Esikeel 43
43
Ubọọñ Abasi Atịmme Anyọñ Tembịd
1Ndin awo ado amamben miin akaa inuaatob a-awọttọ usakkautịn, 2ndin ami mmaakịt ubọọñ Abasi Isrel naña ato usakkautịn adi. Uyio amọ akeba nte uyio uwak mmọọñ e-efegheke, ndin isọñ amaayọhọ ye ubọọñ amọ. 3Ñkukịd se ami ñkekịt akeba nte ñkukịd a-ami ñkekịtte ke ini anye akediighe adisobo abio anyʌñ abit mme ñkukịd a-ami ñkekịtte ke mben inyañ Keba, ndin ami mmaaduọ ñkʌp iso ke isọñ. 4Ubọọñ Abọọñ amaato inuaatob a-awọttọ usakkautịn adʌk tembịd. 5Ndin Sịbidịd ado amandịppe miin ke anyọñ anyʌñ amben miin adʌk adi esịd esa abọọñ, ndin Ubọọñ Abọọñ amaayọhọ tembịd.
6Idaha e-ete ado akesʌkkọ ada ke ñkañ mmi, ami mmaakop naña awo atañ ikọ ye ami ato esịd tembịd. 7Anye akebo: “Ayịn awo, itie ebekpo mmi ye itie se ukod mmi adoro ado ami. Itie ami ke ami ndiidʌñ ye nditọ Isrel ke nsi-nsi. Tutu amama nditọ Isrel ye mme ndidem ammọ idiisịnne anyịñ mmi ke ndek aba ke usaña akpara ammọ ye se enọ ke itie ñkpa mme mbọọñ ammọ. 8Ke ini ammọ enịmme nsañandọọk ammọ ediana nsañandọọk mmi ye mme inuausʌñ ammọ ediana mme inuausʌñ mmi, a-adooho ndibene ikpọọñ andiañña miin akpọñ ammọ, ammọ emaesappa adisana anyịñ mmi ye mbubiam adinam ammọ. Ke ntoro ami mmaasobo ammọ ke iyadesịd mmi. 9Idahami ndin yak ammọ esioñño idem ekpọñ usaña akpara ye uwa itie ñkpa ndidem ammọ, ndin ami ñyaadʌñ ye ammọ ke nsi-nsi.
10“Ayịn awo, dọkkọ nditọ Isrel naña tembịd ado aba, nọ ato do abuud amʌm ammọ ke ntak ndiọiñkpọ ammọ. Yak ammọ ese naña anen, 11ñko adieke ammọ ekoppo abuud ebaña afịd se ammọ enam, wọt ammọ naña tembịd ami aba, naña ebono ñkpọ, mme ntoñwuọ ye mme ntondʌk amọ, naña ediọñ anye ye afịd ewʌhọ ye mbed amọ. Wet mme ñkpọ ami nịm ammọ ke iso nọ ato do ammọ esaña nnen-nnen ke naña ediọñ anye enyʌñ ekeene mme ewʌhọ amọ.”
12“Ami ado mbed tembịd: Afịd ñkanñkʌk anyọñ abod adiido se isana ikan. Mbed tembịd aba ntoro.
