Dandiel 11
11
1Ñko ke akpa isua ukara Dariọs awo Miid, ami mmaawuọ nda adinwam ñnyʌñ ñkpeme anye).
Ndidem Usuuk ye Adoro
2“Ami udọkkọ fiin akpanikọ: Ndidem ita mfen eyaedakka eda ukara ke Pesia, ndin ayọhọ inaañ ayaamọinyọ akan afịd mbon ñko. Anye amaabọ ukara akeene naña anye amọinyọ, anye ayaanam afịd mme awo eda keed etịppe ekọñ ye abio Kriis. 3Ndin akpọsọñ adidem ayaadakka ada, anye adiikara ye akpọsọñ adudu anyʌñ anam se inemme anye. 4Ke anye amaadakka ada ukara, eyaebakka abioubọọñ amọ enyʌñ edeeme anye edọñ ke ikpeghe afịm mbeñ anyọñ inaañ. Ukara ado idiikaaha ibịne mbon ubon amọ, idiinyʌññọ inie utọ adudu a-anye akenieghe, sia eyaedịppe ubọọñ amọ enọ mbon mfen.
5“Adidem Usuuk ayaasọñ adudu, ado keed ke atu mme adaiso ekọñ amọ ayaasọñ adudu akan anye anyʌñ akara abioubọọñ amọ ye akpọsọñ adudu. 6Ke mme isua ifañ emaeboiyo, ammọ eyaenam edioomo ndukoppo. Ayịn awonwaan adidem Usuuk ayaakaa ukañ adidem Adoro adinam emem ndukoppo, ado anye idiimʌmmọ adudu ke ifịm ubọọñ amọ ikama, ñko anye ye ubọọñ amọ idiikpeeneke. Ke mme usen ado, eyaebiaña anye ye afịd mme nsaña ubọọñ amọ ye ete amọ ye awo a-akedaaha ye anye.
7“Awo keed a-atooho aduuk amọ ayaadakka ada adat itie amọ. Anye ayaanwana ye udịmekọñ adidem Adoro anyʌñ aboiyo adʌk akpọsọñ itie amọ, anye ayaanwana ye ammọ anyʌñ akan. 8Anye ayaakoono mme abasi ammọ, mme usọsọi ñkpọ, mme ubobodñkpọ ukwak ammọ ye mme nsọñudua ñkpọ mme silfa ye kold ammọ anyʌñ atañ ammọ akaa ke Iyib. Ke ñkpọ nte isua ifañ anye ayaadakka akpọñ adidem Adoro. 9Akem adidem Adoro ayaadi ekọñ ke isọñ ukara adidem Usuuk, ado anye ayaatịmme edem anyọñ abio amọ. 10Nditọ amọ eyaebeeñe idem enọ ekọñ enyʌñ ekoot akwa atu mbon ekọñ ebon, e-ediikwọọk nte akaakan mmọọñ ukwọ enyʌñ enwana ekọñ tutu ekewuọ akpọsọñ itie adidem Usuuk.
11“Ndin adidem Usuuk ayaasaña awuọ ke ikpakkaesịd ye udịmekọñ anyʌñ anwana ye adidem Adoro, a-adiikama akwa udịmekọñ, ado eyaekan anye. 12Anye amaakan udịmekọñ ami, ntañidem ayaayọhọ adidem Usuuk idem ñko anye ayaawot uwak tọsịn, ado edikan amọ idiikpeeneke. 13Sia adidem Adoro ayaamaana asio udịmekọñ mfen, a-awakka akan akpa; ndin ke uwak isua amaaboiyo, anye ayaatịmme adʌk ye ekamba udịmekọñ a-anieghe uwak ñkpọ ekọñ.
