye anam, ado ñnyịn ikoppo uyio amọ.
15“Idahami, Abọọñ Abasi ñnyịn, a-akebenne ikọd mfo asio ke isọñ Iyib ye akwa ubọk, a-akenyʌññọ anam anyịñ mfo awuọ etob tutu usen mfịn ami, ñnyịn imudue fiin, iminam idiọọkñkpọ. 16Abọọñ, nte asañake ke mme ndinen adinam mfo, wọññọ iyadesịd ye ikpakkaesịd mfo kpọñ Yeruselem, abio mfo, adisana abod mfo. Ndiọiñkpọ ñnyịn ye mme ukwaññkpọ mme eteete ñnyịn e-enam Yeruselem ye ikọd mfo edo ñkpọ nsaha enọ afịd mbon se ikanna ñnyịn ikʌk.
17“Mbọk, Abasi ñnyịn, kop mme akam ye ebeeñe awo mfo idahami. Ke ntak mfo, mbọk Abọọñ, nie mbọm baña ñwuudo adisana itie idʌñ mfo. 18Abasi ñnyịn, mbọk kpañ utọñ nyʌñ kop; tat anyen mfo nyʌñ se ñwuudo abio a-akereke Anyịñ mfo. Ñnyịn inamma mme ebeeñe ami unọ fiin ato ke adinenido ñnyịn, ado ato ke ntak akwa mbọm mfo. 19Abọọñ! Mbọk kpañ utọñ! Abọọñ, mbọk feen! Abọọñ, mbọk kop nyʌñ nam! Ke ntak mfo, Abasi mmi, mbọk kuukpeene, sia abio mfo ye mbon mfo ekere Anyịñ mfo.”
Mme Ata mme Duob i-itie Itiaba
20Ke idaha a-ami ñkesʌkkọ ntañ ikọ ñnyʌñ mbọñ akam, ñyaara ndudue mmi ye ndudue ikọd mmi Isrel, ñnyʌñ nnam ebeeñe mmi nnọ Abọọñ Abasi mmi ke ntak adisana abod amọ; 21ke ini ami ñkesʌkkọ mba ke akam, Kebreel, awo a-ami ñkekịtte ke akaan ñkukịd, amaasọp afeghe ambịne ke idaha ini uwa ndubiayio. 22Anye amannọ item anyʌñ ambo miin ate, “Dandiel, ami mmedi idahami adunọọ fiin ikike ye ifiọk. 23Kpa idaha a-afo aketọọñọke adibọñ akam, uyio amaawuọ, a-anamma nọ ami ndi ndudọkkọ fiin, sia afo amenekke anie ukpono. Ke ntoro, tịm kere ikọ ado nyʌñ diọọñọ ñkukịd ado:
24“Ata mme duob ke itie itiaba ado ini enịmme enọ ikọd mfo ye adisana abio mfo adibiat mbed mmaa, aditre unam idiọọkñkpọ, adikpe ubọk ke ibak, adiben nsi-nsi adinenido ndʌk ndi, aditre ñkukịd ye prọfesi ye adinyʌñ ñyet Ataa Adisana Itie adan nnịm.
25“Diọọñọ nyʌñ nie ifiọk baña ami: Tọọñọ ke ini se ikọ akewuọ yak emaana ediọñ enyʌñ etịmme ebọp Yeruselem tutu a-anye e-Ekeyette Adan Enịm, andikara, adi, adiido itiaba ‘ke itiaba,’ ata mme iba ke ‘itiaba.’ Eyaemaana ebọp anye ye mme efaak ye ukpe, ado adiido kpa ke ini ukuud. 26Ke mme ata mme iba ke ‘itiaba’ ado emaeboiyo, eyaewot Anye e-Ekeyette Adan Enịm ñko anye idiinieghe ñkpọ ndomokeed. Mbon andikara ado se idiidi eyaebiat abio ye adisana itie. Utịd ini adiidi nte mmọọñ ukwọ: Ekọñ ayaakaa iso tutu utịd, emaenyʌñ ewet mme nsobo enịm. 27Ndin anye ayaasọọñọ edioomo ye uwak awo ke ufañ udua keed. Ñko ke ufọọd udua ado anye ayaatre uwa ye enọ. Ndin anye a-anamma nsobo ayaato ke mba mme mbubiam adi, tutu enwañña utịd e-ewette enọ anye efʌk anye.”
Currently Selected:
Dandiel 9: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.