Emaana Ediọñ Ekamba Akpokoro Uwa
13“Mme udomo akpokoro uwa ke udomo anyan kubid#43:13 A-adooho ñkpọ nte sentimita 53; se ñko ke Esi 43:14 ye 17. Anyan kubid ado udomo e-ekamake ke afịd Esikeel 40-48. edo ami, anyan kubid ado ado kubid keed ye ufuudubọk keed: Usaña mmọọñ amọ atəño kubid keed anyʌñ anwaña kubid keed, ye mben a-adooho ukpa keed#43:13 A-adooho ñkpọ nte sentimita 27. akanna mme utịd. Ñko unyọọñ akpokoro uwa ado ami: 14Tọọñọ ke usiak isọñ a-abaaha ke isọñ sịm usuuhọ ufañ unyọọñ a-abaaha akanna akpokoro uwa akoñ ke udomo kubid iba, ñko ufañ amọ ado udomo kubid keed#43:14 A-adooho ñkpọ nte ikpad 3 1/2 ke ukoñ ye ikpad 1 3/4 ke ukpa me ñkpọ nte sentimita 105 ke ukoñ ye sentimita 53 ke ukpa ke ukpa. Tọọñọ ke usuuhọ ufañ ami tutu asịm ufañ anyọñ a-akannake akpokoro uwa akʌk ado udomo kubid inaañ ke unyọọñ, ufañ ado ñko anyʌñ ado udomo kubid keed ke ukpa#43:14 A-adooho ñkpọ nte ikpad 7 ke ukoñ ye ikpad 1 3/4 ke ukpa me ñkpọ nte mita 2.1 ke ukoñ ye sentimita 53 ke ukpa. 15Ke emaaha ado, ebʌkikañ akpokoro uwa ado udomo kubid inaañ ke unyọọñ, ñko nnʌk inaañ e-enyanna eto anyọñ ebʌkikañ ado ewuọ. 16Itiad ebʌkikañ akpokoro uwa ado anie ukem mbañ inaañ, ado udomo kubid duob mme iba#43:16 A-adooho ñkpọ nte ikpad 21 me ñkpọ nte mita 6.4 ke unyọọñ ye duob mme iba ke ubom. 17Ufañ anyọñ ñko ado mbañ inaañ, udomo kubid duob mme inaañ#43:17 A-adooho ñkpọ nte ikpad 25 me ñkpọ nte mita 7.4 ke unyọọñ ye udomo kubid duob mme inaañ ke ubom. Ke afịd ñkanna akpokoro itie uwa, ufañ a-akenaaha akedo udomo kubid keed ye ibio ubaak kubid#43:17 A-adooho ñkpọ nte sentimita 27. Mme utọukod akpokoro uwa asak iso ase usakkautịn.”
18Ndin anye amambo miin, “Ayịn awo, ami ado se Abọọñ Andikara atañ: Mme mbed se idiikpeme naña efọp mme ufọfọb uwa ye usiime iyiib ke akpokoro uwa ke ini emaebọp anye ima ediido ami: 19Abọọñ Andikara abo ke ana afo anọ mme aku Lifai ekpək Sadọk, e-esañake ekpere iso mmi, ñyịn ayaaraenañ nte uwa idiọọkñkpọ. 20Ana afo aben usʌk iyiib amọ asịn ke nnʌk inaañ e-ebaaha ke akpokoro uwa ye ke inuuk inaañ ufañ anyọñ ye ke afịd ñkanñkʌk ufañ, ke ntoro nam akpokoro uwa asana nyʌñ nam ñkpeubọk nọ anye. 21Ana afo aben ayaaraenañ uwa idiọọkñkpọ akefọp anye ke itie e-esioho enịm ke tembịd ke esiin adisana itie.
22“Ke ayọhọ usen iba, ana afo awa akpo ebod i-imiinieghe ndo nte uwa idiọọkñkpọ, ñko ana enam akpokoro uwa asana kpa naña ekekama ayaaraenañ enam anye asana. 23Ke ini afo umaukweeñe adinam anye asana, ana afo awa ñyịn ayaaraenañ ye akukịmedọñ a-atooho udịmedọñ, naña iba inaaha enie ndo. 24Ana afo awa ammọ ke iso Abọọñ, ñko ana mme aku esiime inʌñ ke anyọñ ammọ enyʌñ ewa ammọ nte ufọfọb uwa enọ Abọọñ.”
25“Afo anie adinọ akpo ebod kwa usen ke usen itiaba nte uwa idiọọkñkpọ; ñko afo anie adinọ ñyịn ayaaraenañ ye akukịmedọñ a-atooho udịmedọñ, naña iba inaaha enie ndo. 26Ammọ ana enam ñkpeubọk enọ akpokoro uwa enyʌñ enam anye asana ke usen itiaba; ntoro ke ammọ ediidiọñ anye. 27Ke utịd mme usen ami, tọọñọ ke ayọhọ usen itiaita kaa iso, mme aku ana eben mme ufọfọb uwa ye uwa adidiana keed ndufo enọ ke akpokoro uwa. Abọọñ Andikara atañ; ndin ami ñyaanem esịd ye ndufo.”
Currently Selected:
Esikeel 43: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
