Esikeel 44
44
Emaana Edịppe Ndaha Aku
1Ndin awo ado amamben miin atịmme akaa inuaatob esiin adisana itie, ndin emaebet inuaatob a-akeseeghe usakkautịn. 2Abọọñ amambo miin, “Ana nte inuaatob ami abebere afịd-afịd ini. Inaaha ebeere anye; inaaha awo ndomokeed asaña ke anye adʌk. Ana nte anye abebere sia adooho Abọọñ, Abasi Isrel, amaasaña aboiyo ke anye adʌk. 3Akpan abọọñ ke idem amọ ikpọọñ akeme aditie ke esịd inuaatob ndia ñkpọ ke iso Abọọñ. Anye ayaato ke usʌñ esa inuaatob adʌk anyʌñ asaña ukem usʌñ ado awuọ.”
4Akem awo ado amamben miin ato usʌñ inuaatob adoro adiwuọ iso tembịd. Ami mmaase ñnyʌñ ñkịt ubọọñ Abọọñ naña ayọhọ tembịd Abọọñ, ndin ami mmaaduọ ñkʌp iso ke isọñ.
5 Abọọñ amambo miin, “Ayịn awo, tịm se, nekke kpañ utọñ nyʌñ nịm esịd mfo nọ afịd mbed ye item a-ami unọọhọ fiin mbaña tembịd Abọọñ. Tịñ anyen ke ntondʌk tembịd ye afịd mme inuausʌñ se esaña ewuọ ke adisana itie. 6Dọkkọ Isrel mbon ntịdutọñ bo ke ami ado se Abọọñ Andikara atañ: ‘Nditọ Isrel, yak mbubiam adinam ndufo atre!’ 7Ke adidian ye afịd mme mbubiam adinam mfen a-ndufo enaññake, ndufo emeben mme isenawo i-imiinịmme esịd ammọ asana ñko inyʌññọ ifọọrọ edʌd edʌk adisana itie mmi, e-esappa tembịd mmi ke ini ndufo ennọọhọ miin ndidia, akpọñ ye iyiib, enyʌñ ebiat edioomo mmi. 8Utu ke ndufo enam ubiọñutom ndufo ke abaña mme ndisana ñkpọ mmi, ndufo emenam mbon mfen ese ñkpọ ebaña adisana itie mmi. 9Se Abọọñ Andikara atañ ado ami: Inaaha asenawo ndomokeed ammiinịmme esịd amọ asana ñko inyʌññọ ifọọrọ edʌd adʌk adisana itie mmi, kpa ye mme isenawo e-edʌñọke ke atu nditọ Isrel.
10“ ‘Mme Lifai e-ekedaañake eñkpọñ miin ekaa anyan usʌñ ke ini Isrel ekeyooño ekpọñ usʌñ, e-ekenyʌññọ eyooñ eñkpọñ miin ebịne mme ubobodñkpọ ammọ ana ebọ ufen idiọọkñkpọ ammọ. 11Ammọ ekeme adinam utom ke adisana itie mmi, enam utom adikpeme inuaatob tembịd enyʌñ enam ñkpọ do; ammọ ekeme adiwot mme ufọfọb uwa enyʌñ ewa uwa enọ mbon awo enyʌñ eda ke iso mbon awo enam ñkpọ enọ ammọ. 12Ado sia ammọ ekenamma ñkpọ enọ ammọ ke iso mme ubobodñkpọ ammọ enyʌñ enam nditọ Isrel eduọ edʌk idiọọkñkpọ, ami mmebenne ubọk ñnwọñọ nnọ ammọ ke ana ebọ utịb idiọọkñkpọ ammọ, Abọọñ Andikara atañ. 13Inaaha ammọ esaña ekpere edinam ñkpọ ennọ miin nte mme aku me adisaña ñkpere ndisana ñkpọ mmi me ataa ndisana uwa mmi; ana ammọ ekop abuud ke mbubiam adinam ammọ. 14Ndin ami ñyaamek ammọ nọ ekpeme tembịd ke afịd utom se ediinam ke esịd amọ.
