Dandiel 10
10
Ñkukịd Dandiel a-abañake Awo
1Ke ayọhọ isua ita ke ukara Sairọs, adidem Pesia, emaenọ Dandiel (e-ekekoodo Beltesasa) uyaara. Etob a-Dandiel akebọọhọ ato uyaara ado akedo akpanikọ, ñko anye akebaña ekamba ekọñ. Ekeyaara ifiọk etob ado enọ anye ke ñkukịd.
2Ke ini ado, ami Dandiel, mmaafʌhọ udua ita. 3Ami ñkidiaha umemek ndidia, unam me ukọd ndomokeed ikinyʌññọ ituuk ñkpọkinua mmi; ñko ami ñkifiọññọke adan ndomokeed tutu mme udua ita ado eboiyo.
4Idaha ami ñkedaaha ke mben akwa inyañ Tikris, ke ayọhọ usen edịb mme inaañ ke akpa afiọñ, 5ami ñkebenne anyen nse, awo a-akesịneke linen afọñ mmọdo ada ke iso mmi, atobo uyaiya ñkpaha isịn kold a-atooho Ufas akanna isịn amọ. 6Idem amọ akeba nte topas, iso aba nte akebkeb, anyen aba nte edemeikañ, ubọk ye ukod nte unwana atọọtʌk brọns, ndin uyio amọ akeba nte uyom atu awo.
7Ami, Dandiel ñkedo ukweeñe awo a-akekịtte ñkukịd ado; mbon se ikiba ye ami ikikịtte anye, ado utọ akwa uteeñe se ikimʌm ammọ amaanam ammọ efeeñe ekedịbe. 8Ke ntoro ami ikpọọñ ñkese ekamba ñkukịd ado; adudu ikimbaaha miin aba ke idem, iso amambiara unam ndin unwam ikibaaha innọ miin. 9Ami mmaakop naña anye atañ ikọ, ndin nte ami ñkekpañña utọñ nnọ anye, eka idab amaammʌm miin, ndin ami mmaakʌp iso ke isọñ.
10Ubọk amantuuk miin anyʌñ anam ubọk ye edọñ mmi eñnyeñ. 11Anye amaabo, “Dandiel, afo amenekke anem Abasi esịd, nekke tịm kere baña mme ikọ a-ami mbooho udọkkọ fiin, nyʌñ dakka da, sia endọñ miin utom unọ fiin idahami.” Ndin ke anye amaaketañ ami annọ miin, ami mmaadakka nda ye ñnyeñidem.
12Akem anye amaakaa iso, “Dandiel, kuufeghe ndịk. Tọọñọ ke akpa usen a-afo akebiideke ke akikere esịd mfo adibeeñe ifiọk ñnyʌñ nsuuho idem mfo ke iso Abasi mfo, emaekop akam uyio mfo, ndin ami ndi ke ibọọrọ ado. 13Ado akpanabọọñ abio Pesia amambiọñọ miin ke usen edịb mme keed. Do ndin Maikel, keed ke atu mme enyere ukpeme abọọñ, amaadinnyaaña miin, sia ami ñkeba do ye adidem Pesia. 14Idahami ami mmedi adinam nọ unwaña fiin se idiitịppe inọ mbon mfo ke iniiso, sia ñkukịd ado abaña ini se idiidi ke iso.”
15Idaha a-anye aketañña ikọ ado ye ami, ami mmaasuuk iso mmi nse isọñ, ñkinyʌññọ ñkan nsio uyio. 16Akem awo keed a-akebitte awodeen amaatuuk ñkpọkinua mmi, ndin ami mmaakʌppọ inua mmi ñnyʌñ ntọọñọ aditañ ikọ. Ami mmaabo anye a-akedaaha ke iso mmi nte, “Abọọñ mmi, ukuud añkan miin ubọk ato ke ntak ñkukịd ado, ñko idem ammem ataa eti-eti. 17Abọọñ mmi, ami awo mfo, ñkeme die aditañ ikọ ye afo? Adudu mmi akweeñe, ñko a-anekke asọñ ami adinweek inweek.”
18Ndin anye a-akebitte awo amaamaana antuuk miin anyʌñ annọ miin adudu. 19Anye amaabo miin, “Kuuyak idem unyeñ, afo a-anekkeke anem Abasi esịd. Bọ emem! Sọñ idem idahami; sọñ idem.”
Idaha a-anye aketañña ikọ ye ami, ami mmaakop adudu ñnyʌñ mbo nte, “Abọọñ mmi tañ, sia afo amennọ miin adudu.”
20Ndin enyere amaabo ate, “Afo amediọọñọ ntak a-ami ndiighe ubịne fiin? Ke etək ini ami ñyaatịmme ñkenwana ye akpanabọọñ Pesia, ndin ami mmaaka, akpanabọọñ Kriis ñko ayaadi; 21ado ke akpa ifed ana ami udọkkọ fiin se ewet esịn ke Ñwed Akpanikọ. (Ibaaha awo se ida ye ami inwana ye ammọ ke amaaboiyo Maikel, akpanabọọñ mfo.
Currently Selected:
Dandiel 10: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.