Hosie 13
13
Iyadesịd Abọọñ ke Abaña Isrel
1Akesido Ifrem akpetañ ikọ, mme awo enyeñ idem;
emaekpono anye ke Isrel,
ado anye amaanam ndudue ke adikpono Baal anyʌñ akpa.
2Idahami ammọ edọdiọñ enam idiọọkñkpọ;
ammọ ekama silfa enam ubobodñkpọ enọ idem ammọ,
mme ubobodñkpọ e-ekamake akpọsọñ ifiọk enam,
afịd ammọ edo ubọkutom mme anamusọ.
Etañ ami ebaña mbon ami,
“Ammọ ekama awo enam uwa!
Ammọ etʌm mme ubobod enañ inua!”
3Ke ntoro ammọ ediiba nte ntuhube ubakusen,
nte mbara usiere a-asoppo,
nte mbio abakpa a-afịm abenne ke afe ubeek abakpa asuan,
nte nsʌñikañ a-awuọhọ ke ubenafịm.
4“Ado ami ñkesʌk ndo Abọọñ Abasi ndufo
tọọñọ ndufo eketo Iyib ewuọ edi.
Ndufo idiidiọọñọke Abasi mfen ke imiibọhọke ami,
idiinyʌññọ idiọọñọ andinyaaña mfen ke imiibọhọke ami.
5Ami mmaikpeme ndufo ke anaan,
ke isọñ akpọsọñ ufiob.
6Idaha a-ami ñkenọọhọ ammọ ndidia, ammọ emaekop uyʌkkọ;
ke ammọ emaekekop uyʌkkọ, ammọ emaetọọñọ ntañidem;
akem ammọ emfre miin anyen.
7Ke ntoro ami ñyaaba nte ekpe nnọ ammọ,
ñnyʌñ ndịbe mbet ammọ ke usʌñ nte anawịdekpe.
8Nte amọnikọd e-eyịppe nditọ amọ,
ami ñyaanwana ñnyʌñ ñwai ammọ;
nte ekpe ami ñyaata ammọ;
idiọọk unamikọd ayaawai ammọ mbai-mbai.
9“Isrel, afo amedʌk nsobo,
sia afo ansuaha miin, asua andunọọ fiin unwam.
10Mmọ adidem mfo, yak anye aduunyaaña fiin?
Mmọ mme adaukara ke mme abio mfo,
a-afo akebooho,
‘Nnọ miin adidem ye ñkparawa ubọọñ’?
11Ndin ke iyadesịd mmi, ami unọ fiin adidem,
ndin ke ifiobesịd mmi, ami ñko mben anye nsio.
12Ebok idiọọkñkpọ Ifrem enịm,
ewet ndiọiñkpọ amọ enịm.
13Ubiak amọ aba nte ake awonwaan uman,
ado anye ado etəkayịn i-imiinieghe aniọñ;
ini amaadisịm,
anye inieghe ifiọk adiwuọ ke idịb.
14“Ami ñyaanyaaña mbon ami nsio ke adudu udi;
ami ñyaafak ammọ nsio ke ñkpa.
O ñkpa, mme udọñọ nsobo mfo eba ke mmọọ?
O udi, nsobo mfo aba ke mmọọ?
“Ami ndiituaha mbọm,
15akpesʌkado a-anye aforoke ke atu nditọeka amọ.
Abọọñ ayaanọ afịm nọ ato usakkautịn adi,
afịme ato akpautatan adi;
idịm mmọọñ amọ ayaakpu,
ube mmọọñ amọ ñko ayaasat.
Eyaebịme mme ñkpọuto amọ
ke ufọkubonoñkpọ amọ.
16Ana mbon Sameria eyọ ndudue ammọ,
sia ammọ e-esọñ iwuod ye Abasi ammọ.
Akañkañ ayaasobo ammọ;
eyaeyaak ntək nditọ ammọ etọ esuan ke isọñ,
eyaesai idịb ibaan ammọ eyommoke ekʌppọ#13:16 Ke mme ikpañwed Hibru ewet ufañ ami Hos 13:16 nte Hos 14:1..”
Currently Selected:
Hosie 13: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.