15“ ‘Ado mme aku Lifai, e-edooho ubon Sadọk e-ekenyʌññọ ekpeme adisana itie mmi ke ini nditọ Isrel ekeyooño eñkpọñ miin, edo se isaña iñkpere miin idinam ñkpọ ke iso mmi; ammọ ana nte eda ke iso mmi enam uwa akpọñ ye iyiib, Abọọñ Andikara atañ. 16Ammọ ikpọọñ edo se idʌk adisana itie mmi; ammọ ikpọọñ edo se isaña ikpere akpokoro mmi inam utom ke iso mmi inyʌñ iñkpeme miin.
17“ ‘Ke ini ammọ edʌkkọ inuaatob esịd esa abọọñ, ana ammọ esịne mme afọñ linen; inaaha ammọ esịne afọñ idededọñ ndomokeed ke ini ammọ enamma utom ke inuaatob esịd esa abọọñ me ke esịd tembịd. 18Ammọ enie ediyara mme uyadiwuod linen ke iwuod ammọ ye afọñ idakidem linen ekanna isịn ammọ. Ammọ inaaha esịne ñkpọ ndomokeed se inam ammọ etịppe ibibiak. 19Ke ini ammọ ewuọhọ eka esiin esa abọọñ a-mme awo ebaaha, ana ammọ esịññe mme afọñidem unam utom ammọ enyʌñ eyaak enịm ke mme adisana ubeed, enyʌñ esịne mme afọñidem mfen, mbaak mme awo edisana ato ke edituaha ye ewịra ammọ.
20“ ‘Inaaha ammọ ekwaat ided iwuod me enịm anyan ided, ado ana enịm ided iwuod ammọ ibio-ibio. 21Inaaha aku ndomokeed anwọñ ukọd ke ini anye adʌkkọ esịd akwere. 22Inaaha ammọ edọ mme ebekpa me ibaan emaekewuọñọ ndọ; ammọ ekeme idọ ubọikpa Isrel imiidiọọñọke awodeen me mme ebekpa mme aku. 23Ana ammọ ekpeep mbon mmi ukpʌhọde a-abaaha ke ufọọd se ido adisana ye kwe-kwe ñkpọ enyʌñ ewọt ammọ naña ekpediọọñọ ukpʌhọde a-abaaha ke ufọọd ñkpọ se ideghe ye se isana.
24“ ‘Ke ini utọk abaaha, ana mme aku eba nte mme abiideikpe enyʌñ ebiide ikpe ekeene ubonoñkpọ mmi. Ammọ enie edinịm mme mbed ye mme ewʌhọ mmi ke afịd mme usọrọ se ami mmek, ñko ana ammọ enịm mme Sabad mmi esana.
25“ ‘Aku inaaha asappa idem amọ ke adida ñkpere akpo awo; ado, adieke awo ñkpa ado akedooho ete me eka amọ, ayịn amọ awodeen me ayịn awonwaan, ayịneka awodeen me ayịneka awonwaan ammiidọọhọ ebe, anye akeme adisappa idem amọ. 26Ke anye amaakenam idem asana ama, anye ana abet usen itiaba. 27Ke usen anye adʌkkọ esịd akwere adisana itie adikinam utom ke adisana itie, anye anie adiwa uwa idiọọkñkpọ nnọọ idem amọ, Abọọñ Andikara atañ.
28“ ‘Ami nnie adido ukweeñe udeeme a-mme aku enieghe. Inaaha afo anọ ammọ inie ndomokeed ke Isrel; ami ndiido udeeme ammọ. 29Ammọ ediidia uwa ñkpasi, uwa idiọọkñkpọ ye uwa ndudue; ndin afịd ñkpọ ke Isrel se ediinọ Abọọñ adiido ake ammọ asaña-asaña. 30Mfọọnñkan afịd mme akpa mfịd ye afịd mme asaña-asaña enọ adiinie mme aku. Ana ndufo enọ ammọ akpa ndom abakpa ndufo nọ ato do adidiọñ aduọkkọ ke ufọk ndufo. 31Mme aku inaaha eta ñkpọ ndomokeed, me ado inuen me unam, amaakekpa me se ndiọi unam ewot.
Currently Selected:
Esikeel 44: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
