Esikeel 40
40
Emaana Ediọñ Itie Tembịd
1Ke ayọhọ isua edịb mme ition tọọñọ ekitañ ñnyịn efep, ke ntọọñọ isua, ke ayọhọ usen duob ke afiọñ, ke ayọhọ isua duob mme inaañ nte abio akeduọ, ke usen ado ubọk Abọọñ amandoro miin ke idem anyʌñ amben miin akaa do. 2Ke mme ñkukịd Abasi anye amamben miin akaa isọñ Isrel anyʌñ akennịm miin ke ataa ñkoñ-ñkoñ abod ke usuuk-usuuk e-ekenieñeke mme ufọk e-ekebaaha nte abio. 3Anye amamben miin akaa do, ami mmaanyʌñ ñkekịt awodeen keed a-akebitte brọns. Anye akeda ke mben inuaatob ye udʌk linen ye ukwak udomoñkpọ ke ubọk amọ. 4Awo ado amambo miin, “Ayịn awo, nekke se nyʌñ nekke kop ke utọñ nyʌñ nekke nọ ñkpañutọñ ke afịd se ami ñyem uwọt fiin, sia ntak ado anam nọ uben fiin edi mmi. Tañ afịd se afo akịt nọ nditọ Isrel.”
Inuaatob Usakkautịn awuọhọ Anwaesiin Akwere
5Ami mmaakịt ndibene naña akanna ñkanñkʌk tembịd akʌk afịd-afịd. Unyọọñ ukwak udomoñkpọ ke ubọk awo ado akedo anyan kubid itiokeed#40:5 A-adooho ñkpọ nte ikpad 11 me ñkpọ nte mita 3.2; se ñko ke Esi 40:12., ammọ keedekeed ekedo kubid keed ye udomoubọk keed. Anye amaadomo ndibene ado; anye akedo ukwak udomoñkpọ keed ke ubara ye keed ke unyọọñ.
6Akem anye amaadika inuaatob usakkautịn. Anye amaadọọk mme utọukod amọ akedomo nsañandʌk inuaatob; anye ado aketəño ukwak keed. 7Udomo ntoñwuọ mbon ukpeme akedo ukwak keed ke unyọọñ ye ukwak keed ke ubom, ñko mme ndibene esịneke ke ufọọd ntoñwuọ ekedo kubid ition#40:7 A-adooho ñkpọ nte ikpad 8 3/4 me ñkpọ nte mita 2.7; se ñko ke Esi 40:48 ke udob. Udomo nsañandʌk inuaatob a-asakkaiso ase esa tembịd akedo ukwak keed.
8Ndin anye amaadomo esa usʌñ inuaatob ñko; 9anye akedo kubid itiaita#40:9 A-adooho ñkpọ nte ikpad 14 me ñkpọ nte mita 4.2. ke utəño; mme adaaha amọ ekedo kubid iba#40:9 A-adooho ñkpọ nte ikpad 3 1/2 me ñkpọ nte mita keed. ke ubom. Adaaha inuaatob ado akekanna iso ase tembịd.
10Ke esịd inuaatob ñkañ usakkautịn ubeed ita emaeba ke mbeñ keedekeed; afịd ita ado ekenieñe ukem udomo, ñko iso ndibene nsakiso ammọ ekenieñe ukem udomo. 11Ndin anye amaadomo ubom ntondʌk inuaatob; anye akedo kubid duob, ñko unyọọñ amọ akedo kubid duob mme ita#40:11 A-adooho ñkpọ nte ikpad 18 ke ukpa ye ikpad 23 ke unyọọñ me ñkpọ nte mita 5.3 ke ukpa ye mita 6.9 ke unyọọñ.. 12Ke iso ubeed keedekeed ndibene a-akebaaha akedo ibio udomo keed ke unyọọñ. Mme ubeed ekedoñño udomo kubid itiokeed ke naña mbañ inaañ. 13Ndin anye amaadomo inuaatob tọọñọ ke akọm ndibene keed tutu asịm akọm ndibene anye a-asakkaiso ase anye. Ufañ ammọ akedo kubid edịb mme ition#40:13 A-adooho ñkpọ nte ikpad 44 me ñkpọ nte mita 13; se ñko ke Esi 40:21, 25, 29, 30, 33 ye 36. tọọñọ ke itene keed tutu asịm nsakiso amọ. 14Anye amaadomo adaaha iso ndibene ke afịd esịd inuaatob, udomo kubid ata#40:14 A-adooho ñkpọ nte ikpad 105 me ñkpọ nte mita 32.. Udomo ami amaakesịm adaaha a-asakkaiso ase akwere. 15Ndin tọọñọ ke ntondʌk inuaatob tutu akesịm akpatre esa akedo udomo kubid aba mme duob#40:15 A-adooho ñkpọ nte ikpad 88 me ñkpọ nte mita 27; se ñko ke Esi 40:21, 25, 29, 33 ye 36.. 16Mme esa ye mme ndibene ke esịd emaenie ntək ndudu ekanna kpa nte adaaha; mme ndudu ami ekewọt esịd. Emaetọ mme ayob ke iso mme ñwuọnda ndibene adinam anye ayaiya.
