Esikeel 46
46
1“ ‘Ntom ke Abọọñ Andikara atañ: Inuaatob esịd esa abọọñ a-awọttọ usakkautịn ana abebere ke mme usen unam utom itiokeed ado, ado amaado ke usen Sabad ye ke usen Ufa Afiọñ ana ebeere anye. 2Akpanabọọñ ana ato esiin asaña esa usʌñ inuaatob anyʌñ akeda ke mben inuaatob. Mme aku enie ediwa ufọfọb uwa ye uwa ewuana amọ. Anye anie adisuuk iwuod ke ukpono ke itie ukọk abakpa ake inuaatob ndin anye asaña awuọ, ado inaaha ebet inuaatob tutu ndubiayio. 3Ke mme usen Sabad ye mme Ufa Afiọñ mme awo ana nte ewọt ukpono ke iso Abọọñ ke ntondʌk inuaatob. 4Adifọb uwa a-akpanabọọñ abenne asọk Abọọñ ke usen Sabad adiido ñyịn akukịmedọñ itiokeed ye akukịmedọñ keed, afịd inaaha enie ndo. 5Uwa ñkpasi e-ediinọ ye akukịmedọñ adiido udomo efa#46:5 A-adooho ñkpọ nte kilokram 16; se ñko ke Esi 46:7 ye 11., ñko uwa ñkpasi ye mme ñyịn edọñ adiiwak kpa naña anye ama, asaña ye atu hin#46:5 A-adooho ñkpọ nte lita 3.8; se ñko ke Esi 46:7 ye 11. adan ọlif kwa efa. 6Ke usen Ufa Afiọñ anye ana awa ñyịn ayaaraenañ, akukịmedọñ itiokeed ye ñyịn edọñ keed, ana afịd enana ndo. 7Anye anie adinọ nte uwa ñkpasi efa keed adian ye ayaaraenañ ado, efa keed adian ye akukịmedọñ ado, dian ye uwak ñyịn edọñ naña anye ayem inọ, esaña ye atu adan ọlif ke efa keedekeed. 8Ke ini akpanabọọñ ado adʌkkọ, anye anie adisaña esa usʌñ inuaatob, ñko anye anie adisaña ukem usʌñ ado ñwuọ.
9“ ‘Ke ini nditọ isọñ edʌkkọ ebịne Abọọñ ke ini usọrọ akemme, awo akeedodo a-atooho inuaatob adoro adʌk ana asaña inuaatob usuuk awuọ; ñko awo akeedodo a-atooho inuaatob usuuk adʌk ana asaña inuaatob adoro awuọ. Inaaha awo ndomokeed ato inuaatob a-anye akesañake adʌk awuọ, ado awo keedekeed ana asaña nsakiso inuaatob a-anye aketooho adʌk awuọ. 10Akpanabọọñ ana aba ye ammọ, adʌk idaha ammọ edʌkkọ anyʌñ awuọ idaha ammọ ewuọhọ. 11Ndin ke ini mme usọrọ ye ke ini ndia, uwa ñkpasi ana ado efa keed ye ayaaraenañ, efa keed ye akukịmedọñ, dian ye mme ñyịn edọñ naña anem anye esịd, ñkọrọ atu adan ọlif kwa efa.
12“ ‘Ke ini akpanabọọñ anọọhọ Abọọñ enọ imaesịd, me ufọfọb uwa me uwa ewuana ana ebeere inuaatob a-awọttọ usakkautịn enọ anye. Anye ayaawa ufọfọb uwa me uwa adidiana keed amọ nte naña anye asinam ke usen Sabad. Ndin anye ayaawuọ; ñko anye amaawuọ, ana ebet inuaatob ado.
13“ ‘Afịd usen afo anie adinọ edọñ isua keed ammiinieghe ndo nọ ekama enam ufọfọb uwa enọ Abọọñ; afo adiinọ anye kwa ubakusen. 14Kwa ubakusen afo ñko anie adidian uwa ñkpasi, e-edọñọke mbakka keed ke itie itiokeed efa#46:14 A-adooho ñkpọ nte kilokram 2.7. ye ayọhọ atu hin#46:14 A-adooho ñkpọ nte lita 1.3. adan ita e-ewuahake ye ndomuyo. Afo anie adinọ Abọọñ uwa ñkpasi ami a-adooho nsi-nsi ewʌhọ. 15Ke ntoro edọñ ado ye uwa ñkpasi ado ye adan ado ediisinọ kwa ubakusen se ekama enam nsi-nsi ufọfọb uwa.
16“ ‘Ntom ke Abọọñ Andikara atañ: Adieke akpanabọọñ anọọhọ ayịn amọ awodeen enọ ato udeeme ñkpọ amọ, ado ñko adiido inie mme ubon amọ, ammọ ediidat ado inie nte udeeme ammọ. 17Adieke anye anọọhọ keed ke atu nditọufọk amọ enọ ato udeeme ñkpọ amọ, ayịnufọk ado ana akama enọ ado tutu isua ubọkkọ amọ akem; ndin eyaemaana eyaak enọ ado enọ akpanabọọñ ado. Udeeme amọ ana anọ nditọ ideen amọ ikpọọñ; ado ake ammọ. 18Inaaha abọọñ aben udeeme mbon abio ndomokeed, inaaha abịne ammọ asio akpọñ udeeme ammọ. Anye anie adisio udeeme ñkpọ amọ nnọọ nditọ ideen amọ, mbaak edidiañña mbon mmi ndomokeed ekpọñ inie ammọ.’ ”
19Ndin awo ado amamben miin asaña ato usʌñ mben inuaatob e-esañake edʌk ndisana ubeed a-awọttọ usuuk, a-akenieghe mme aku, anyʌñ akeñwọt miin itie ke utịd usobutịn. 20Anye amambo miin, “Itie ami ke ana mme aku eba etem uwa ndudue ye uwa idiọọkñkpọ enyʌñ esañ abakpa uwa, nọ etre adiben ammọ ndʌk esiin esa abọọñ ye adikinam mme awo esana.”
21Anye ndin amamben miin akaa esiin esa abọọñ anyʌñ andat miin usʌñ akanna inuuk inaañ amọ, ndin kwa inuuk ami mmaakịt esa abọọñ mfen. 22Ke inuuk inaañ esa abọọñ esiin ado esa abọọñ mfen emaedọñọ, udomo kubid aba ke unyọọñ ye udomo kubid edịb mme duob ke ukpa#46:22 A-adooho ñkpọ nte ikpad 70 ke unyọọñ ye ikpad 53 ke ukpa me ñkpọ nte mita 21 ke unyọọñ ye mita 16 ke ukpa.; afịd ntək esa abọọñ esịd ado ekenie udomo keed. 23Udịm ufọk utem ñkpọ e-enamma ke itiad amaaba akanna esa abọọñ inaañ ado, afịd emaenie itie usịññe nsʌñikañ e-ekebọppọ ekanna ufọk utem ñkpọ ado. 24Anye amambo miin, “Itie utem ñkpọ mbon e-enamma utom ke tembịd mmi ediitem mme uwa mbon awo ado ami.”
Currently Selected:
Esikeel 46: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
