Esikeel 45
45
Emaana Edịppe Isrel Edaaha Ayọhọ-Ayọhọ
1“ ‘Ke ini ndufo edeemeke isọñ nte udeeme, ana ndufo eyaak itie isọñ enọ Abọọñ nte adisana ubaak isọñ, udomo kubid tọsịn edịb mme ition (25,000)#45:1 A-adooho ñkpọ nte itiad 8 me ñkpọ nte kilomita 13; se ñko ke Esi 45:3, 5 ye 6. ke unyọọñ ye udomo kubid tọsịn edịb (20,000) ke ukpa#45:1 A-adooho ñkpọ nte itiad 6 1/2 me ñkpọ nte kilomita 11; afịd itie ado adiido adisana. 2Ke atu ami, ubaak isọñ a-adooho udomo kubid ikie ition (500)#45:2 A-adooho ñkpọ nte ikpad 875 me mita 265 ke naña mbañ inaañ anie adina nnọọ adisana itie, ndin udomo kubid aba mme duob#45:2 A-adooho ñkpọ nte ikpad 88 me ñkpọ nte mita 27. ke ñkanna amọ ana anọ ñkaña isọñ. 3Ndin domo udomo kubid tọsịn edịb mme ition (25,000) ke unyọọñ ye udomo kubid tọsịn duob (10,000)#45:3 A-adooho ñkpọ nte itiad 3 1/3 me ñkpọ nte kilomita 5.3; se ñko ke Esi 45:5 ke ukpa sio ke adisana itie ami. Do ke adisana itie adiiba, Ataa Nsasana Itie. 4Anye adiido adisana ubaak isọñ anọ mme aku, e-enamma ñkpọ ke adisana itie e-enyʌññọ esaña ekpere adinam ñkpọ ke iso Abọọñ. Anye adiido itie ufọk ammọ anyʌñ ado nsasana itie e-esiooho enịm enọ adisana itie. 5Ubaak isọñ a-adooho udomo kubid tọsịn edịb mme ition (25,000) ke unyọọñ ye kubid tọsịn duob (10,000) ke ubara adiinie mme Lifai, e-enamma utom ke tembịd, nte udeeme ammọ adibọp mme abio se edʌñọ ke esịd.
6“ ‘Ana ndufo enọ abio isọñ a-akponno ke ukpa kubid tọsịn ition (5,000)#45:6 A-adooho ñkpọ nte itiad 1 2/3 me ñkpọ nte kilomita 2.7 ye kubid tọsịn edịb mme ition (25,000) ke unyọọñ, e-ebenne ekedian ye adisana isọñ; anye ado adiinie afịd Isrel.
7“ ‘Akpanabọọñ adiinie isọñ adiaññake adaña ye ñkañ a-anaaha anọ adisana isọñ ye anye a-anieghe abio. Anye ayaatara ke ukañ usobutịn anyʌñ atara ke usakkautịn akaa ñkañ usakkautịn, asaña ke unyọọñ tọọñọ ke adaña usobutịn tutu akewuọ usakkautịn asak iso ase keed ke atu mme udeeme ekpək. 8Isọñ ami adiido udeeme amọ ke Isrel. Ñko nditọ ideen abọọñ mmi idiifiighe mbon mmi aba ado eyaeyaak mbon Isrel edat isọñ enie akeene mme esiin ammọ.
9“ ‘Ami ado se Abọọñ Andikara atañ: Ndufo nditọ ideen abọọñ Isrel, emenam ebọhọ adaña; a-akem ndin! Isịññe idem ikpọñ ntịme ye adifiik awo inyʌñ inam se ifọn ye se inyʌñ idot. Itre adibịn mbon mmi nsịññe ke abio, Abọọñ Andikara atañ. 10Ndufo ana ekama nnen-nnen udomoñkpọ, nnen-nnen udomo efa#45:10 Efa akedo udomo nsaad ñkpọ a-adooho ñkpọ nte lita 22. ye nnen-nnen udomo baad#45:10 Baad akedo udomo mmọọñ-mmọọñ ñkpọ a-adooho ñkpọ nte lita 22.. 11Ana efa ye baad edo ukem ke ndaha, yak baad adọñọ mbakka udomo họma keed ke itie duob ñko efa adọñọ mbakka udomo họma keed ke itie duob; ana họma ado nsọọñọnda udomo anọ naña iba. 12Yak sekel#45:12 Sekel akedoppo ñkpọ nte kram 12. akem ye kera edịb. Sekel edịb dian sekel edịb mme ition dian sekel duob mme ition anọ mina keed#45:12 A-adooho sekel 60; ñkaña mina akedo sekel 50. Sekel 60 akedo ñkpọ nte kram 690.
