Esikeel 39
39
1“Ayịn awo, tañ prọfesi baña Kọk nyʌñ bo: ‘Ntom ke Abọọñ Andikara atañ abo: Kọk, iwuod ke atu nditọ ideen adidem Mesek ye Tubal, ami mmenie ikọ ye afo. 2Ami ñyauwọññọ fiin nnịm ñnyʌñ udʌt fiin ñwere. Ami ñyauben fiin nto anyan adoro ñnyʌñ udọñ fiin aka ikpọabod Isrel. 3Ndin ami ñyaukpakka fiin utịgha ke ubọk ufiin nsio ñnyʌñ nnam mme idañ mfo eduọ ke ubọk nnasia. 4Afo ayaaduọ ke mme abod Isrel, afo ye afịd udịmekọñ mfo ye mme idịd e-ebaaha ye afo. Ami ñyauben fiin nnọ afịd utọ inuen mba ye mme afai unam ke ikọd nte ndidia. 5Afo ayaaduọ ke akpa inwañ, sia ami mmetañ: Uyio Abọọñ Andikara ado ami. 6Ami ñyaadọñ ikañ aketa Makọk ye mbon e-edʌñọke ke ifuuro ke mme mben inyañ, ndin ammọ eyaediọọñọ ke ami ndo Abọọñ.’
7“ ‘Ami ñyaanam ammọ ediọọñọ adisana anyịñ mmi eto mbon mmi Isrel. Ami ndiiyakka aba nọ esappa anyịñ mmi ndin mme idịd eyaediọọñọ ke ami Abọọñ ndo Adisana ke Isrel. 8Abọọñ andikara atañ: Asʌk adi! Anye idiitreke adidat itie. Usen a-ami ñketañña mbaña ado ami.
9“ ‘Ndin mbon e-edʌññọ ke mme abio Isrel eyaewuọ ekekama ñkpọ ekọñ ebara ikañ esịn enyʌñ efọp ammọ, ntək ye ikpọ atuekọñ, mme utịgha ye idañ, esañ ubọk ekọñ ye eduad. Ke isua itiaba ediikama ammọ nte ñkpọ ubaraikañ. 10Ammọ idiikịtte ntak adikitañ ifia ke inwañ me adikikpịkke ke akai, sia adooho ammọ ediidat ñkpọ ekọñ ammọ nte ifia. Ñko ammọ eyaebịme mbon se ikibịme ammọ enyʌñ ewo mbon e-ekewooho ammọ, Abọọñ atañ.
11“ ‘Ke usen ado ami ñyaanọ Kọk itie ubuuk awo ke Isrel, kpa ke abedeñ mbon e-ekaaha isañ ke Akpainyañ edem usakkautịn. Anye ayaasiit usʌñ mbon esikaaha isañ, sia adooho Kọk ye afịd udịm ammọ ediibʌhọ do. Ke ntoro ediikoot anye Abedeñ Hamọn Kọk.#39:11 Hamọn Kọk awuọñọ mme atutu Kọk.
12“ ‘Ndin ufọk Isrel eyaedat afiọñ itiaba ebuuk ammọ nọ ato do enam isọñ asana. 13Afịd mbon isọñ ami ediibuuk ammọ, ndin usen se ami ndiiyaara ubọọñ mmi adiido usen uwuọetob editoiyo inọ ammọ, Abọọñ Andikara atañ. 14Ammọ eyaebakka mme awo enịm kwa ini ebo enam isọñ asana. Ammọ eyaesuana eyọhọ isọñ ye mme mbon mfen, ammọ eyaebuuk afịd mme akpo awo akeedodo e-enaaha ke isọñ.
“ ‘Ke afiọñ itiaba ado amaaboiyo, ammọ eyaenekke enam nduuñọ. 15Kpa naña ammọ esaña ekanna isọñ, awo ndomokeed a-akịtte akpọ awo ana anịm idiọọñọ ke ndo tutu mme atịppe udi ediben ebuuk ke Abedeñ Hamọn Kọk, 16ke ñkpere abio e-ekoodo Hamọna#39:16 Hamọna awuọñọ atutu.. Ndin ammọ eyaenam isọñ asana.’
17“Ayịn awo, ntom ke Abọọñ Andikara atañ: Sio uyio koot afịd utọ inuen ye afịd mme afai unam ikọd: ‘Iboho keed inyʌñ ito ke naña afịd ñkọk idi akpokoro uwa a-ami nnamma inọọ ndufo, ekamba uwa ke mme abod ke Isrel. Do ke ndufo ediita abʌk enyʌñ enwọñ iyiib. 18Ndufo eyaeta abʌk ñkpọsọñ ideen enyʌñ enwọñ iyiib nditọ ideen mbọọñ ke ederimbod nte ammọ edoñño mme akukịmedọñ ye nditọedọñ, ebod ye ñyaaraenañ, afịd ammọ edoñño mme ukọkʌk unam e-etooho Basan. 19Ke uwa a-ami ndiinam inọ ndufo, ndufo eyaeta akpọñ tutu anye ikak ndufo enyʌñ enwọñ iyiib tutu anye inaam. 20Ke akpokoro mmi ndufo eyaekop uyʌkkọ edita enañmbakara ye mme awad enañmbakara, mme ñkpọsọñ awo ye mbon ekọñ ke utọ ke utọ’ Abọọñ Andikara atañ.
21“Ami ñyaayaara ubọọñ mmi ñwọt mme idịd, ndin afịd idịd eyaekịt ufen se ami ndiimia ammọ ye ubọk se ami ndiiyaak ndot ammọ. 22Tọọñọ ke usen ado kaa iso, nditọ Isrel eyaediọọñọ ke ami ndo Abọọñ Abasi ammọ. 23Ndin mme idịd eyaediọọñọ ke eketañ ufọk Isrel efep ke ntak idiọọkñkpọ ammọ, sia adooho ammọ ikinamma akpanikọ ye ami. Ke ntoro ami mmaadịp ammọ iso mmi ñnyʌñ ñyaak ammọ nnọ mme asua ammọ, afịd ammọ enyʌñ eduọññọ ke akañkañ. 24Ami ñkenam ammọ ñkeene ndedeghe ye idiọọk ido ammọ, ndin ami mmadịp ammọ iso mmi.”
25“Ke ntoro se Abọọñ Andikara atañ ado ami: Ami ñyaamaana ndemme mfọnọñkpọ Yekọb, ñyaanyʌñ ñkop mbọm mbaña afịd mbon Isrel, ñnyʌñ nsịn ifịk mbaña adisana anyịñ mmi. 26Ammọ eyaefre abuud ammọ ye afịd idiọọk ido a-ammọ ekenamma ye ami ke ini ammọ ekedʌññọ ke isọñ ke ifuuro ndin awo ndomokeed ibaaha se idịkke ammọ. 27Ke ini ami mmaakeben ammọ nto mme idịd ñnyọñ ndi ñnyʌñ ñkoono ammọ nto mme abio mbon usua ammọ ndibok, afịd mme idịd eyaennịm miin nte adisana eto ke ammọ. 28Ndin ammọ eyaediọọñọ ke ami ndo Abọọñ Abasi ammọ, sia akpesʌkado a-ami ñkeyakka etañ ammọ efep ke atu mme idịd, ami ñyaakoono ammọ mbok ke isọñ ammọ, awo ndomokeed idiisʌhọke. 29Ami ndiidịppe ammọ iso mmi aba, sia ami ñyaaduọk Sịbidịd mmi nnọ mbon Isrel, Abọọñ Andikara atañ.”
Currently Selected:
Esikeel 39: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