Esiin Esa Abọọñ
17Ndin anye amamben miin akaa esiin esa abọọñ. Do ami mmaakịt mme ubeed ye esa e-emaekekọọk afịd ikanna; ubeed edịb mme duob ekeba ke esa ado. 18Esa ami amaadiañña ye mben inuaatob, ndin ubom ammọ akeba nte unyọọñ ammọ; ami akedo ntịkke esa. 19Ndin anye amaadomo unyọọñ tọọñọ ke esịd idak inuaatob tutu akewuọ esịd esa abọọñ; anye akedo udomo kubid ikie#40:19 A-adooho ñkpọ nte ikpad 175 me ñkpọ nte mita 53; se ñko ke Esi 40:23, 27 ye 47 ke edem usakkautịn; ukem ado ñko ke adoro.
Inuaatob Adoro
20Ndin anye amaadomo ubom ye unyọọñ inuaatob ake adoro e-esañake ewuọ esiin esa abọọñ. 21Ndin mme ubeed ammọ, ekedoñño ita ke naña edem iba, mme ndibene ye mme adaaha ammọ ekenie ukem udomo ye akpa inuaatob. Anye akedo udomo kubid aba mme duob ke unyọọñ ye udomo kubid edịb mme ition ke ubom. 22Mme usʌñ amọ, mme esa amọ ye mme ayob se eketọ ekama edemme uyai amọ ekenie ukem udomo ye inuaatob a-aseeghe usakkautịn. Mme utọukod itiaba ekeben awo ekaa do, ye mme adaaha amọ a-asakkaiso ase ammọ. 23Amaaba inuaatob ke esịd akwere akesakkaiso ase inuaatob adoro, kpa naña akeba ke usakkautịn. Anye amaadomo tọọñọ ke inuaatob keed akesịm inuaatob ñkañ iso amọ; anye akedo udomo ikie.
Inuaatob Usuuk
24Ndin anye amamben miin akaa usuuk ndin ami mmaanyʌñ ñkịt inuaatob usuuk. Anye amaadomo mme adaaha ye esa amọ, ñko ammọ ekenie ukem udomo nte mbon mfen. 25Mme usʌñ inuaatob ye mme esa amọ ekenieñe mfafaha usʌñ ekanna, kpa nte naña mbon mfen ekeba. Akedo udomo kubid aba mme duob ke ubom ye edịb mme ition ke unyọọñ. 26Udọọkñkpọ itiaba ekedat awo eka do, esa amọ anyʌñ asak iso ase ammọ. Ke edem ñkañ iba emaetọ mme ayob enam mme ndibene amọ eyaiya. 27Esịd esa abọọñ amaanyʌñ anie inuaatob a-awọttọ usuuk, ñko anye amaadomo tọọñọ ke inuaatob anyem tutu ke inuaatob usuuk; anye ado udomo kubid ikie.
Mme Inuaatob e-Ekaaha Esịd Esaabọọñ
28Ndin anye amamben miin akanna adi esịd esa abọọñ ato inuaatob usuuk, ñko anye amaadomo inuaatob usuuk; anye akenie ukem udomo ye mbon ako. 29Mme ubeed amọ, mme ndibene ye mme esa amọ emaenieñe ukem udomo ye mme mbon mfen. Inuaatob ye esa amọ emaenieñe mme ufañ ekanna. Anye akedo udomo kubid aba mme duob ke unyọọñ ye edịb mme duob ke ubom. 30(Mme esa usʌñ inuaatob e-ekannake esịd esa abọọñ ekedo udomo kubid edịb mme ition ke ubom anyʌñ atəño ke udomo kubid ition.) 31Esa amọ akewọt esiin; mme ayob emaenam mme ñkanna amọ ayaiya, ñko udodukod itiaita ke ekedat esaña edọọk.
32Ndin anye amamben miin akaa esịd esa abọọñ ke edem usakkautịn, ndin amaadomo inuaatob amọ; anye akenie ukem udomo ye mbon ako. 33Mme ubeed amọ, mme ndibene amọ ye mme esa amọ ekenieñe ukem udomo ye mbon ako. Mme usʌñ amọ ye mme ubeed amọ emaenieñe ufañ ekanna. Anye akedo udomo kubid aba mme duob ke unyọọñ ye kubid edịb mme ition ke ubom. 34Esa amọ akewọt esiin esa abọọñ; emaetọ ayob adinam mme ñkanñkʌk amọ ayaiya ke mbeñ edem iba, ñko utọukod itiaita ke ekesaña edọọk.