13“ ‘Ami ado asaña-asaña enọ a-afo anieghe adinọ: mbakka efa#45:13 A-adooho ñkpọ nte kilokram 2.7. keed ke itie itiokeed a-atooho homa wiid keedekeed ye mbakka efa#45:13 A-adooho ñkpọ nte kilokram 2.3. keed ke itie itiokeed a-atooho homa baali keedekeed. 14Nnen-nnen udomo adan ọlif, e-ekamake baad edomo, ado mbakka keed ke itie duob ke udomoñkpọ baad#45:14 A-adooho ñkpọ nte lita 2.2. e-edomoke eto kọọ keedekeed (a-asịneke baad duob me họma keed, sia baad duob ado ukem ye họma keed). 15Ñko ana esio edọñ keed ke atu afịd udịmedọñ a-ayọhọke ikie iba se ito idịm Isrel se enekke eduọk mmọọñ enọ. Mme ñkpọ ami ke ediikama inam mme uwa abakpa, ufọfọb uwa ye uwa adidiana keed se ekama enam ñkpeubọk enọ mbon awo, ami ado se Abọọñ atañ. 16Afịd awo ke idʌñ eyaenọ akpanabọọñ Isrel asaña-asaña enọ ami. 17Adiido utom akpanabọọñ adinọ mme ufọfọb uwa, uwa mfịd ye adinwọñ uwa ke ini usọrọ ado, ke mme Ufa Afiọñ ye ke mme Sabad, ke afịd ndimek usọrọ ke Isrel. Anye adiinọ uwa idiọọkñkpọ, uwa mfịd, ufọfọb uwa ye uwa adidiana keed adinam ñkpeubọk nnọọ ufọk Isrel.
18“ ‘Se Abọọñ Andikara atañ ado ami: Ke akpa usen ke akpa afiọñ ndufo enie adidat ñyịn ayaaraenañ ammiinieghe ndo nnam adisana itie asana. 19Aku anie adidat ubaak iyiib uwa idiọọkñkpọ afiọññọ ke abọbọọk anyenusʌñ tembịd ye ke naña mbañ anyọñ akpokoro uwa inaañ ye ke mme inuaatob esịd esa abọọñ. 20Ana ndufo enam ukem ado ke ayọhọ usen itiaba ke afiọñ enọ awo akeedodo i-imiikifiọkkọfiọk inam idiọọkñkpọ me awo a-anamma ke unanaifiọk. Ke ntoro ana ndufo enam ñkpeubọk enọ tembịd.
21“ ‘Ke ayọhọ usen duob mme inaañ ke akpa afiọñ ana ndufo enam Usọrọ Nsaña Mboiyo, usọrọ a-adiikpeene ke usen itiaba; ke idak ini ami ndufo ediita uyo se yiis imiisịneke. 22Ke usen ado akpanabọọñ anie adinọ ayaaraenañ nte uwa idiọọkñkpọ anọ idem amọ ye afịd awo ke idʌñ. 23Afịd usen ke atu usen itiaba ini usọrọ ado, anye anie adinọ ñyaaraenañ itiaba ye akukịmedọñ itiaba i-imiinieghe ndo nte ufọfọb uwa anọ Abọọñ ye akpoebod nte uwa idiọọkñkpọ. 24Ana anye anọ efa keed a-adaaha anọ ayaaraenañ keedekeed ye efa keed a-adaaha anọ akukịmedọñ keedekeed asaña ye atu hin#45:24 A-adooho ñkpọ nte lita 3.8. adan ọlif keed kwa efa nte uwa ñkpasi.
25“ ‘Ke mme usen usọrọ itiaba ami, a-atọọñọke ke ayọhọ usen duob mme ition ke ayọhọ afiọñ itiaba, anye anie adinọ ukem enọ ado ke mme uwa idiọọkñkpọ, mme ufọfọb uwa, mme uwa ñkpasi ye adan.
Currently Selected:
Esikeel 45: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
