Esikeel 47
47
Inyañ Atọọñọke ke Tembịd
1Awo ado amamben miin atịmme adi inuaatob tembịd, do ke ami ñkekịt naña mmọọñ ato ke idakisọñ asaña usʌñ tembịd awọññọ aka ñkañ usakkautịn (sia tembịd akesak iso ase usakkautịn). Mmọọñ aketo idakisọñ usuuk tembịd, usuuk akpokoro uwa. 2Anye ndin amamben miin awuọ ato inuaatob adoro anyʌñ amben asaña akanna esiin a-adatta akewuọ inuaatob esiin a-awọttọ usakkautịn, ñko mmọọñ akesʌk afeghe ato usuuk.
3Ke ete ado amaakedakka adʌk usakkautịn ye udomo ñkpọ ke ubọk amọ, anye amaadomo udomo kubid tọsịn keed#47:3 A-adooho ñkpọ nte ikpad 1,700 me mita 530. anyʌñ amben miin asaña ke mmọọñ a-aketreke awo ke itọñ ukod. 4Anye amaamaana adomo kubid tọsịn keed mfen ndin anye amamben miin asaña ke mmọọñ a-akedọọhọ akesịm edọñ. Anye amaamaana adomo kubid tọsịn keed mfen ndin anye amamben miin asaña ke mmọọñ a-akedọọhọ adiñwuọ isịn. 5Anye amaamaana adomo tọsịn keed mfen asio, ado idahami mmọọñ amaakappa inyañ a-ami ndiikikanna ñkaaña, sia adooho mmọọñ amaadọọk anyʌñ atəño akem se ewọk ewọk, inyañ a-awo ndomokeed imiikikanna ikaaña. 6Anye amambịp miin abo, “Ayịn awo, afo amekịt ami?”
Ndin anye amaatịmme amben miin akaa mben inyañ ado. 7Ke ini ami ñkewuọhọ do, ami mmaakịt uwak ibad eto ke mben inyañ naña mbeñ iba. 8Anye amambo miin, “Mmọọñ ami afeghe aka ñkañ usakkautịn anyʌñ asọiyọ adʌk Araba, ke itie a-anye atooho adʌk Ikpaikpa Akpainyañ. Ke ini anye anwaññake idem adọñ ke akpainyañ ado, mmọọñ inʌñ akappa afọn. 9Udịm mme aduuwem ñkpọ eyaedʌñ ke itie akeedodo a-mmọọñ ami afegheke. Mme uwak ibad iyak eyaeba, sia adooho mmọọñ ami afefeghe do anyʌñ anam mmọọñ inʌñ afọn; ke ntoro itie nte mmọọñ afeghe aka afịd ñkpọ eyaedʌñ. 10Mme akọiyak eyaeda ke mben akpa ado; tọọñọ ke En Kedi tutu asịm En Eklaim itie ayaaba se esịn iyịre. Mme iyak ado ediido ke utọ ke utọ nte mme iyak e-ebaaha ke Inyañ Mediterenia. 11Ado mme adeb ye mme akpʌk-akpʌk itie idiikappake ifọn; eyaeyaak ammọ enịm enọ inʌñ. 12Mme eto mfịd ke utọ ke utọ eyaetịppe ke mben inyañ ado naña edem iba. Mfañ ammọ idiiyeemeke, ñko mfịd ammọ idiiduọhọ. Ammọ eyaenwịm mfịd kwa afiọñ sia adooho mmọọñ a-afegheke abịne ammọ ato adisana itie. Mfịd ammọ adiido ndidia, ñko mfañ ammọ adiido ibọk usọbọ.”
Mme Adaña Isọñ ado
13Se Abọọñ Andikara atañ ado ami: “Mme adaña ikọd se afo uduudeeme unọ mme esiin Isrel duob mme iba nte udeeme ñkpọ ammọ edo ami, yak Yosef adat itie iba. 14Afo anie adibakka ammọ ukem-ukem nnọọ ammọ. Sia ami mmaadịppe ubọk ñnwọñọ ke ñyaanọ mme eteete ndufo; isọñ ami adiido udeeme ndufo.”
15Adaña isọñ ado ado ami:
Ke ubeñ adoro anye adiitọọñọ ke Akpainyañ Mediterenia ke mben usʌñ Hetlọn aboiyo Debo Hamad tutu ke Sedad, 16Berota ye Sibraim (a-adaaha ke ufọọd adaña Damaskọs ye Hamad), anyọọñ akesịm Hasa Hatikon, a-abaaha ke ufọọd adaña Hauran. 17Adaña ado ayaatara atọọñọ ke inyañ ado akesịm Hasa Enan, tutu ke edem adoro ufọọd adaña Damaskọs, ye ufọọd adaña Hamad ke adoro. Adaña adoro adiido ami.
18Ke ñkañ usakkautịn adaña adiitọọñọ ke Hauran ye Damaskọs, asaña Yọdan ke ufọọd Kilied ye isọñ Isrel, tutu akesịm Ikpaikpa Akpainyañ ndin anye anyọọñ akewuọ Tama. Ami adiido adaña ñkañ usakkautịn.
19Ke ukañ usuuk adaña adiitọọñọ ke Tama tutu akesịm mme mmọọñ Meriba Kades, afrọ ke Wadi ke Iyib tutu asịm Akpainyañ Mediterenia. Ami adiido adaña usuuk.
20Ke ukañ usobutịn, Akpainyañ Mediterenia adiido adaña tutu ke itie a-asakkaiso ase Lebo Hamad. Ami adiido adaña ñkañ usobutịn.
21“Ndufo enie edideeme isọñ ami ke atu ndufo ekeene mme esiin Isrel. 22Ndufo enie edideeme isọñ ami nnọọ idem ndufo ye mme isenawo e-edʌññọ ke atu ndufo e-enyʌññọ enie nditọ. Ndufo enie edidat ammọ nte mme amanaisọñ ke Isrel; enie edideeme isọñ nnọọ ammọ nte udeeme ke atu mme esiin Isrel. 23Ke esiin akeedodo a-asenawo adʌññọ, ndufo enie adinọ ammọ udeeme ammọ,” Abọọñ Andikara atañ.
Currently Selected:
Esikeel 47: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