35Ndin anye amamben miin akaa inuaatob adoro anyʌñ akedomo anye. Anye akenie ukem udomo ye mbon ako, 36kpa naña ubeed amọ, mme adaaha ye mme esa ekedo, ñko anye amaanie ubenafịm akanna akʌk. Anye akedo udomo kubid aba mme duob ke unyọọñ ye udomo kubid edịb mme ition ke ubom. 37Esa amọ akewọt esiin esa abọọñ; mme ayob emaeba adinam ñkanñkʌk amọ ayaiya ke mbeñ edem iba, ñko utọukod itiaita ke ekesaña edọọk.
Mme Ubeed Ubeeñe Ñkpọuwa
38Ubeed amaaba ke mben usʌñ ke ñkpere adaaha ke esịd usʌñ inuaatob keedekeed, ke itie e-ekesiyette ufọfọb uwa. 39Ndin akpokoro iba emaeba ke ñkañ iba esa ñkañ usʌñ inuaatob, e-ekesidatta ewot ufọfọb uwa, uwa idiọọkñkpọ ye uwa ndudue. 40Ke ñkpere ndibene esiin usʌñ inuaatob, ñkpere mme utọukod ntondʌk e-esañake edʌk usʌñ inuaatob adoro, akpokoro iba emaeba, ñko ke edem utọukod uko akpokoro iba emaenyʌñ eba. 41Ke ntoro akpokoro inaañ ekeba ke mbeñ usʌñ inuaatob keed, akpokoro inaañ enyʌñ eba ke mbeñ uko, afịd akedo akpokoro itiaita se ekesikama ewot ñkpọ uwa. 42Ñko akpokoro inaañ e-ekekamake adisọi itiad enam emaeba se ekesikama enam ufọfọb uwa, ammọ keedekeed ekedo udomo kubid keed mme ibio ke anyan, kubid keed mme ibio ke ubom ye kubid keed ke ukoñ#40:42 A-adooho ñkpọ nte ikpad 2 2/3 ke unyọọñ ye ukpa ye ikpad 21 ke ukoñ me ñkpọ nte sentimita 80 ke unyọọñ ye ke ukpa ye sentimita 53 ke ukoñ. Do ke ekesidot mme ñkpọ e-ekamake ewot unam ufọfọb uwa ye mme uwa mfen. 43Ñko ayịre-iba ukwak, a-mbeñ keedekeed akedooho ekpaubọk keed#40:43 A-adooho ñkpọ nte sentimita 9 ke unyọọñ ke ekeyịt ke mme ndibene ekanna. Mme akpokoro ado ekedo se edot abʌkunam e-ekesikamake enam uwa.
Ubeed mme Aku
44Ke esiin esịd inuaatob, ke ufọọd esịd esa abọọñ, ubeed iba emaeba, keed ke ubeñ inuaatob adoro a-akekannake iso awọt usuuk, mfen ke inuaatob usuuk a-akekannake iso awọt adoro. 45Anye amambo miin, “Ubeed a-awọttọ usuuk ana anọ mme aku e-ekpemeke tembịd, 46ndin ubeed a-awọttọ adoro ana anọ mme aku e-ekpemeke akpokoro uwa. Mbon ami edo nditọ ideen Sadọk, e-edoññoke ukweeñe Lifai se ikeme adisaña ñkpere Abọọñ adinam utom ke iso amọ.”
47Ndin anye amaadomo esa abọọñ: akedo udomo kubid ikie ke unyọọñ ye udomo kubid ikie ke ubom. Ndin akpokoro uwa akeba ke iso tembịd.
Ufa Tembịd
48Anye amamben miin akaa esa tembịd anyʌñ akedomo mme adaaha esa ado; ammọ ekedoñño udomo kubid ition ke naña ñkañ iba. Ukpa ntondʌk akedo udomo kubid duob mme inaañ#40:48 A-adooho ñkpọ nte ikpad 25 me ñkpọ nte mita 7.4, ñko mme ñwuọnda ndibene amọ ekedo udomo kubid ita#40:48 A-adooho ñkpọ nte ikpad 5 1/4 me ñkpọ nte mita 1.6 ke mbeñ ñkañ iba. 49Inuaatob esa akedo udomo kubid edịb#40:49 A-adooho ñkpọ nte ikpad 35 me mita 11 ke ubom, ñko udomo kubid duob mme iba#40:49 A-adooho ñkpọ nte ikpad 21 me ñkpọ nte mita 6.4 tọọñọ ke iso sịm edem. Ekesisaña mme utọukod edʌk, ndin mme abai itiad e-ekemʌmmọ ufọk ekama emaeba ke naña edem amọ iba.
Currently Selected:
Esikeel 40: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