14“Ke mme ini ado uwak awo eyaedakka eda utọk ye adidem Usuuk. Mbon afai ke atu mbon ndufo eyaenam ntịmme nọ ñkukịd ami asu, ado idiikịtte unen. 15Ndin adidem Adoro ayaadibọp ikpọ ebono ekọñ anyʌñ amʌm akpọsọñ abio. Mbon ekọñ Usuuk idiikanna isọọñọ ida inwana ye ammọ; akpekọm ataa nti mbon ekọñ ammọ idiinieghe ukem adudu adinwana. 16Andito ndi ekọñ ayaanam naña anye amama; awo ndomokeed idiikanna ida anye ke iso. Anye ayaasio idem amọ anịm ke Uyaiya Isọñ anyʌñ anie adudu adisobo anye. 17Anye ayaabiide adiben adudu afịd abioubọọñ amọ ñnyʌñ nnam emem ndukoppo ye adidem Usuuk. Anye ñko ayaanọ adidem Usuuk adiaha amọ ke ndọ nọ ato do anye akan adooro anye ke ubọọñ, ado uduak amọ idiiwuọhọ isu, idiinwamma, idiinyʌññọ ifọn ye anye. 18Ndin anye ayaakanna iso ase mme mben inyañ anyʌñ akan uwak ammọ, ado adaiso ekọñ keed ayaatre afịd usọñanyen amọ anyʌñ amaana akappa asuenne ado anọ anye. 19Ke ami amaaboiyo, anye ayaatịmme edem, akappa iso ase mme akpọsọñ itie ke isọñ abio amọ, ado ayaatuak ukod aduọ, tutu awo ikịtte anye aba.
20“Awo andidad itie amọ ayaasio awo ubọ taks nọ ekama enam ndutʌm abioubọọñ. Ke isua ifañ ke iso, eyaesobo anye, ado idiidooho ke iyadesịd me ke ekọñ.
21“Ekpo-ekpo awo keed e-ediinọọhọ ukpono ubọọñ ayaadat itie amọ. Anye ayaadat ukara ke ini mme andinie abio ebaaha ke ifuuro, anye adiikama ñkara ye nneminua ibọ ukara. 22Ke ami amaaboiyo eyaekwọọk ekandịk udịmekọñ esio ke iso amọ; eyaesobo anye ye akpanabọọñ edioomo efep. 23Ke anye amaanyịmme nọ edʌk edioomo ye anye ima, anye ayaanam ido nsu, ñko ayaakama etək udịm awo ifañ amaana abọ ukara. 24Ke ini mme ikpeghe ukara se imọinyọ ikan emaeba ke ifuuro, anye ayaanam ekọñ ye ammọ anyʌñ anam se mme ete ye mme eteete amọ imiikikanna inam. Anye ayaadeeme mme mbịme, ñkpọ ñwo ye inie anọ ikọd amọ. Anye ayaanam ndịbe uduak abaña adidat mme ñkpọsọñ itie adidem, ado idiikpeeneke.
25“Anye ayaakama akwa udịmekọñ amọ ye adudu ye uko anam mfịna ye adidem Usuuk. Adidem Usuuk ayaaben akwa akpọsọñ udịmekọñ anam ekọñ, ado idiikanna, ato ke ntak mme ndịbe uduak e-ekenamma ebaña anye. 26Mbon e-ediaha ndidia eto ke udeeme ñkpọ ufọk adidem eyaenwana adisobo anye; eyaekwọọk udịmekọñ amọ efep, ñko uwak eyaekpañña ke iso ekọñ. 27Ndidem iba ami, e-esịd ammọ esʌkkọ eyem unam ibak, eyaebono ke akpokoro keed enyʌñ esʌhọ nsu enọ idem ammọ, ado ufọn idiibaaha, sia utịd ana adi ke ini e-ekenịmme. 28Adidem Adoro ayaatịmme anyọñ abio amọ ye uwak inie, ado esịd amọ adiisʌk iwọwʌhọ ke adibiat adisana edioomo. Anye ayaanam uduak amọ ke abaña ado mbemiso anye atịmme anyọñ abio amọ.
29“Ke akemini anye ayaamaana anam ekọñ ye Usuuk, ado isañ anyem idiidooho naña akedo akpa. 30Mme nsʌñikañ e-etooho mme mben mmọọñ usobutịn eyaenwana ye anye, ndin esịd ayaabʌññọ anye. Ndin anye ayaatịmme edem akenwañña ifiobesịd amọ afʌk adisana edioomo. Anye ayaatịmme anyọñ akappa akewọt mbon se ikikanna edem iwọt adisana edioomo mfọn.
31“Mme udịmekọñ amọ eyaedakka eda adisappa akpọsọñ itie tembịd eyaenyʌñ etre mme uwa esinamma afịd usen. Akem ammọ eyaesio mbubiam enịm a-adatta ñwuudo adi. 32Anye ayaakama nneminua abiat mbon se ikisappa edioomo ado, ado mbon e-ediọọñọke Abasi ammọ eyaesọñ eda esịn anye.
33“Mbon aniọñ eyaenọ uwak awo item, ado ke etək ini ammọ eyaekpañña ke akañkañ, imiidooho eyaefọp ubaak ke ikañ, emuum usʌk enyọñọ enyʌñ ebịme inie ubaak ammọ. 34Ammọ emaeduọññọ, eyaebọ etək unwam, ndin mbon se idiinamma akpanikọ eyaekeene ammọ ke mbubịk. 35Usʌk mbon aniọñ eyaetuak ukod, nọ ato do esịññe ammọ ndek ke idem, enam ammọ esana, enyʌñ enana ndo tutu utịd ini, sia ami ana atịppe ke ini e-ekenịmme.
Adidem a-Akokkoke Idem
36“Adidem ado adiinam se inem anye esịd. Anye ayaakokko idem anyʌñ anịm idem amọ nte ñkponñkan afịd ntək abasi, ayaanyʌñ atañ mme ñkpọ se awo idiikoppo akpa abaña Abasi mme abasi. Anye ayaakịt unen tutu ini ifiobesịd adikem, sia se ekebiere ana adat itie. 37Anye idiidiọọñọke mme abasi mme eteete amọ me inọ anye se ibaan eyem, me ake abasi ndomokeed, ado ayaakokko idem amọ akan afịd ammọ. 38Utu ke ado, anye ayaakpono abasi mme ñkpọsọñ itie, anye ayaakpono abasi a-mme eteete amọ imiikidiọọñọke ke kold ye silfa, ye nsọñudua itiad ye mme enọ. 39Anye ayaanwana ye mme ñkponñkan akpọsọñ itie akeene unwam isen abasi, ndin ayaanyʌñ anekke akpono mbon se idiọọñọ anye. Anye ayaanam ammọ edo mme andikara uwak awo anyʌñ adeeme isọñ anọ ammọ ke ekọmudua.
40“Ke ukpere edem ini adidem Usuuk ayaanwana ye anye ke iso ekọñ, ñko adidem Adoro ayaabịmme awuọ ye mme sariọd ye mbon ekọñ usaña ke enañmbakara ye akwa udịm ubom nsʌñikañ amọ. Anye ayaanam ekọñ ye uwak idʌñ anyʌñ akwọọk ammọ nte mmọọñ ukwọ. 41Anye ayaakaa ekọñ ye Uyaiya Abio. Uwak mme abio eyaeduọññọ, ado Edọm, Mọb ye mme adaaha ke Amọn eyaebọkkọ. 42Anye ayaatat ubọk adudu ukara amọ awuọ uwak idʌñ, Iyib ñko idiibọkkọke. 43Anye ayaabọ mme itie unịm inie kold ye silfa ye afịd mme inie Iyib, ndin mbon Libia ye mbon Kuus eyaesuuk iwuod enọ anye. 44Ado mme etob se idiito usakkautịn ye adoro eyaesịn anye ndịk ke idem, anye ñko ayaadakka ada ke akwa ikpakkaesịd adisobo ñnyʌñ ñwot uwak awo. 45Anye ayaawuuk atayad ubọọñ amọ ke ufañ inyañ iba ke uyaiya adisana abod. Kpayeado, utịd amọ ayaadi, ndin awo ndomokeed idiinyaañake anye.
Currently Selected:
Dandiel 11: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.